Тарбағатай ауданындағы Ақсуат, Ақжар және Тұғыл ауылдарында ауыл шаруашылығы тауар өндірушілерінің қатысуымен жәрмеңке өткізу дәстүрі қалыптасқан. Таяуда Ақсуатта болған жәрмеңке де аудан тұрғындарының көңілінен шықты. Саудаланған өнімдердің бағасы да ауылдағы сауда дүкендерінен 15-20-ға пайыз төмен болды.
Жәрмеңкеде жылқы, ірі қара, қой еті саудаланды. Көкөніс түрлерінен 57 тонна картоп, 18 тонна сәбіз, 10 тонна қырыққабат әкелініп, картоптың келісі 50 теңгеден, ал сәбіз бен қырыққабаттың келісі 60 теңгеден сатылды. Сондай-ақ нан және сүт өнімдері де арзан бағада болды.
Бұл жолы да аудан орталығына шалғайдағы шаруашылық иелері өз өнімдерін әкелген екен. Қызылкесік, Кіндікті, Ойшілік, Жәнтікей, Құмкөл ауылдарынан келген кәсіпкерлер өздері өндірген өнімдерін саудалап, еңбектерінің жемісін көрді. Ақсуаттағы жеке кәсіпкерлер де өз өнімдерін жәрмеңкеге келушілерге ұсынды.
Жәрмеңкені аралап көрген Тарбағатай ауданының әкімі Ділдабек Оразбаев сауданың қалай жүріп жатқанына назар аударып, тауар өндірушілермен де, аудан тұрғындарымен де емен – жар-қын әңгімелесіп, өнім сапасы, тауар бағасы жайында пікір алмасты. Алдағы уақытта жәрмеңкені қалай дамытуға болатыны жайлы сұрастырды. Ойды ой қозғайды деген рас. Жәрмеңкені аудан басшысымен бірге аралап жүрген аудандық ардагерлер кеңесінің төрағасы Мұқан Сахариев пен облыс әкімінің Тарбағатай ауданындағы кеңесшісі Амантай Сәметов өз ойларын ортаға салды.
— Осындай жәрмеңкеде тірі мал әкеліп сату ұйымдастырылса, артық болмас еді. Біреу мал өсіру үшін мал сатып алады, енді біреу арық малды сатып алып бордақылап, кәсіп жасауды қолайлы көреді. Сонымен қатар мұнда жемшөп, арпа, бидай сатылса, жәрмеңкенің халыққа тигізер пайдасы арта түсер еді,- дейді өмір көрген ардагерлер.
Аудан басшысы Ділдабек Тәжібайұлы бұл айтылған пікірлерді қолдайтындығын білдіре отырып, сала басшыларына бұл мәселелерді зерттеп, ұйымдастыру жөнінде тапсырма беріп жатты. Шұжық сатып тұрған жеке кәсіпкерлермен әңгімелескен аудан басшысы тауарды алыстан әкеліп саудаламай-ақ, сол тауарды өздері де жасай алатынын, ол үшін несие алып, цех орнатамын дегендер болса, көмектесетінін де жеткізді.
Хамза СӘТИЕВ,
«Семей таңы»
