2015 жылды облысымыздағы Үржар ауданы ел әлеуетін арттыру тұрғысында ауыз толтырып айтарлықтай жетістіктермен тамамдағалы отыр. Облыс әкімі Даниал Кенжетайұлы Ахметовтің әр ауданда сүт-тауарлы фермаларын құрып, сүт қабылдау арқылы тұрғындар үшін қолжетімді, таза, арзан, сапалы өнім өндіруді қолға алуға байланысты тапсырмасынан туындаған сүт қабылдау орталықтарының аталған ауданда ашылуы сондай игілікті істердің қатарында.
Облыс басшысының тапсырмасы бойынша аудан орталығы Үржардан кейін таяуда Мақаншы ауылында екінші сүт қабылдау орталығы ашылды. Мемлекет есебінен 5 млн. теңге несие алған шағын кәсіп иесі Нығмет Қайролла алдағы уақытта тұрғындарды табиғи, сапалы әрі таза өнімдермен қамтамасыз ететін болады.
Сүт қабылдау орталығының ашылу салтанатына жиналған тұрғындар алдында ауылдық округ әкімі С. Қалиев сөз алып, жаңа орталықтың жұмысымен қысқаша таныстырып, сәттілік пен табыс тіледі.
Салтанатты жиында сөз алған аудан басшысы Серік Зайнулдин сүт қабылдау орталығы аймақ басшысы Даниал Кенжетайұлының тікелей тапсырмасы негізінде іске асып отырғанын атап өтті:
— Құрметті жерлестер, Ұлт Көшбасшысы Н.Ә.Назарбаевтың сындарлы саясатының арқасында еліміз осы 24 жылдың ішінде көптеген жұмыстарды атқарып, талай асуларды еңсеріп жатыр. Қандай қиындық болмасын, ең бастысы, елімізде береке-бірлік бар. Облыс басшысы Даниал Кенжетайұлы Ахметовтің тапсырмасы бойынша, сүт-тауарлы фермаларды ашу жұмыстары облысымызда жақсы жолға қойылып, Үржар ауданында да іргелі жұмыстар жасалып жатыр. Аудан әлеуетін арттыратын басқа да жаңа жобалар қолға алынуда. Ең басты жаңалық — Үржардан жылына 30 мың тонна құс етін өндіретін фабрика салынады. Сонымен қатар осы Мақаншы өңірінен томат өндіретін зауыт салсақ деген жоспарымыз бар. Осындай іргелі жоспарларды жүзеге асыру жолында береке-бірлік таныта білуіміз керек,- деп атап өтті Серік Зинабекұлы. — Міне, бүгін сіздерде қуанышты күн. Нығмет Қайролла тәулігіне 3 тонна сүт қабылдайтын орталық ашып отыр. Бүгіннен бастап шетелдің жасанды, құрамы белгісіз ұнтақ сүтін ішпей, еліміздің патриоты ретінде, өзіміздің табиғи өнімімізді тұтынуға мүмкіндік бар,-деп аяқтады сөзін аудан әкімі.
Келесі кезектегі сөз Мақаншы ауылдық ардагерлер алқасының мүшесі Ф. Омарұлына берілді.
— Бүгінгі ашылып отырған мекеме — Тәуелсіздігіміздің арқасында қол жеткізген жетістік, енді осы орталықтың қалтқысыз жұмыс істеуіне үлес қосып, қолдау көрсетейік,- деп қадірменді қария ізгі лебізін білдірді.
Сонымен қатар сөз кезегі Нығмет Қайроллаға беріліп, жаңа мекеме басшысы осы істі бастауға қолдау көрсеткен аудан әкімі Серік Зинабекұлына ризашылығын жеткізіп, ауыл тұрғындарына сүттерін орталыққа өткізуге өтініш білдірді. «Бүгінгі күні төрт адамды жұмыспен қамтысақ, өндіріс көлемі толық қуатында жұмыс істеген шақта еңбек күшін он адамға арттыруды жоспарлап отырмыз»,- дейді кәсіпкер.
Жаңа нысанның лентасы қиылып, келген қонақтар сүт өңдеудегі жаңа технологиялармен танысып, қолға алынған істің жемісті жүргізілуіне тілектес ниеттерін жеткізіп жатты.
Міне, халықтың денсаулығы мен өмір сүру деңгейіне қажетті азық сүт өнеркәсібі халық шаруашылығының маңызды саласы, сондықтан сүт және сүт өнімдерін өндіру тиімділігі азық-түлік негізі ретінде күнделікті сұранысқа ие және кез келген нарықта тұрақты орын алады. Үржар ауданында осы бір аса бағалы табиғи тағамды қабылдау ісі қолға алынғандығы тұрғындарды қуантып тастады.
Бауыржан ЖАҚЫП,
«Семей таңы»
