Жаңа жыл — әсіресе балалар үшін асыға күтетін мереке. Мерекелік қойылыммен өріліп, түрлі сый-сияпаттармен толығатын дәстүрлі шырша тойы биыл да ерекше мағынада өтті. Апта сейсенбісінде шаһарымыздағы Балалар мен жастардың шығармашылық сарайында қала әкімінің жаңа жылдық шыршасы ұйымдастырылып, барша баланы қызық-қуанышқа кенелтті.
Аталмыш шараға ата-ана қамқорлығынсыз қалған, аз қамтылған және көпбалалы отбасылардың балалары шақырылыпты. Көңілді өрбіген мерекеге қала және ауыл мектептерінен 200 бала жиналған екен. Түрлі ертегі кейіпкерлерінің бейнесіндегі жаңа жылдық костюмдер киген балақайлар алдында кең сахнада мерекелік қойылым шымылдық түрді.
Шырша тойының елеулі бір сәті Қазақстан Республикасының Президенті Нұрсұлтан Назарбаевтың балаларға арнап айтқан жаңа жылдық құттықтауы болды. Сахна төріндегі үлкен экраннан көрсетілген Елбасы құттықтауының бейнежазбасында осынау мерекенің негізгі мәні жайында айтыла келе, балаларға арналған сый-сияпаттың да мол екендігі айтылады. Расында да, осынау шара барысында мерекелік салтанатқа жинал- ған барша балаға қысқы және спорттық үлгідегі киімдер, тәтті сыйлықтар үлестірілді.
Осыдан соң мерекелік шараның негізгі бөлімі бастау алды. Атап айтсақ, Балалар мен жастардың шығармашылық сарайы қызметкерлері мен ондағы өнерпаздар үйірмесінің тәрбиеленушілері әзірлеген «Жібек жолы» атты жаңа жылдық сазды қойылым орын алды.
Ақша қар мен Қыс ханшайымы, Нұр бала сынды мифтік кейіпкерлер жиналған балалардың көңілін серпілтті.
Әкім шыршасы әртүрлі кейіпкерлер қатысқан музыкалық композициямен өріліп, думанға айналды. Сахна төрінде әсем әндер айтылып, көз тартар көрініске толы қойылымдар орындалды. Думанға қатысушылардың барлығы да халықаралық, республикалық, облыстық байқаулардың жеңімпаздары екенін айта кеткен жөн.
Семей қалалық білім бөлімі берген ақпаратқа сүйенсек, өңірге қарасты Абыралы өңірінде де Жаңа жылдық шырша өткізіліп, қала әкімінің атынан 100 балаға сыйлық үлестіріліпті. Осы орайда биылғы шырша мерекесі жайлы тоқтала кеткен жөн. Осыған дейін облыс орталығы Өскемен қаласында Қазақстан Республикасы Президентінің шыршасы ұйымдастырылып, оған қаламыздағы жалпы білім беретін мектептердің ең үздік оқитын 16 оқушысы қатысыпты. Ал облыс әкімінің шыршасына Семейден 8 оқушы барып қайтқан екен.
Ыстық ықылас, жылы пейіл, көл-көсір қуанышқа толы әкім шыршасының барша балақайға ерекше шаттық сыйлағаны анық.
«СТ – ақпарат»
