Наурыздың 17-26 күндері Риддер қаласында шаңғы жарысынан ел чемпионаты болып өтті. Республикалық біріншіліктің қорытындысында облыс шаңғышылары жалпыкомандалық есепте топ жарды. Бұл жайында сәуірдің 5 күні Семей қалалық Ақпарат орталығында қысқы спорт түрлері бойынша ағымдағы жылғы жетістіктерді қорытындылауға арналған баспасөз мәслихатында айтылды.
Баспасөз мәслихатына шаңғы спорт түрлері бойынша Семей қаласы құрамасының жаттықтырушылары Вячеслав Баядилов, Қайникамал Дүйсенова, биатлон спортынан қала құрамасының жаттықтырушысы Рафаиль Мирсалимов, конькиден жүгіру бойынша қала құрамасының бапкері Ильмира Хамитова, шайбалы хоккейден қала құрамасының жаттықтырушысы Александр Мохер және бірқатар жас спортшылар қатысты. Алғаш болып сөз алған шаңғы спортының жаттықтырушысы Қайникамал Дүйсенова биылғы жыл семейлік спортшылар үшін табысты болғанын айта келе, байрақты бәсекелерде қол жеткізген нәтижелерге тоқталып өтті.
— Биылғы маусым біздің шәкірттеріміз үшін жаман аяқталған жоқ. Әсіресе жасөспірімдеріміз жарады. Темірлан Төлегенов есімді жас өрен республикалық чемпионатта үздіктер қатарынан көрінді. Қазір ол ұлттық құраманың сапына алынып отыр. Сондай-ақ Надиль Хасанов сынды болашағынан зор үміт күттіретін жас дарын бар. Оның да көрсеткіштері бапкерлік құрамның көңілінен шықты. Әсет Дүйсенов есімді спортшымыз еліміздің жастар құрамасының атынан Румынияда өткен Әлем чемпионатына қатысты. Щучинск қаласында өткен ел біріншілігінде біздің спортшылар облыс құрамасының сапында жалпыкомандалық есепте 2-ші орынға қол жеткізді,- деді білікті бапкер Қайникамал Төлеуғазықызы.
Сонымен қатар биылғы маусымды семейлік конькишілер де жақсы нәтижемен аяқтапты. Мәселен, Алматыда ҚР-ның Универсиадасында жерлес спортшы Эльвира Халикова 1500 шақырым қашықтықта үздік үштіктің қатарында болды. Ал Қазақстан чемпионатында жастар арасында сынға түскен Малика Марканова 1-ші орынды иеленген.
— Осы маусымда Эльвира Халикова ҚР спорт шебері атағына қол жеткізді. Дарья Завгороднева соңғы ел біріншілігінде 2 қола және 2 күміс медальді олжалады. Бұл — өте жақсы көрсеткіш. Ересектер сайысында да жүлделі орындардан шет қалған емеспіз. Бүгінде семейлік конькишілер Астана, Алматы және Қостанай спортшыларымен иық тіресе алатын дәрежеде. Кезінде бізді қарсылас ретінде көп ешкім елемейтін. Ал осындай жетістіктерімізден кейін барлығы бізбен санасатын болды. Бұл әуелі жүйелі жұмыс пен балалардың табанды жаттығуының нәтижесі деп білемін. Дегенмен де осымен тоқтап қалу ойымызда жоқ. Семей коньки-шілері әлі де талай белестерді бағындыратынына біз үлкен сеніммен қараймыз,- дейді Ильмира Хамитова.
Ал Ресейдің Сочи қаласында жалауы желбіреген қысқы Олимпиада ойындарында қазақтың көк байрағын алып шыққан Ердос Ахмадиев 2017 жылы Алматыда бастау алатын Дүниежүзілік қысқы Универсиадада ел намысын абыроймен қорғайтынын жеткізді.
— Қазір жаттығу жұмыстарына аса мән беріп отырмыз. Себебі алда үлкен жарыстар бар. Олардың ішінде Алматыда өтетін Универсиаданы айтуға болады. Ол дүбірлі сайысқа семейлік спортшылар да қатысатын болады. Өзім Әлем чемпионатына қатысуды көздеп отырмын,- дейді Ердос Ахмадиев.
Ж. СҮЛЕЙМЕН,
«Семей таңы»
