Мемлекет басшысының «Қазақстан жолы — 2050: Бір мақсат, бір мүдде, бір болашақ» атты Жолдауы көп ұлтты Қазақстан халқынан қолдау тапты. Осыған орай облыс әкімі Б.Сапарбаевтың төрағалығымен онлайн режимінде селекторлық жиын өтті. Жиынға облыс әкімінің орынбасарлары, қала және аудан әкімдері мен бөлім басшылары, облыстық мәслихаттың депутаттары, БАҚ өкілдері қатысты.
Биылғы Жолдаудың ең негізгі құндылықтарының бірі – біздің ұлттық идеологиямыз «Мәңгілік ел» деп аталды, деп сөзін бастаған облыс басшысы Бердібек Сапарбаев биылғы Жолдауда нақты тапсырмалар беріліп, оны орындаудың бағыт-бағдары көрсетілген, бәсекеге қабілетті ел болуымыз үшін сол тапсырмаларды жүзеге асыру міндеті халыққа жүктелетіндігін тілге тиек етті. Бұл жолда шығысқазақстандықтардың алдында жеті бағыттағы тапсырмалардың тұрғандығын да облыс басшысы атап өтті.
— Әлемдік стандарттарға сай тауар көлемін үздіксіз ұлғайту, білімге негізделген экономиканы дамыту — негізгі қағидалар болып табылады.Оның біріншісі- инновациялық индустрияландыру трендін түзеу және күшейте түсу маңызды. Бұл тарапта біз жаман жұмыс жасаған жоқпыз. Біздің облысымыздан индустрияландыру картасына 600 млрд.теңгені қамтыған 61 жоба енді. Қазіргі таңда оның 31-і жүзеге асты. Нәтижесінде өткен жылы ғана біз 300 млрд.теңгеге қосымша өндіріс көлемін алдық. Қосымша 8 мың жұмыс орны ашылды. Құрастыру бюросы, технопарктер, металлургтер орталығы ашылды.
— Жолдауда айтылғандай, Қазақстанның агроөнеркәсіп кешенін инновациялық бағытқа түсіру маңызды. Өткен жылы өңіріміз өндіріс көлемі жағынан республикада 3 орын алды. Агроөнеркәсіп өндірісі 295 млрд. теңге құрады. Елбасымыз атап өткендей, бізде жер ресурсын қолдануда бірқатар мәселелер бар. Біз тұрақты түрде инвентаризация жүргіземіз, десе де оның нәтижесін қолданбаймыз, жүздеген мың жер аумағы игерілмей қалады. Жерді жалға алу жөнінен сауал болған, егер өз қаржыларын салып, жерді жалға ала отырып, игеруге ниетті инвесторлар болса, жалға беру керек, — деді аймақ басшысы.
Сонымен қатар, өндірістік қауіпсіздік те маңызды рөл атқарады. Облыс басшысының айтуынша, қазіргі таңда аймақтағы өндірушілердің халықты қажетті азық-түлікпен қамтамасыз етуге толықтай қауқары жетеді. Ауылшаруашылығы өнімдерін өндіріп, оны өткеруді жолға қою керек. Қазір өнімді көбінесе тұтынушылар емес, делдалдар алуда. Бұл орайда Семей мен Өскемен қалаларында ауылдықтардың өз өнімдерін өткерулеріне жағдай жасалғандығын айтқан облыс басшысы:
— Тағы бір маңызды мәселе – инфрақұрылым жүйесі. Елбасымыз тағы бір мәрте Астана – Павлодар – Семей –Өскемен, Алматы – Қапшағай – Өскемен бағытындағы автожолдарын салу басталғандығын айтты. Семейден Қалбатауға, Бақтыдан Аякөзге, Өскеменнен Рахман бұлағына дейінгі аралықтағы жолдар жөнделуде, — деді.
Өз сөзінде Бердібек Сапарбаев мемлекеттік-жекеменшік серіктестіктеріне, шағын және орта бизнеске назар аударды.
— Елбасымыз бұл салада еңбек етушілер үлесі 10 пайызды құрауы керек деп тапсырма берді. Қазір облысымызда бұл көрсеткіш 30 пайызды құрап отыр. Би-ылғы жылы біз 35 пайызға қол жеткізуіміз керек. Бизнестің маңызды нысандары ірі компаниялар мен өндіріс ошақтарына сәйкес дамуы керек. Бізде қазір бары аздық етеді. Десе де бізде «Қазақмыс», ТМК, УМЗ сынды ірі компаниялардың басшыларымен келісім болғанымен, жұмысты тездету керек. Бизнеспен айналысуға жағдай жасау мәселесіне келсек, Өскемен мен Семейде бизнес орталықтары жұмыс жасап жатыр, — деген аймақ басшысы «Жол картасы — 2020» тәрізді бағдарламаларды жүзеге асыру,- керек деді.
Сондай-ақ, облыс әкімі назар аударған тағы бір мәселелер тізбегі — білім саласы, аудан әкімдерінің жиындарында айтылғандай, бұл салада мамандардың жетіспеуі және ҰБТ мәселесі, мектепке дейінгі орталықтар сынды өзекті мәселелер. Бұл жөнінде әкімдер мен білім бөлімі басшыларына тапсырма берді. Сонымен қатар, Бердібек Сапарбаев өз сөзінде Семейде өткен жылы қалалық аурухана құрылыстары жүргенін, биыл радиологиялық орталық пен балалар туберкулезі ауруханасы құрылысының аяқталып, жаңа балалар ауруханасының құрылысы басталатынын айтты.
Өз сөзін қорытындылай келе, облыс басшысы Бердібек Сапарбаев заманауи қоғамда мемлекеттік органдар мен бизнес секторы қоян-қолтық жұмыс істеуі керектігін айтты. Қазақстан халықтары Ассамблеясы сынды қоғамдық институттармен байланыса отырып, жемісті еңбек үлгісін көрсетуге болатындығына тоқталды.
Аймақ басшысының сөзіне облыстық мәслихат депутаттары, ғалымдар, бизнес және қоғамдық ұйымдар өкілдері қолдау білдірді. «Кеше ғана алынбас асу болып көрінген 2030-стратегиясын еңсеріп, қыр басына келіп, бел жазған шақта 2050 стратегиясы енді бағындырар меже болып көрінді» деді жиынға қатысушылар. Ортақ мақсат, бір болашақтың жолында құрыл-ған бұл Жолдау Елбасы меңзегендей қараша халыққа жетіп, жалпыхалықтық сипатқа ие болатыны күмәнсіз. Олай болса, «Қазақстан-2050» стратегиясын жүзеге асырып, дамыған 30 елдің қатарына енуге әрқайсысымыз атсалысуымыз керек.
Әйгерім Сәрсенғали,
«Семей таңы»
