Ел мерекесі Тәуелсіздік күніне орай, қалалық әкімдікте “Алтын” және “Күміс алқа” иегерлері атанған аналарды салтанатты түрде марапаттау рәсімі болып өтті. Бұл шараға Семей қаласы әкімі аппаратының басшысы Зәуреш Исабаева қатысып, мерейге бөленген аяулы жандарға алқа тағып, куәліктер табыс етті.
Жиналған қауым алдында Зәуреш Рамазанқызы өз құттықтау лебізінде аналардың ел демографиясына, халықтың табиғи өсіміне қосып отыр-ған үлесіне тоқтала келе, әр перзенттің жүрегінде алтын әріппен жазылатын аналардың бүгінгі қоғам үшін де мейлінше ардақты екенін жеткізді.
— Аналардың өмірге бала әкелуінің өзі үлкен ерлік әрі бақыт. Сіздер өмірге перзент әкелген бақытты анасыздар. Әрине, баланы өсіру, жеткізу оңай емес. Түн ұйқыларыңызды төрт бөліп, жүрек мейіріміне бөлеп жеткізесіздер. Дана қазақта «Ұл өсіргенің – ұрпақ өсіргенің, қыз өсіргенің — ұлт өсіргенің» деген нақыл сөз бар. Демек, сіздер еліміздің ертеңін, Тәуелсіз Қазақстанның ертеңгі азаматтарын тәрбиелеп жатырсыздар. Ендеше, осынау жолда сіздердің атқарып отырған еңбектеріңіздің орны ерекше деген сөз. Осы үшін де көп балалы аналар мемлекеттің қамқорлығына алынған. Әрқайсыларыңыздың отбасыларыңызға бақыт тілеймін. Ұрпақтарыңыздың қызық-қуанышына кенеле беріңіздер. Балаларыңыз ертеңгі күні Тәуелсіз еліміздің әлемнің үздік дамыған 30 елінің қатарына енуіне күш салатын қайраткер ұл-қыз болып ер жетсін, — деп ізгі тілек білдіре келе, қала әкімі Ермак Сәлімовтің құттықтауын жеткізіп өтті.
Осыдан соң аналарға алқа тағып, тағы да бір мәрте құттықтады.
Ал келесі кезекте қалалық жұмыспен қамту және әлеуметтік бағдарламалар бөлімі басшысының міндетін атқарушы Азамат Амангелдіұлы сөз алып, құттықтау тілегін білдіре келе, ендігі аралықта Алтын және Күміс алқа иегері атанған аналарға ай сайын мемлекеттік жәрдемақы тағайындалатынын жеткізе келе, қажетті құжаттар жинастырып, рәсімдеу жолын түсіндіріп өтті.
Бұл жолы абыройға семейлік төрт ана кенелді. Олардың ішіндегі Алтын алқа иегері атанған ең жас ана не бары 31-де ғана екен. Ал ең үлкені — сегіз бала тәрбиелеп өсірген Насихат апа өз кезегінде әкімдік қызметкерлеріне алғыс білдіре отырып, аналарға ұрпақ қызығына кенеле берулеріне тілектестік білдірді.
«СТ- ақпарат»
