Семей шаһарында қалалық Қазақ тілі қоғамының кезекті құрылтайы болып өтті. Ұйымдастырылған аталмыш басқосуға қалалық әкімдіктің бөлім басшылары, білім ордалары мен мәдени нысандар жетекшілері, студенттер, қалалық мәслихат депутаттары, зиялы қауым өкілдері жиналды.
Алғашқы сөз кезегі қала әкімінің орынбасары Надежда Шароваға берілді.
— Қазақстан халқының бірлігінің басты айғағы болып табылатын мемлекеттік тілдің бүгінгі таңдағы қоғамдық өмірімізде маңыздылығы айтарлықтай зор. Тәуелсіздігіміздің 25 жылдығы қарсаңында өткізіліп отырған бұл жиынды болашақта атқарылатын іргелі шаралардың бастамасы деп білгеніміз жөн. Жалпы, мемлекеттілігіміздің негізі болып табылатын қазақ тілін дамыту Елбасы атап көрсеткен басымдықтарға негізделеді,- деп атап өткен Надежда Васильевна аталмыш шарада тек тілдің қолданылу аясын айғақтап қана қоймай, сонымен қатар егемендік жылдарындағы жетістіктермен қатар өру қажеттігін де атап өтті.
Жиын барысында регламент сақталып, әрбір баяндама жасаушыға 15 минуттан, ал сөз алып пікір білдірушілерге 5 минуттан уақыт берілді. Осыдан кейінгі баяндама кезегі қалалық мәдениет және тілдерді дамыту бөлімінің басшысы Берік Көпбаевқа беріліп, бөлім басшысы Семей қаласындағы Қазақстан Республикасының тілдерді дамыту мен қолдану туралы 2011-2020 жылдарға арналған мемлекеттік бағдарламасының аясындағы атқарылған жұмыстар жөнінде жан-жақты мағлұмат беріп өтті.
— Қазақ тілінің мәселесі кешегі күні де маңызды болатын. Өзектілігі қазіргі таңда да өз мәнін жойғаны жоқ. Бұл ретте еліміздің тіл туралы заңы және Үкіметіміз қабылдаған 2020 жылдарға дейінгі арналған арнайы бағдарламасы бар. Соған сәйкес, қолданыстағы қазақ тілінің аясын кеңейтуге ерекше басымдық берілген. Қазіргі таңда осы бағытта бірқатар ілкімді жұмыстар жасалынып жатыр,- деп атап өткен бөлім басшысы қазақ тілінің қолданылу аясын кеңейту жөніндегі шараларға кеңінен тоқталып өтті. Берік Көпбайұлы атап өткендей, Тілдерді дамыту мен қолданудың 2011-2020 жылдарға арналған мемлекеттік бағдарламасында мемлекеттік тіл ұлт бірлігінің факторы ретінде қарастырылады. Ал дамыған тіл мәдениеті зиялы ұлттың бір әлеуеті қатарында «Мәңгілік Ел» идеясымен сабақтас болып табылады. Бұл мақсаттар қазақстандықтардың кейінгі ұрпаққа қалдырар ең басты байлығы – ел бірлігін сақтап, мемлекеттік тілді дамытуға бағытталған. Тіл — жалпыұлттық құндылық, оны біз әрбір жастың бойында дамытуға тиіспіз. Аталмыш құрылтайды өткізудегі мақсат та осы тараптан өрбиді.
Бір бұл емес, жиын барысында сөз алған баяндамашылар қазақ тілінің қолданыс аясы және оны кеңейте түсу жөнінде өз ойларын білдіріп, салмақты ұсыныстар тастады.
Қуаныш ЖОЛЫМБЕТ,
«Семей таңы»
