Кеше, қаңтардың 7-ші жұлдызында еліміздің православтық сенімдегі христиандары Иса мәуліті (рождество Христово) діни мерекесін атап өтті. Бұл күні таң алагеуімде қала жұртшылығы Воскресенск шіркеуіне жиналып, құдайға құлшылық ету рәсіміне қатысты. Дәстүрлі орыс православ шіркеуі бойынша ең ұлық мереке саналатын бұл мейрам күнтізбе бойынша да қызылмен белгіленген. Осы ретте атаулы күнге орай қала әкімі Ермак Сәлімов құлшылық үйінде ұйымдастырылған діни шараға келіп, жиналған көпшілікті ресми билік атынан арнайы құттықтады.
Ғибадатханадағы қауым алдында Семей қаласының әкімі Ермак Сәлімов арнайы құттықтау тілек айтты. Өз сөзінде жұртшылыққа бақытты өмір, елімізге бейбітшілік пен өркендеу жолындағы жасампазжығы жалғасын тауып, ғасырлар бойы халықтың рухани тірегі болып келе жатқан православтық нанымның ел азаматтарының ертеңгі күнге деген сенімін нығайтуға қосқан үлесіне тоқталып өтті. Қоғамдағы сыйластық, түсіністік пен татулыққа тұтқа бола білген дәстүрлі конфессия елімізде маңызды идеологиялық мәнге ие. Бұл ретте Елбасы, Ұлт Көшбасшысы Нұрсұлтан Назарбаевтың Қазақстан халқының бірлігін бекемдеу жолындағы саясатына ел православтары да елеулі түрде үлес қосып келеді. Осы тарапта ілтипатты пікір білдірген Ермак Бидахметұлы: — Қазақстанның Тәуелсіздік жылдарында ортақ шаңырағымыз – Отанымызда ұлтаралық, конфессияаралық келісімнің өзіндік озық үлгісі қалыптасты. Отбасы құндылықтарын сақтау, мемлекетке қызмет ету, өзара мейірімділік танытып, төзімділік пен сыйластықта болу сынды ізгі қасиеттер баға жетпес қазынамыз болып қалыптасты. Осы ретте еліміздегі азаматтық қоғамның нығаюына, ішкі татулық пен тұрақтылықтың арта түсуіне діни конфессиялардың да сіңірген рөлі аз емес. Әсіресе, орыс православ шіркеуінің өскелең буынды адамгершілікке, аға толқынға құрметпен қарап, тарихи-мәдени мұраларымызды қадірлеуге баулудағы үлесі еселі. Ал толеранттылық, конфессияаралық келісімді нығайту – біз үшін Елбасы атап көрсеткен «Нұрлы жол», 5 институционалдық реформа,ны жүзеге асыруға бағытталған Ұл жоспары — «100 нақты қадам» сынды жүзеге асыруға негіз бола алады, — деп атап өте келе, барша адамзатты мейірімділікке шақыратын осынау мерекемен құттықтады. Сондай-ақ Воскресенск шіркеуінің дінбасшысы Федор Проскуринге «Қазақ халқының салт-дәстүрлері» атты танымдық энциклопедиялық жинақ кітабын естелік ретінде сыйға тартты.
Айта кетейік, бұл күні әлемдегі тәрізді еліміздегі миллиондаған православтықтар да Тәураттың екінші бөлімі – Жаңа өсиет жазбаларында айтылатын Тәңірінің рухани ұлы, назареттік Мәриямұлы Иса өмірге келген кездегі орын алған таңғажайып құбылыстарды, оның даңқты өмірбаянын еске алады. Осы ретте Воскресенск шіркеуінің настоятелі Федор Иса мәулітінің шынайы мазмұны жайлы айта келе, Астана және Қазақстан митрополиті Александрдың, Өскемен және Семей епархиясының епископы Амфилохийдың мерекелік құттықтау лебізін де жеткізді. Дін басы сондай-ақ шіркеуге жиналған мәсіхші қауым үшін айрықша мереке Иса мәулітімен құттықтап өтті.
Осылайша дін қызметкері бата беру рәсімін жасағаннан кейін, мерекелік құдайға құлшылық ету рәсімі басталып кетті.
Православтықтар ғибадаты негізінен Інжіл жазбаларына сәйкес, дұғаларды әндетіп қайталаумен, құдайға мадақ сөздер айтумен ерекшеленеді. Сондай-ақ, қасиетті Мәриям ана мен оның ұлына, киелі рух пен құдай жолында азап шеккен шіркеу әулиелерінің құрметіне орай шырақ жағу діни жоралғысы орындалады. Ал ғибадат үйіндегі құлшылық ету рәсімінен соң жалпы көпшілік үшін нағыз мереке басталады.
Сөз соңында айта кетейік, көп конфессиялы елімізде православтық христиандардың үлес салмағы Ислам дінін ұстанушылардан кейін екінші орында тұр екен. Бүгінде республика халқының 26 пайызы орыс және өзге де славян тектес халықтар үшін дәстүрлі саналатын осы конфессияны ұстанады. Яғни, Тәуелсіз Қазақстанның іргетасын нықтап, мәдени-рухани тұрғыда дамуына, ішкі тұрақтылықтың нығаюына қазақ жерінде соңғы үш ғасырдан бері халқымызбен бірге жасасып келе жатқан православие сенімінің де елеулі үлесі бар деген сөз.
Қуаныш ҚОЖАЕВ, «Семей таңы»
