Ағымдағы жыл өңіріміздегі медицина саласы үшін де біршама табысты жыл болды. Аймағымызда жаңадан есік ашқан бірқатар денсаулық сақтау нысандары ел мүддесі жолында қызмет етпек. Мұндай жағымды жаңалықтар қатары 16 желтоқсан – Тәуелсіздік мерекесіне орай жуырда қаламызда да орын алды.
Семейдегі 72 — квартал аумағынан жаңадан «In Vitro» консультациялық-диагностикалық емханасының филиалы ашылды. Айта кету керек, осыған дейін қалалықтар денсаулығын нығайтуда қалтқысыз үлес қосып келе жатқан бұл нысан ендігі арада өз қызметін кеңейте түспек. Мерекеге орай ұйымдастырылған айтулы шараға қала әкімі Ермак Сәлімов арнайы қатысты.
Аталмыш саланың ардагерлері салтанатты түрдегі лента қию рәсімін өткізген соң, меймандар жаңа ғимараттың ішіне еніп, қызмет көрсету барысымен, заманауи құрылғылар қатарымен танысты. Мұнда кәсіби біліктілігі жоғары арнай мамандар қалалықтарға тұрақты қызмет көрсетеді. Сонымен қатар аурудың диагнозын қоюда лабораториялық зерттеулер жүргізіліп және инфаркт пен инсульттен кейінгі оңалту бойынша қызметтер ұсынылады. Аталмыш медициналық мекеме әсіресе қимыл-қозғалысында кемістігі бар жандар үшін жоғары дәрежеде қызмет көрсетеді. Себебі мұнда қазіргі заманғы массаж үлгілері жасалады. Яғни, аталмыш емханаға мүгедектер жиі келеді. Сонымен қатар «In Vitro» УЗИ аппараты мен ЭКГ, ЭХО КГ-ға түсіру, клиникалық, биохимиялық, гормондық, иммунологиялық анализ сараптамалар жасау арқылы да халыққа сапалы қызмет көрсете алады. Қорыта айтқанда, Семей қаласы бойынша 2008 жылы клиникалық зерттеулер жүргізетін шағын зертхана ретінде жұмысын бастаған «In Vitro+» бүгінде – әлемдік өндірушілердің жоғары технологиялық жабдықтарымен жабдықталған, EQAS BIO-RAD америкалық сыртқы сапа жүйесіне қатысу құқығына лайық деп танылған заманауи емхана деңгейіне дейін көтерілді. Айта кету керек, бұл нысанды ашу үлкен қажеттіліктен туындапты.
Жаңа ғимараттың негізгі мақсат-міндеттерімен таныстырған емхана басшысы Нәзипа Изатоллаева мемлекеттік тапсырыс аясында екі жыл ішінде екі мәрте қаржы алып, жаһандық үлгіге сай мекеме ашуға мүмкіндік алыпты.
-Қазіргі таңда жекеменшік медициналық мекемелер ашуға Елбасының өзі ерекше ден қойып отыр. Ендігі аралықта Президент сенімін ақтауға тырысамыз, — дейді өз қызметтері жөнінде пікір білдірген Н. Сұлтанқызы.
Қосымша ретінде ашылған емханада емделушілер күндізгі стационарда ем қабылдайтын болады. Яғни, жүрек-қан тамыр аурулары бойынша ауыр сырқаттардан айыққан жандар тиісті кеңес алып, толық айығып кеткенше дәрігерлер қарауында болады. Бұл ретте инсульттен кейін қаралған науқастар үшін көрсетілер көмек айрықша. Аталмыш емханада сонымен қатар балалардың церебральды сал аурулары үшін уқалау ем-домдары да жасалады екен. Ол үшін келушілерге арналып остеоденситометрия кабинеті жабдықталған.
Жаңа нысандағы халық денсаулығын жақсарту бағытындағы жұмыстармен танысқан қала әкімі Ермак Бидахметұлы қызметкерлер жұмысына табыс тіледі.
Қуаныш ЖОЛЫМБЕТ,
«Семей таңы»
