Жуырда Үржар ауданында YI шақырылған аудандық мәслихаттың бірінші сессиясы болып өтті. Басқосу барысында бірқатар мәселелер қаралып, сарапқа салынды. Сессияға аудан әкімі Серік Зайнулдин, аудан әкімінің орынбасарлары, жаңадан сайланған облыстық мәслихат депутаттары, аудандық мәслихаттың V шақырылымының депутаттары, мемлекеттік мекеме басшылары мен баспасөз өкілдері қатысты.
Жиынды аумақтық сайлау комиссиясының төрағасы Абзалхан Жұматаев алғы сөзбен ашып, 20 наурызда өткен сайлаудың қорытындылары туралы кең көлемде хабарлама жасады.
— Ел аманатын арқалап, мандатқа ие болған депутаттардың барлығы да жоғары білімді. Сапа құрамы жағынан Үржар аудандық мәслихатының депутаттығына кәсіпкерлер, интеллигенция өкілдері сайланды,- дей келе, Абзалхан Мұхаметқанұлы, сайланған депутаттарға салтанатты түрде депутаттық куәліктер мен төсбелгілерін тапсырды. Содан соң еліміз үшін аса маңызды саяси науқанның сәтті аяқталуымен, жеңістерімен құттықтап, алдағы жұмыстарына табыстар тіледі.
VI шақырылған депутаттардың бірінші сессиясының күн тәртібіне ұйымдастыру жұмыстары, I сессиясының регламенті, жұмысшы тобының құрамы, тұрақты комиссияларын құру туралы, Үржар аудандық мәслихатының хатшысын сайлау туралы мәселелер енгізілген екен.
Осы жолғы сессияда №3 Жаңа тілек сайлау округінің депутаты Айдын Саматеев төраға болып сайланып, сессияны жүргізіп отырды. Сондай-ақ ашық дауысқа салумен VI шақырылған Үржар аудандық мәслихатының хатшысы болып №10 Көлденең сайлау округінің депутаты Қалембек Бақтығазыұлы Қарашев сайланды. Жаңа хатшы өз кезегінде әріптестеріне сенім артқандары үшін алғыс білдіріп, ортақ істі атқаруда аянбай жұмыс істейтінін жеткізді.
Келесі кезекте 3 тұрақты комиссия құрылды. Атап айтсақ, депутаттық өкілеттік және этикасы, заңдылық, денсаулықты сақтау, білім беру, мәдениет, жанұяны қорғау, жастар мен мүгедектер мәселелері жөніндегі комиссия; бюджет, әлеуметтік-экономикалық даму, салық, ауыл шаруашылығы және экология мәселелері жөніндегі; еңбек, сауданы дамыту, өндіріс, кәсіпкерлік, коммуналдық-тұрмыстық қызметтер және байланыс жөніндегі комиссиялар құрылды.
Мұнымен қатар сессия жұмысында күн тәртібіндегі 2016 жылға арналған аудан бюджеті туралы аудандық экономика және қаржы бөлімінің басшысы Вален-тина Бойкованың баяндамасы тыңдалды. Сондай-ақ аудандық «Нұр Отан» пар- тиясының депутаттық фракциясы жөнінде сөз қозғалып, басқа да әртүрлі мәселелер қаралды.
Жиын соңында қорытынды сөз аудан әкімі Серік Зинабекұлы Зайнулдинге берілді. Аудан басшысы облыс депутаттарына және аудандық мәслихаттың бұрынғы, яғни Y шақырылымындағы мәслихат хатшысы, ауданның Құрметті азаматы Мұхаметқали Бітімбаев жетекшілік еткен құрамға алғыс айтып, жаңадан сайланған депутаттарға табыстар мен жемісті еңбек тіледі.
— Баршамызды көптеген ауқымды жұмыстар күтіп тұр. Ол – Елбасы реформаларын, «100 нақты қадам» Ұлт жоспарын іске асыру және халықтың әл-ауқатын арттыру. Атқарған жұмыстарымыздың оңды нәтижелерін Қазақстан Республикасы Тәуелсіздігінің 25 жылдығына арнап, депутаттардың қолдауымен білім, денсаулық сақтау, әлеуметтік салаларды қамти отырып, ауыл шаруашылығын дамытайық,- деді аудан басшысы Серік Зайнулдин.
Өткен шақырылымдағы депутаттарға аудан әкімінің алғыс хаттары мен сыйлықтары табыс етілді. Сессия барысында аудандық мәслихаттағы «Нұр Отан» партиясының депутаттық фракциясы құрылып, оның жетекшілігіне депутат Мұхаметқан Молдашұлы Ақпеков сай- ланғаны туралы да хабарланды.
Бауыржан ЖАҚЫП,
«Семей таңы»
