Семей қалалық әкімдігінде қалалық мәслихаттың кезекті 47-ші сессиясы болып өтті. Қалалық мәслихат хатшысы Бейсенбек Ақжалов пен мәслихат депуттаттары, әкімдіктегі бөлім басшылары, органдар жетекшілері мен ұйымдар басшылары қатысқан сессия жұмысының күн тәртібіне 12 мәселе қойылып, талқыланды.
Атап айтсақ, бірінші кезекте қалалық мәслихаттың 2016 жылға арналған жұмыс жоспары талқыға салынды. Ал одан кейінгі кезекте Семей қаласының 2016-2018 жылдарға арналған бюджеті туралы мағлұматтар тыңдалды. Семей қалалық экономика және бюджеттік жоспарлау бөлімінің басшысы Гүлжан Алтынбекова баяндама жасады. Бөлім басшысының айтуынша, 2016-2018 жылдарға арналған қала бюджеті өңірдің әлеуметтік-экономикалық өркендеу бағыттарын негізге ала отырып жасалынған. Бұл ретте келергі жылдың кірістері мен қалалық бюджеттің негізгі шығындары да тыңғылықты есепке алынған. Алдағы жылдардың бюджеттік есебін бүге-шігесіне дейін түсіндіріп өткен Гүлжан Қайырханқызы «2016-2018 жылдарға арналған Республикалық бюджет» туралы ҚР Заңнамасының басымдықтары негізінде жұмыстар жасалынғанын және облыстық мәслихат шешімі бойынша қаламызға бөлінген трансферттердің мақсатты жұмсалуы жайлы да мәлімет беріп өтті.
Сондай-ақ келесі кезекте Семей қаласының ІІБ-ның қалада қоғамдық тәртіпті нығайту және қылмыстың алдын алуды күшейту жөніндегі ақпараты тыңдалды. Шаһарымыздағы құқық бұзушылық пен оның алдын алуға бағытталған іргелі шаралар қатары жайында қалалық ІІБ басшысы Жұмабек Исаділов тұшымды баяндама жасап өтті. Оның айтуынша, қазіргі күні қылмыстық ахуал алаңдаушылық туғызбайды. Семейдегі ең жиі орын алатын қылмыс түрі ұялы телефон жоғалту мен көлікті айдап әкету екен. Дегенмен оның өзінің ашылу көрсеткіші бұрынғы жылдармен салыстырғанда анағұрлым жоғары. Әсіресе пәтер ұрлығын ашу бойынша біршама жетістіктер бар. Осы орайда қаламыздың бас полицейі семейлік полиция қызметкерлерінің өскемендік әріптестерімен салыстырғанда техникалық тұрғыда аз қамтылғанымен, орын алған қылмысты ашу бойынша деңгейлес екенін де тілге тиек етіп өтті. Сонымен қатар қаламыз бойынша жалпы тәртіп, әсіресе жасөспірімдер тәрбиесі, оның ішінде мектептегі полиция инспекторларының қызметі туралы да мол мағлұмат берді.
Келесі кезектегі тыңдалған мәселелер қатарын 2013 жылғы 21 тамыздағы №22111-V «Семей қаласында әлеуметтік-мәдени және тұрғын үй – азаматтық маңыздағы нысандар құрылысының жай-күйі туралы» шешімнің орындалу барысы, сондай-ақ Семей қаласын дамытудың 2016-2020 жылдарға арналған бағдарламасы жайындағы бірқатар ақпараттар ортаға салынды.
Қ.ӘЛІМБЕК, Семей қаласы.
