«Қай елдің баспасөзі мықты болса, сол елдің болашағы зор»,- деген екен өз заманында Міржақып Дулатов. Әлбетте, бүгінде баспасөздің қоғам үшін орны да, жөні де бөлек. Билік пен бұқараның арасындағы алтын көпір де қалам ұстаған қауым. Қашанда елдің мұңын мұңдайтын, жетістігі болса жар салатын, жаңалыққа жаны құштар жандардың басын қосатын дәстүрлі журналистер форумы болып өтті.
Жыл сайын байланыс және ақпарат қызметкерлерінің төл мерекесі қарсаңында ұйымдастырылатын форумның, уақытымен қатар, форматы да өзгеше болды. Олай дейтініміз- маусым айының соңғы сенбісінде өр Алтайдың төріне жиналатын қалам ұстаған қауым биыл жыл аяғында бас қосты. Жалпы, биылғы салтанатты басқосуға облыс бойынша жүзге тарта журналист жиналды.
Облыстық журналистер форумына ШҚО-ның әкімі Даниал Ахметов арнайы қатысты, өңір журналистикасының өркендеуіне өзіндік үлес қосқан бірқатар әріптестеріміз марапатқа лайық деп танылды.
Алдымен облыс әкімі Даниал Кенжетайұлы журналистер алдында сөз алды. Аймақ басшысы қалам ұстаған қауымның қоғамдағы алар орнына тоқталып, олардың еліміздің дамуына, кемшіліктердің жойылып, олқылықтардың түзелуіне оң әсерлерін тигізіп келе жатқанын айтып, келе жатқан Жаңа жыл мерекесімен құттықтап, қой жылын табысты аяқтауға тілектестігін білдірді.
— Халық пен биліктің арасындағы дәнекерге айналған БАҚ өкілдерінің қоғамдағы рөлі ерекше. Еліміздің, облысымыздың экономикасын дамытуда, қоғамның өркендеуінде журналистердің қосып отырған үлесі зор деп білемін. Біздің алдымызда күрделі кезең тұр. Әлемдік дағдарыстың белең алған шағында Сіздерге де артылатын жүктің салмағы ауыр. Өйткені халық сіздер арқылы ақпаратқа қанығады. Осы ретте Сіздер объективті тұрғыдан кәсіби шеберліктеріңізді көрсететіндеріңізге сенімдімін, — деді Даниал Кенжетайұлы.
Жағымды жаңалықтың жаршысына айналып, аймағымыздың тыныс-тіршілігі жайлы ақпарат таратуда белсенділік танытып, облыстағы журналистика саласының дамуына өзіндік үлес қосып жүрген бірқатар журналистер мен БАҚ ұжымдарын облыс әкімі Даниал Ахметов арнайы марапаттады. Осы ретте өңір журналистикасын дамытуға және қоғамдық – саяси іс – шараларды жария етуге қосқан үлесі үшін Даниал Ахметов «Семей таңы» — «Вести Семей» газеттерінің директоры Риза Молдашеваны Шығыс Қазақстан облысының грамотасымен, өңір журналистикасын дамытуға қосқан үлесі үшін «2015 жылғы мерейтой даталары» номинациясы бойынша «Семей таңы» газетінің бас редакторы Ерзат Жанатұлын арнайы дипломмен марапаттады.
Сонымен қатар облыс журналистикасының дамуы жолында еңбек етіп жүрген республикалық, облыстық, аудандық деңгейдегі әріптестеріміз де аймақ басшысының марапатына ие болды.
«СТ — ақпарат»
