Семей қаласы әкімдігі жанындағы Жастар істері жөніндегі кеңестің кезекті отырысы болып өтті. Кеңес отырысына қала әкімінің орынбасары Надежда Шарова, дербес бөлім басшылары, жастар ұйымдарының өкілдері мен кеңес мүшелері қатысты.
Кеңестің отырысында қала әкімдігі жанындағы Жастар істері жөніндегі кеңестің 2016 жылға арналған жұмыс жоспары талқыланып, басқа да әртүрлі мәселелер қарастырылды. Күн тәртібінде Жастар орталығының жұмыс жоспары мен Қазақстан Республикасы Тәуелсіздігінің 25 жылдығына орай жастар арасында өткізілетін маңызды іс — шаралар туралы, патриоттық тәрбие беруге байланысты мектеп оқушылары арасында атқарылған жұмыстар туралы және салауатты өмір салтын насихаттау, жат қылықтардың алдын алу жұмыстары туралы сұрақтар қаралды.
Күн тәртібіндегі бірінші мәселе бойынша — Жастар орталығының жұмыс жоспары мен Қазақстан Республикасы Тәуелсіздігінің 25 жылдығына орай жастар арасында өткізілетін маңызды іс-шаралар туралы Семей қаласы Жастар орталығының жетекшісі Мұстафа Қожамсеит, мемлекеттік жастар саясатын жүзеге асыру бағдарламасына сәйкес, шаһар бойынша жастардың бос уақытын тиімді ұйымдастыру мақсатында біршама іс-шаралар жүзеге асырылып жатқандығын жеткізді.
— Бүгінгі күнге Жастар орталығының ұйымдастыруымен патриоттық тәрбие беру, ұлтаралық қатынастарды тұрақтандыру, салауатты өмір салтын насихаттау, Елбасы Жолдауында көрсетілген мәселелермен таныстыру мақсатында жастар арасында үнемі түрлі шаралар жүргізілуде,- деп өз ойын ортаға салды Мұстафа Қожамсеит.
Жастар істері жөніндегі кеңес отырысының күн тәртібіндегі екінші мәселесі бойынша — мектеп оқушылары арасында патриоттық тәрбие беруге байланысты атқарылған жұмыстар туралы Семей қаласы білім бөлімінің басшысы Наталья Фесенко мәлімет берді.
Бүгінде елімізде бұқаралық спортты дамыту арқылы дені сау ұлтты қалыптастыру – мемлекеттің басты басымдықтарының бірі. Кеңес отырысында одан әрі жастар арасында салауатты өмір салтын насихаттау, нашақорлықтың, маскүнемдіктің және шылым шегудің алдын алу мәселесі қаралды. Өз кезегінде қаламыздағы наркологиялық диспансер басшысының орынбасары Виктория Онгарова мен «Жастар салауатты өмір салтын қолдайды» қоғамдық бірлестігінің жетекшісі Ерсін Құдияров баяндама жасады.
Жиын соңында қала әкімінің орынбасары Н.Шарова қала әкімдігі жанындағы Жастар істері жөніндегі кеңес отырысын қорытындылап, алдағы уақытта көптеген іс-шаралар өткізілетінін және жастарға әрқашан да қолдау көрсетілетінін айтты. Сондай-ақ қала әкімінің орынбасары кеңес отырысында қаралған мәселелердің бәрі де бүгінгі таңда маңызды екенін атап көрсетті. Тиісті ұйымдарға өз салалары бойынша жұмыстар жүргізуге нақты тапсырмалар берді.
Асан МЫРЗАХАН,
«Семей таңы»
