«Ертіс» спорт кешенінде қазақ күресінен облыстық «Шығыс барысы» турнирі өтті. Жазда Астана қаласында ұйымдастырылатын Елбасы Н.Ә.Назарбаевтың жүлдесіне арналған республикалық «Қазақстан барысы» турнирінде шығыстың намысын қорғайтын қос балуанды анықтау мақсатында өткен «Шығыс барысы» жанкүйерлердің көңілінен шықты.
Жарыстың ашылу салтанатына «Нұр Отан» партиясы ШҚО филиалы төрағасының бірінші орынбасары Әнуарбек Мұхтарханов, қазақ күресінен ҚР-ның мемлекеттік бапкері, КСРО-ның және ҚР-ның еңбек сіңірген жаттықтырушысы Марат Жақыт, сондай-ақ бірқатар спорт ардагерлері мен қаланың зиялы қауым өкілдері жиналды. Биыл аймақтық іріктеу сайысына облыстан 30-ға тарта палуан қатысуға ниет білдіріпті. Олардың арасында, республикалық турнирлермен қатар, халықаралық сындарда ел абыройын лайықты қорғап жүрген спортшылар да болды. Турнирдің ашылуында сөз алған «Нұр Отан» партиясы ШҚО филиалы төрағасының бірінші орынбасары Әнуарбек Мұхтарханов балуандарға сәттілік тілей отырып, биылғы «Қазақстан барысында» жерлес саңлақтар облыстың мәртебесін тағы бір мәрте биіктететініне сеніммен қарайтынын жеткізді.
— Қайырлы күн, құрметті қонақтар, турнирге қатысушылар! «Нұр Отан» партиясы қызметінің негізгі бағыттарының бірі жастардың денсаулығын нығайтып, салауатты өмір салтын насихаттау және спортты өркендету болып табылады. Осы мақсатта партия Төрағасы, ҚР Президенті Н.Ә.Назарбаевтың жүлдесіне тігілген «Қазақстан барысы» қазақ күресі турнирі жыл сайын ұйымдастырылып келеді. Ұлт денсаулығын нығайтып, жастарды спортқа баулу арқылы ұлттық күрестің танымалдылығын арттыруға бағытталған «Қазақстан барысы» турнирінің іріктеу кезеңдері облысымыздың барлық аудандары мен қалаларында ұйымдастырылып, оған 5 мыңнан астам жастар қатысты. Бүгінгі турнирдің ақтық кезеңі киелі Семей жерінде ұйымдастырылып отыр. Әрбір ауданның намысын қорғап келіп отырған спортшыларға тек қана сәттілік тілеймін,- деді Әнуарбек Мұхтарханұлы.
Ал КСРО және ҚР-ның еңбек сіңірген жаттықтырушысы Марат Жақыт бес жыл бойы өткізіліп келе жатқан «Қазақстан барысы» жобасының маңыздылығына тоқтала келе, оның бас жүлдесі 2 жыл қатарынан семейліктердің қанжығасына бұйырғаны тектен-тек емес екендігін айрықша атап өтті.
— Қымбатты Семей қаласының тұрғындары және шаһар қонақтары! Сіздерді ҚР Мәдениет және спорт министрлігі Спорт және дене шынықтыру істері комитеті мен ҚР Қазақ күресі Федерациясы атынан биыл 6-шы жыл қатарынан ұйымдастырылып отырған Елбасы жүлдесіне арналған «Қазақстан барысы» турнирінің аймақтық іріктеу чемпионатының ашылуымен құттықтаймын. Еліміздің осы шығыс өңірінде күрес түрлері жақсы дамығаны баршаға аян. Бір ғана Дәулет Тұрлыханов грек-рим күресінен КСРО біріншілігін 8 рет бағындырған. Оның жеткен жетістіктерін тоқтамай айта беруге болады. Бүгінде Шығыс Қазақстанда Дәулеттің жеңісті жолын жалғаған спортшылар жоқ емес. Олардың бірқатары биылғы жазғы Олимпиада ойындарында ел намысын қорғамақ. Ал ағымдағы «Қазақстан барысы» турнирінің ақтық мәресінде шығыс өңірінің толағайлары жеңімпаздар қатарынан көрінеті-ніне біз еш күмән келтірмейміз,- деді Марат Нұрмұхамедұлы.
Боз кілемде өрбіген белдесулерге келер болсақ, барлық 30-ға жуық палуан ақтық сынға шығу үшін жан алысып, жан берісті.Ал финалда Айбек Нұғымаров пен Мұхит Тұрсынов кездесті. Бір-бірінің қыр-сырын жақсы білетін қос балуан негізгі уақытта бірін – бірі ала алмай, қосымша белдесу сайысында жеңімпаздың есімін анықтауға тура келді. Оның нәтижесінде Айбектің айы оңынан туып, мерейі үстем болды. Дегенмен де 2-ші орынға қол жеткізген Мұхит та ақтық турнирге жолдама алғанын айта кету керек. Ал үздік үштікті Аягөз ауданының спортшысы Асхат Құсайынов қорытындылады. Ол қола жүлде сарапқа салынған күресте өскемендік қарсыласынан айласын асыра білді. Сондай-ақ турнирде аягөздік Дәурен Нұралинов есімді жас балуан спортсүйер қауымның зор қошеметіне бөленді. Білікті спорт майталмандары Дәуреннен келешекте Олимп шыңын бағындыратын балуан шығатынына бек сенімді.
Жақсылық МҰРАТҚАЛИҰЛЫ,
«Семей таңы»
