Жуырда Зайсан ауданында «Ертіс-ТЗ» ЖШС-нің трактор зауытында шығарылған ауыл шаруашылығы саласына арналған техникалардың жәрмеңкесі ұйымдастырылды.
Бүгінде көршілес Қытай Халық Республикасымен арадағы экономикалық және іскерлік байланыстар аясында жүзеге асырылып келе жатқан игілікті істердің нәтижесінде инвестиция мәселесі де оңға басуда. Осы орайда Зайсан ауданы әкімі мен көршілес Қытай Халық Республикасындағы Жеменей ауданы басшылары арасындағы екі жақты байланыс аясында ел игілігін арттыруға бағытталған бірқатар шаралар жалғасын тапқан. Бұл жолғы жәрмеңке де соның айқын дәлелі. Көршілес мемлекеттің инвесторы Ван Чжань Мин Зайсан ауданында трактор және ауыл шаруашылығы құрылғыларын сататын қызмет көрсету орталығын ашу мақсатында «Ертіс трактор зауыты» ЖШС-ін құрып, алғашқы өнімдерін саудаға шығарды. Қос тараптың арасында жасалған меморандум бойынша инвестор 2016-2018 жылдар аралығында 80,0 миллион теңгенің инвестициясын құймақ.
Жәрмеңкеге қатысушыларды аудан әкімі Алмас Аманқолұлы Оңдақанов, Қытай Халық Республикасы Жеменей ауданы партия комитетінің хатшысы Жан Го Хуа құттықтап, екі жақты келісімшарт бойынша алда тұрған мақсатты жұмыстар мен міндеттер туралы айтып берді. Бұл күні ауыл шаруашылығы техникаларының жәрмеңкесіне көршілес Тарбағатай, Көкпекті аудандарының ауыл шаруашылығы саласының мамандары да арнайы келіп, өздеріне қажетті көлік түрлерін сатып алып, тапсырыстар да берді.
— Біз Тарбағатай ауданынан арнайы келіп, жәрмеңкені аралап шықтық. «Жетіарал даму» шаруа қожалығы картоп егетін жабдық сатып алды. Жаңа құрылғылардың бағасы 300 мың теңгеге түсті. Сонымен қатар ауданымыздағы Ақсуат Мәдениет үйінің директоры киіз үйлерді көріп, сатып алуды жоспарлауда,- деді бізге жолыққан Тарбағатай ауданы кәсіпкерлік және ауыл шаруашылығы бөлімінің басшысы Мерей Қайырбеков.
Сондай-ақ Көкпекті ауданы кәсіпкерлік және ауыл шаруашылығы бөлімінің маманы Т.Кисин мен Зайсан ауданы орман шаруашылығы мекемесінің директоры Т.Айтымбетов те жәрмеңке туралы жағымды пікір білдірді. Аталмыш жәрмеңке барысында, картоп егетін техникалармен бірге, «200 Р» маркалы шағын тракторлар, мотоцикл, шөп шабуға және жинауға арнал- ған қосалқы бөлшектер саудаланды. Аталмыш жәрмеңкенің тек Зайсан ауданы үшін ғана емес, облысымыздағы өзге де ауыл шаруашылығы саласы мамандары үшін де берері мол екені анық.
А. ДӘУЛЕТ, Зайсан ауданы.
