Желтоқсан айының 3 — 5 күндері аралығында Тараз қаласында тұңғыш рет ҚР Қазақ күресі федерациясының Кубогы сарапқа салынды. Қазақ хандығының 550 жылдығына арналған сайыста еліміздің барлық облыстары мен Астана және Алматы қалаларынан 16 команда бақ сынады. Қазақ күресінің сайыпқырандары бас қосқан айтулы бәсекеде Семей мемлекеттік медицина университетінің спорттық клубы Қазақ күресі федерациясы Кубогын ұтып алды.
Тараздан туған жерге оралған жеңімпаздарды жанкүйерлері мен туған – туыстары 7 желтоқсан күні теміржол бекетінде салтанатпен күтіп алды. Жарыстың жалпы жүлде қоры 20 млн. теңгені құрапты. Палуандар 55, 60, 66, 74, 82, 90, 100 және 100 келіден жоғары салмақта боз кілемнің көрігін қыздырды. Байрақты бәсекеде, семейліктерден бөлек, ШҚО – ның намысын Тарбағатай ауданының М.Имашев атындағы балалар мен жасөспірімдер спорт мектебі де қорғаған еді. Алайда шығыстың қос командасының жеңісті жолы жартылай финалда түйісіп, СММУ-дің командасы басым түскен. Үшінші орын үшін таласта тарбағатайлық өрендер, өкінішке орай, Алматы құрамасына есе жіберіп, төртінші орынға табан тіреді. Ал ел кубогы үшін ақтық сында СММУ-нің командасы Қызылорда облысының «Алаш арландарын» 7:1 есебімен ұтып, жеңімпаз атанды.
Спорттық клубтың бас жаттықтырушысы Ербол Мырзабосынов жеңістің оңай жолмен келмегенін айтады.
— Ұлттық күресімізді кең насихаттау мақсатында командалық сайысты өткізуді жөн көрдік. Жарыс өте жоғары деңгейде ұйымдастырылды. Бізге қолдау көрсеткен ШҚО және Семей қаласының әкімдігіне алғыс білдіреміз. Сондай-ақ СММУ-дің басшылығына да ризашылығымыз шексіз. Жалпы, жеңіс жолында алты кездесу өткізіп, бабы келіскен палуандарымыздың бағы жанды. Олардың арасында халықаралық сайыстарда ел абыройын асқақтатып жүрген бірқатар сақа спортшыларымыз да бар. Мәселен, 55 келіде Айдос Сейпілұлы, 60 келіде Қуаныш Искаков, Мейіржан Берекетов, 66 келіде Төлеген Нұрғалиев, 74 келіде Елдар Бейсембаев, 82 келіде Ерасыл Қайырбек және Айдар Қабимоллаев, 90 келіде Әсет Ахметжанов, 100 келіде Мұхит Тұрсынов және 100-ден жоғары салмақта Айбек Нұғымаров пен Ерасыл Қажыбаев жақсы өнер көрсетіп, үмітімізді ақтады. Бұл жеңіске әуелі құрамадағы ауызбіршіліктің нәтижесінде жеттік. Осы жетістікпен барша Семей халқының жігерін оятып, қуанта білдік деген сенімдеміз. Осал қарсыластар болған жоқ. Соған қарамастан, шәкірттеріміз намысты қолдан бермей, үздік атанды, — дейді СММУ командасының бас жаттықтырушысы Ербол Мырзабосынов.
Сонымен қатар Ербол Қуантайұлы ұтып алынған 10 млн. теңгенің сертификаты жас палуандарға күреспен әрмен қарай айналысуға демеу беретінін жеткізді. Бұған қоса қазақ күресінің майталмандары осы қаражатпен көмекке мұқтаж жандарға да қолдау көрсетуді көздеп отыр. Аталмыш турнирде қарсыластарын қапы қалдырып, сан соқтырған палуандардың бірі — «Қазақстан барысы» Мұхит Тұрсынов.
— Команданың дайындығы өте жоғары деңгейде болды. Семейде жасаған жаттығуларды Тараз қаласында да үзген жоқпыз. Міне, нәтижесінде ел Кубогын иелендік. Енді келесі жылы дәстүрлі ел біріншілігі, Азия әрі Әлем чемпионаты және «Қазақстан барысы» сынды ауқымды жарыстар бар. Жаттығуды осы бастан пысықтайтын боламыз, — дейді Мұхит Тұрсынов.
Жақсылық МҰРАТҚАЛИҰЛЫ,
«Семей таңы»
