Желтоқсанның 28-де, қалалық Мәдениет сарайында жастар форумы болып өтті. Шараны ұйымдастыруға қалалық ішкі саясат бөлімі, ШҚО-ның «Қазақстан студенттер льянсы» өкілдігі, «Қазақстан жастарын қолдау» облыстық жастар қоғамдық бірлестігі және «Жас Отан» жастар қанаты бастамашы болыпты. Форум Қазақ хандығының 550 жылдығына арналып ұйымдастырылды. Салтанатты жиынға шаһар басшысы Ермак Сәлімов пен танымал жазушы, драматург, жерлесіміз Роллан Сейсенбаев қатысты.
Форумның мақсаты өңірімізде жастар саясатын жүзеге асыруға атсалысып жүрген әр саланың үздіктерін анықтау болатын. Салтанатты басқосудың ашылуында көпшілік алдына шыққан қала әкімі Ермак Бидахметұлы елімізде жастардың болашағы үшін көптеген бастамалар іске асып жатқанын айта келе, тәуелсіз Қазақстанның келешегі үшін жаңа толқынды аянбай еңбек етуге шақырды.
— Құрметті жастар! Бүгін біз, жылдағы дәстүрге сай, жастар форумында кездесіп отырмыз. Баршаңызды осы жиынның ашылуымен шын жүректен құттықтаймын. Елбасымыз биылғы жылғы Қазақстан халқына арнаған Жолдауында жастарды білімді, еңбекқор, бастамашыл әрі белсенді болуға үндеді. Ел ертеңінің жарқын болуын қаласақ, сіздер, мемлекетіміздің жас тұрғындары, қажырлы еңбек етулеріңіз қажет. Бүгінде қазақ жастары ел Тәуелсіздігімен бірге есейіп келеді. Елбасының жаңа толқынға деген қамқорлығы айрықша екені белгілі. Қаламызда 100 мыңнан аса жас бар екен. Олардың дені ірі және шағын кәсіпорындар мен мекемелерде, денсаулық, білім, мәдениет, спорт пен құқық қорғау салаларында қызмет етуде. Сонымен қатар тең жартысы қаладағы жоғарғы және орта оқу орындарында білім кенін игеріп жатыр. Алдағы уақытта да сіздерге қазақ елі үшін маңызды тапсырмалар жүктелетін болады. Сол сәтте мүдірмей, батыл шешім қабылдауға бүгіннен дағдыланғандарыңыз абзал. Қазіргі күні Тәуелсіз мемлекетімізде сіздердің мүмкіндіктеріңізді арттыру мақсатында барлық жағдай жан-жақты қарастырылған. Сол себепті ел үмітін абыроймен ақтауға бар күш-жігерлеріңізді салуға тырысыңыздар. Сіздерге зор денсаулық тілеймін. Келе жатқан Жаңа жыл мейрамы құт-берекелі болсын,- деді өз құттықтауында қала әкімі.
Сондай-ақ семейлік жастарға белгілі қоғам қайраткері, жазушы Роллан Сейсенбаев та өзінің ақ жарма тілегін арнады. Танымал драматург өз сөзінде жас буынға Семей Алаштың рухани астанасы екенін айта келе, ұлттық құндылықтарды ұлықтап, қадірлей білуге шақырды.
Форум барысында қала басшысы мен мәртебелі мейман шаһарымыздың қоғамдық және әлеуметтік өміріне белсенді араласып, ерекше көзге түскен бірқатар азаматтарды марапаттап өтті. Атап айтсақ, «Жас ерікті» аталымы бойынша қала әкімінің жүлдесі «Город F» порталының жетекшісі Жасұлан Құрманғалиев пен жас суретші Мұхтар Сапаровқа бұйырды. Ал «Қазақстан-Семей» телеарнасының тілшісі Виктория Донковцева жылдың «Жас журналисі» номинациясы бойынша үздік деп танылды. Бұдан бөлек «Жас кәсіпқой» аталымы бойынша қаладағы облыстық Абай атындағы мемлекеттік қазақ музыкалы-драма театрының әртісі Әсел Нұрланова жеңімпаз атанды.
Ресми шаралардан соң салтанатты кеш мерекелік концертпен жалғасын тапты.
Жақсылық СҮЛЕЙМЕН,
«Семей таңы»
