Апта басында аудандық әкімдіктің мәжіліс залында аудан әкімі Серік Зайнулдиннің төрағалығымен аппараттық кеңес отырысы болып өтті. Жиынға аудандық мәслихат хатшысы Қалембек Қарашев, аудан әкімінің орынбасарлары, мекемелер мен бөлімдер басшылары қатысты.
Кеңес отырысында төрт мәселе қаралған болатын. Атап айтқанда, аудан бойынша көктемгі егістік науқанына даярлық, су тасқынының алдын алу шаралары, елдімекендерді көркейту, санитарлық екі айлық тазалық және ағымдағы жылдың екінші жарты жылдығы бойынша баспасөзге жазылу ісі қаралды.
Жиын беташарында кіріспе сөз алған аудан әкімінің орынбасары Ж.Байсабыров Үржар ауданы бойынша 2016 жылы егілетін көктемгі егістік науқаны жөнінде хабарлама жасады. Биылғы жыртылатын жер 183 мың 901 гектар болады деп жоспарлануда. Ағымдағы жылдың наурыз айында аудан әкімінің тапсырмасына сәйкес бекітілген кесте бойынша екі топ құрылып, аудан әкімінің екі орынбасарының басшылығымен ауыл шаруашылығы және ветеринария бөлімдері мамандарымен ауылдық округтерді аралап, жерді тиімді пайдалану, тұқым, субсидия және ветеринария мәселелері бойынша шаруа қожалықтарымен түсіндірме жұмыстары жүргізіліп, жиналыстар өткізілді. Биылғы жылы ауданда нөлдік технология бойынша 14402 гектар жер өңделсе, ылғал жабу 96952 гектарға жүргізілмек. Аудан көлемінде тұқым шаруашылығында «Юбилейный», «БақТұр» ЖШС және «Некрасовка и К» шаруа қожалығы жаздық, күздік арпа, соя, күнбағыс және көп жылдық шөптесін өсімдіктердің тұқымын өндірумен айналысады.
– Ағымдағы жылы жердің құнарлылығын арттырып, жоғары өнім алу мақсатында 2038 тонна минералды тыңайтқыштар сатып алуға және арамшөптермен күрес жүргізу үшін әртүрлі гербицидтер алуға ауылшаруашылық құрылымдары өтінім білдіріп, тыңайтқыш өндіретін зауыттармен келісімшарт жасалды,- деп атап өткен Жарқынбек Борашұлы көктемгі егістікке ауылшаруашылық техникалары мен жанар-жағармайдың даяр екендігін жеткізді. – Ал күн тәртібіндегі екінші мәселе, яғни су тасқынына қарсы атқарылатын шаралар бойынша, ағымдағы жылдың 23 ақпанында шыққан ауданның көктемгі кезеңдегі су тасқынына қарсы бекітілген іс-шаралар жоспарына сәйкес, аудан әкімі Серік Зинабекұлының тапсырмасы негізінде жұмыстар жүргізілуде, — деді Ж.Байсабыров. — Аудан бойынша екі су қоймасы, жеті гидротехникалық су тораптары бар. Бүгінгі күні барлық су тораптарында судың деңгейі қалыпты, жолдары ашық, кезекшілік ұйымдастырылған, байланыс жүйесі бар. Аудан бойынша су тасқыны кезінде төтенше жағдайлардың алдын алу және ескерту жұмыстарын жүргізу жөніндегі аудандық төтенше жағдайлар комиссиясымен бірлескен жиындар өтті. Өңіріміздегі жазықтықтағы қар толықтай еріді, таудағы қардың биіктігі бүгінде 80 см-ді құрап отыр. Алайда өзендердегі судың деңгейінің көтерілгені байқалады. Ауданның барлық ауылдық округтерінде 16 мың қап дайындалған. Сонымен қатар төтенше жағдайлардың алдын алу барысында аудан кәсіпкерлерімен арнайы техника, дәрі-дәрмек, жанар-жағармаймен қамтамасыз ету жөнінде 25 келісімшарт жасалды. Бір сөзбен айтқанда, ауданымызда жағдай қалыпты,- деді өз сөзінде аудан әкімінің орынбасары.
Осы орайда аудан әкімі Серік Зайнулдин әр ауылдық округтерде қажетті мөлшерде инертті материалдарды дайындауды міндеттеді. Сонымен қатар арнайы тізім жасалынып, екі мобильді топ құрылсын деген тапсырма берді.
Келесі мәселе — тазалық, көркейту — көгалдандыру жөнінде Үржар ауданы сәулет, құрылыс, тұрғын үй – коммуналдық шаруашылығы, жолаушылар көлігі және автомобиль жолдары бөлімінің сектор меңгерушісі Солтанғазы Елемесов аудан бойынша 122 жобаны іске асыруға бюджеттен 600 млн. теңге қаржы қарастырылғанын айтты. Ағымдағы жылы жалпы сипаттағы трансферттер есебінен өңірлерді дамыту бағдарламасы аясында 200 млн. теңге қаржы көркейту жұмыстарына қарасырылған, ал аудан бюджетінен 46 млн. теңге көгалдандыру шарасына бөлінбек. Сондай-ақ, аудан әкімі Серік Зинабекұлының арнайы тапсырмасына сәйкес, ауданға қарасты 27 ауылдық округтер арасында «Туған жерге тағзым» акциясы аясында және абаттандыру, гүлдендіру һәм санитарлық тазалық жұмыс-тары бойынша бәйге жарияланып, үздік шыққандар жергілікті бюджет есебінен ақшалай марапатталмақ.
Сонымен қатар күн тәртібіндегі соңғы мәселе бойынша аудан басшысы 2016 жылдың екінші жартысына облыстық және аудандық баспасөзге жазылу мәселесі тұрғысында сөз қозғап, мерзімдік басылымдарға уақытында жазылу жайын нақтылап өтті.
Бауыржан ЖАҚЫП,
«Семей таңы»
