Денсаулық – бұл әр адамның өздігінен бағындыратын биігі. Дегенмен оған жетіп, сол жолдан таймау үшін мамандардың көмегі қажет. Дүниежүзілік денсаулық сақтау ұйымының мәліметі бойынша, адам денсаулығы 20 пайыз қоршаған ортаға, 20 пайыз шыққан тегіне, 10 пайыз денсаулық сақтау саласына, 50 пайыз адамның өзіне, мінез-құлық факторына байланысты болып саналады. Міне, осыған қарап-ақ дені сау ұлтты қалыптастыру бірінші кезекте әркімнің өзінен басталатынын аңғару қиын емес. Қалай дегенмен, елімізде азаматтардың денсаулығына мемлекет тарапынан үлкен көңіл бөлінеді, осы жолда көптеген игі бастамалар да қолға алынуда. Жылдар бойына маңызды іс-шаралар жүзеге асырылуда. Мемлекет басшысы да аталмыш саланы әр кез естен шығарған емес. Бұл жайында Елбасы халыққа арналған кезекті Жолдауында тағы бір мәрте атап өтті. Биылғы Жолдауында Елбасы халықтың орташа өмір ұзақтығының артуын ең негізгі жетістік деп санауға болатынын айтты, білікті дәрігерлердің де өз елімізде бар екеніне тоқталды.
«Біздің халқымыз дәл бүгінгідей бақуатты тұрмыс көрген жоқ. Тәуелсіздік алғаннан бері, 1300-ден астам денсаулық сақтау нысандары, 1700-ден астам білім беру ошақтары салынды. Олардың барлығы ең соңғы үлгідегі құрылғылармен жабдықталды. Аса күрделі оталарды өз елімізде өз дәрігерлеріміз жасайтын деңгейге жеткіздік. Бұл ешқашан болған емес», — деді Президент.
Осы орайда Мемлекет басшысы жалпы халықтың тұрмысы мен денсаулығының түзелуі нәтижесінде Қазақстанда сәбилердің туу деңгейі өскенін, халқымыздың санының жыл сайын өсуі артқанын жеткізді. Денсаулық сақтау мәселесі мен халықтың өмір сүру жағдайының жақсаруы қазақстандықтар өмірінің ұзақтығына әсер еткенін атап өтті.
«Бұл – ең негізгі жетістік. Он жылдың ішінде 64 жастан 72 жасқа дейін көтерілу — ешбір елде кездеспеген жағдай. Мемлекет қандай жағдайда да әлеуметтік міндеттемелерін шашау шығармай орындап келеді. Тарихымызды түгендеп, мәдениетімізді өркендетуге қол жеткіздік. Жаңа жылдан бастап бюджет қызметкерлерінің жалақысы, әлеуметтік жәрдемақылар мен шәкіртақы орташа есеппен 30 пайызға дейін көбейетін болады. Осының барлығы халықтың болашаққа сеніммен қарап, алаңсыз өмір сүруіне толық негіз бола алады»,-деп тоқталды.
Ендеше, Елбасы стратегиясын жүзеге асыруда әрбір қазақстандық атсалысуымыз қажет. Дамыған 30 елдің қатарына қосылу үшін дені сау ұлт болу негізгі қағидамызға айналу керек. Жолдауда айтылғандай, әрбір қазақстандық өз денсаулығына жауапкершілікпен қарап, мінез-құлықын өзгертіп, зиянды әдеттерден аулақ болып, салауатты өмір салтын ұстанса ғана, биік белестерге жетеріміз анық. Қазақстан көркейе берсін!
Зәуреш МУСИНОВА, Семей қалалық салауатты өмір салтын қалыптастыру орталығының директоры.
