Наурыздың 20 күні өткен Қазақстан Республикасы Парламенті Мәжілісі мен деңгейлік мәслихаттар сайлауы еліміз үшін маңызы зор саяси науқан болғаны анық. Қазіргі қалыптасқан жаһандық күрделі экономикалық ахуалда депутаттар құрамы қайта жасақталып, еліміз үшін жаңғырып, жаңаруға бастар шараларға ұйытқы болуы ләзім. Бұл ретте облыстық мәслихат депутаттығына үміткер ретінде тіркеліп, сайлаушылардың сеніміне үміт арттым. Сайлауалды үгіт-насихат кезінде өзім саяси додаға түсіп жатқан округ бойынша дауыс берушілермен кездесулер өткізіп, бағдарламамның басымдықтарымен таныстырғаным көпшіліктің жадында болар. Осы орайда өңірімізді әлеуметтік-экономикалық һәм өзге де салалар бойынша өркендету жолындағы жоспарларыма қолдау білдіріп, сенім артып дауыс берген электорат саны мол болды. Ел сеніміне енудің өзі бір бақыт. Ал оны ойдағыдай орындау — басты мұрат. Сол елдің перзенті үшін де абыройлы борыш екені анық. Осынау сында қолдап, ел ертеңіне селқос қарамай сайлау учаскелеріне келген және менің кандидатурам үшін дауыс берген барша тұрғындарға зор алғысымды білдіремін. Біз бірлескенде үлкен күшпіз. Өңірімізді өркендету жолында атқарушы билікпен бірлесіп атқарар алдағы меже ауқымды. Бұл жолда сіздердің сенімдеріңізден шығуға тырысамын. Сенім білдіргендеріңіз үшін алғыс айтамын. Облыстық мәслихаттың алтыншы шақырылымының депутаты ретінде сіздердің мүдделеріңіз жолында қызмет етуге әрдайым әзірмін.
Құрметпен, Риза МОЛДАШЕВА,
№18 сайлау округі бойынша Шығыс Қазақстан облыстық
мәслихатының депутаты.
Құрметті сайлаушылар! 20 наурызда ҚР Парламенті Мәжілісі және мәслихаттар сайлауында, бүкіл қазақстандықтар секілді, семейліктер де өзінің болашағы үшін, елінің ертеңі үшін өз таңдауларын жасады. Бұл – қазақстандықтардың ел ертеңіне деген сенімі. Бұл сайлауда маған сенім артып дауыс бергендеріңіз үшін, өз атымнан, партияластарымның атынан сіздерге зор ризашылық білдіремін. Штаб мүшелеріне, сенімді өкілдерге, еріктілерге, сайлаудың өтуіне үн, күш қосқан барша семейліктерге алғыс айтамын. Қазіргі таңда әр деңгейдегі мәслихат депутаттарының сайлауалды тұғырнамасындағы сайлаушыларға берген уәделерін орындауға барлық мүмкіндіктер бар. Сондықтан баршамыз «Нұр Отан» партиясының төрағасы, Ұлт Көшбасшысы Нұрсұлтан Әбішұлы Назарбаевтың саясатын бір кісідей қолдай отырып, елімізді өркендетуге, Тәуелсіздігімізді баянды етуге күш жұмсайық!
Ізгі ниетпен, Дариға ДАЙРОВА,
№24 сайлау округі бойынша Семей қалалық мәслихатының депутаты.
Құрметті сайлаушылар! Баршаларыңызға ҚР Парламенті Мәжілісі және деңгейлік мәслихаттар сайлауында белсенділік танытқандарыңыз үшін, менің кандидатурамды қолдап дауыс бергендеріңіз үшін зор алғысымды білдіремін. Депутаттық мандат – сайлаушының үміті мен сенімі. Оны адал қызметпен ақтай білу парыз.
Қазіргі таңда, Қазақстан Республикасының азаматы ретінде, сіздер үміт артқан депутат ретінде, алға қойған мақсаттарды еңсеру жолында күш-жігерімді жұмсауға дайынмын. Міндетіміз айқын, меже белгіленген. Бүгінде еліміз барша әлемге танылып, аз ғана уақыт ішінде ауқымды жетістіктерге жетті. Осы жолғы сайлауда да Мәңгілік Ел болуға деген ұмтылысымызды әлемге көрсетіп, дәлелдеп, ұйымшылдықпен дауыс бердік. Мұның барлығын жас ұрпақтың ертеңі, болашағы, бақыты үшін жасалынып жатқан қадамдар деп санаймын. Осынау жолда қажымай-талмай қызмет ету азаматтық парызым болмақ. Алдағы уақытта Ұлы Даланың жарқын болашағы үшін талмай еңбек етіп, Тәуелсіздігіміздің баяндылығы жолында азаматтық борышымды адал атқарамын деген сенімдемін!
Ілтипатпен, Андрей АЛТАЙБАЕВ,
№18 сайлау округі бойынша Семей қалалық мәслихатының депутаты.
