Жыл өткен сайын Семей қаласының денсаулық сақтау саласы жоғары қарқында дамып келе жатқанын білеміз. Әлбетте, осы сала Семейдің негізгі бренді деп те айтылады. Әрине, бұл соңғы үлгімен жабдықталған заманауи қондырғылар, жоғары білімді мамандар, медицина саласына сапалы кадр дайындау және жаңа емханалардың ашылуымен тікелей байланысты екені анық. Міне, жетекші саналатын саланың сапасын арттыру һәм тұрғындарға жедел медициналық көмек көрсету мақсатында 28 желтоқсан, дүйсенбі күні Семейде жедел медициналық жәрдем станциясы салтанатты түрде ашылды. Жаңа денсаулық сақтау мекемесінің ашылуына Семей қаласының әкімі Ермак Сәлімов қатысты.
Жаңа жедел медициналық жәрдем станциясы «Саламатты Қазақстан» мемлекеттік бағдарламасы аясында іске қосылды. Құрылыс жұмыстары 2013 жылы басталған болатын. Жобаның жалпы құны 1 млрд. 538 млн. 278 мың теңгені құрап отыр. Мұнда әлемдік стандарттарға сәйкес соңғы үлгідегі құрылғылар пайдаланылады. Олардың қатарына КИ-3М кислородты ингалятор, ДКИ-Н-10 дефибриллятор-мониторы, Альтон-103 үлгісіндегі ЭК12Т электрокардиографы сынды заманауи аппараттарды жатқызуға болады. Бүгінде Семей қаласы тұрғындарының саны 350 мыңнан асып жығылады. Сондықтан жаңадан ашылған жедел жәрдем станциясы тұрғындарға дер кезінде шұғыл көмек көрсету бағытында жұмыс жасайтын болады. Бұл өз кезегінде ақ халаттылардың жұмысын оңтайландырып, қызмет көрсету сапасын арттыра түсетіні анық. Жедел жәрдем станциясының ғимараты үш корпустан тұрады. Мұнда диспетчерлік қызметке навигациялық жүйемен жабдықталған кең жайлы орын қарастырылған екен. Бұған қоса ұжым қызметкерлеріне де барлық жағдай талапқа сай жасалған. Ал түрлі жиын, басқосуларды өткізуге арналған конференц-залдың сыйымдылығы 150 адамға шақталыпты. Тұсауы кесілген медициналық мекеменің ашылуында сөз алған Семей қаласының әкімі Ермак Сәлімов Жаңа жыл қарсаңында жаңа нысанның пайдалануға берілуі қалалықтар үшін айтулы оқиға екеніне тоқталып, адам өміріне арашашы ақ желең жандардың жұмысына ақ жол тіледі.
— Құрметті жерлестер! Міне, көптен күткен жедел медициналық жәрдем станциясының ресми түрде ашылуына қатысып отырмыз. Бұл — жыл соңында орын алған елеулі оқиғалардың бірі. Осы жаңа жедел медициналық жәрдем станциясының өңіріміздегі денсаулық сақтау саласындағы көптеген түйткілді мәселелерді шешуге септігін тигізетіні анық. Тек осы желтоқсан айының өзінде біз қала көлемінде бірнеше әлеуметтік нысандарды ашып, пайдалануға бердік. Мәселен 2015 жылы 13-ке тарта балабақша халық игілігіне берілді. Жедел медициналық жәрдем станциясының ашылуы соның заңды жалғасы іспетті. Осынау жауапты мамандық жолында қызметтеріңіз адал, кәсіптеріңіз оңды болсын деген тілек білдіремін. Келер 2016 жылы да осы бағыттағы жұмыстар жалғасын тауып, шаһарымызда жаңа жобалар сәтті жүзеге асатындығына кәміл сеніммен қараймыз. Осы сәтті пайдаланып, келе жатқан Жаңа жылмен баршаларыңызды құттықтаймын. Әр шаңырақта береке-бірлік, молшылық болсын,- деп жылы ниетін білдірді Ермак Бидахметұлы.
Медицина саласында ұзақ жылдар еңбек еткен ардагер Елена Батенькова барша әріптестерінің атынан атқарушы билік өкілдеріне алғысын жеткізді. Осылайша, табалдырықтан аттайтын Мешін жылына санаулы күндер қалғанда, Семей қаласы тағы бір медициналық мекемемен толықты.
Жақсылық МҰРАТҚАЛИҰЛЫ,
«Семей таңы»
