Биыл Семей қаласындағы Әміре Қашаубаев атындағы облыстық филармонияның құрылғанына 70 жыл. Абай атындағы театрда өнер ордасының 70 жылдығына арналған салтанатты жиын өтіп, оған ШҚО әкімінің орынбасары Жақсылық Омар арнайы қатысты. Сонымен қатар «Түркі мұрасы» атты Халықаралық дирижерлер байқауы да аталмыш мереке аясында ұйымдастырылды.
Өнер ордасының 70 жылдығына арналған мерекелік шаралар Әміре Қашаубаевтың ескерткішіне гүл шоқтарын қою рәсімімен бастау алды. Мәртебелі меймандар бұдан кейін қалалық Мәдениет сарайында «Түркі мұрасы» атты халықаралық дирижерлер байқауын тамашалауға мүмкіндік алды. Оған Ресей, Моңғолия, Қытай және еліміздің өзге облыстарынан белді өнер майталмандары жиналыпты.
— Мен байқауға қатысуға бірден келісімімді бердім. Себебі мұнда Қытай және Моңғо-лиядан үздік дирижерлер келетіні туралы хабар алдым. Өзіме қызықты көптеген жаңа әуендермен танысып шықтым. Келешекте кейбіреуін біздің оркестріміздің репертуарына кіргізуді жоспарлап отырмыз. Дирижерлердің байқауы сіздердің шаһарларыңызда өтіп жатқанына біз қуаныштымыз. Алдағы уақытта қазақстандық әріптестеріміз тәжірибе алмасу үшін біздің аймаққа да келсе екен деген ойдамыз. Біздің олардан үйренеріміз көп, — деп өз ойымен бөлісті Алтай Республикасындағы мемлекеттік оркестрдің бас дирижері, РФ еңбек сіңірген қайраткері Владимир Кончев.
Ал Құрманғазы атындағы Қазақ мемлекеттік академиялық халықтық аспаптар оркестрінің дирижері, ҚР еңбек сіңірген қайраткері Жанас Бекентұровтың айтуынша, мұндай деңгейдегі байқау елімізде алғаш рет өткізіліп отыр екен.
— Бұл өз кезегінде семейлік филармонияның шығармашылығына оң әсерін беретіндігіне сенімдімін. Музыканттарға халықаралық дәрежедегі өнер тарландарынан шеберлік алуға мүмкіндік туды. Мұндай сәттер күнде бола бермейтінін естен шығармаған абзал. Әр дирижер өз әдістерімен бөлісті. Бұл Қазақстанның музыка өнеріне жаңа бір серпін беретіні даусыз дейді — дейді Жанас Бекентұров.
Мерейтойға арналған негізгі шаралар Абай атындағы қазақ мемлекеттік музыкалы-драма театрында салтанатты жиынмен жалғасын тапты. Салтанатты жиынға қа-тысқан ШҚО әкімінің орынбасары Жақсылық Омар облыс әкімі Даниал Ахметовтің құттықтауын жеткізді.
— Қазақ халқының өмірінде музыканың алатын орны айрықша. Себебі ол — ұлтымыздың бүкіл болмысы мен тарихын һәм салт-дәстүрін бейнелейтін рухани құрал. Оны домбыра мен қобыздың күмбірлеген үнінен естуге болады. Бүгін мұнда халықтық музыканың кәнігі майталмандары мен нағыз жанашырлары жиналып отыр. Семей филармониясы – Қазақстан мәдениетінде өз орнын жоғалтпаған шығармашылық ұжымдардың бірегейі. Ол бүгінде өз мәртебесінен айырылған емес. Сондықтан да Шығыс Қазақстан өңірінде екі филармония-ның болуы — заңды құбылыс. Бұл мемлекеттің Семейге деген қамқорлығы деп түсінуіміз керек. Осы ұжымнан әлі талай өнер марқасқалары шығатындығына шүбә келтірмеймін. Соңғы жылдары филармония шетелдік турларға шығып, Жапония, Қытай және Франция жұртшылығын өз туындыларымен қуантып үлгерді, — деп атап өтті Жақсылық Мұқашұлы.
Айта кету керек, филармонияның негізі 1947 жылы қаланған болатын. Алғашында ол концерттік-эстрадалық ұжым ретінде қалыптасқан еді. Ал Кеңес Одағы тұсында оған Семей облыстық мемлекеттік филармония мәртебесі, 1969 жылдан бастап өнер шаңырағына Әміре Қашаубаевтың есімі беріліпті. Әр жылдары оның құрамында Б.Сыбанов, М.Ешекеев, К.Өлмесеков, Р.Байдалина сынды елімізге белгілі өнер майталмандары қызмет еткен.
Ж. СҮЛЕЙМЕН,
«Семей таңы»
