Аптаның алғашқы жұмыс күні Семей қаласының әкімдігі мен қаладағы фармацевтер арасында дәрілік заттар мен медициналық мақсаттағы бұйымдарға бағаның өсуін ұстау мәселелері жөніндегі ынтымақ-тастық туралы меморандумға қол қойылды.
Меморандумға тіркелген тізімге маңызы бар 100-ден астам дәрі – дәрмек атаулары енгізілген және олардың бағалары өзгеріссіз қалады. Бұл тізім келісімге келген Семейдегі дәріханалардың барлығына ілінеді. Қабылданған құжатқа сәйкес, шаһардың фармацевтері жылдың соңына дейін тұрғындарды дәрі – дәрмектермен үзіліссіз қамтамасыз етуге, бағаның өсуіне жол бермеуге міндеттеме алды. Жиында сөз алған Семей қаласы әкімінің орынбасары Надежда Шарова игі бастамаға қолдау білдіргендері үшін кәсіпкерлерге қала әкімі атынан алғысын білдірді.
— Сіздер әлеуметтік жағынан аз қамтылған тұрғындарға қолдау көрсетіп отырсыздар. Бұл — Елбасы тапсырмаларының бірі. Мемлекет басшысы кәсіпкерлердің әлеуметтік жауапкершілігі туралы үнемі айтып келеді. Семей қаласының кәсіпкерлері, әсіресе фармацевтика саласындағылар қолдау көрсетуге өз үлестерін қосуда,- деді қала әкімінің орынбасары.
Меморандум жылдың соңына дейін жалғасады. Шығыс Қазақстан облысы денсаулық сақтау басқармасы басшысының Семей өңірі бойынша орынбасары Ғалия Жуасбаеваның айтуынша, бағалары сақталатын дәрі-дәрмектердің тізіміне ағымдағы жылы 105 препарат кіріп отыр.
— Осы орайда бағаны көтермеу мақсатында ынтымақтаса жұмыс жасау үшін бүгінгі күні 14 дәріханамен келісімге келдік. Алдағы уақытта жұмыстар жалғасатын болады, — дейді Ғалия Жуасбаева.
Дәрі – дәрмек бағасының өсуін ұстау мақсатындағы ынтымақтастық туралы меморандумға отырғандардың бірі «Асфарм» ЖШС болды. Аталмыш дәріхана меңгерушісінің айтуынша, тұрғындарды дәрі – дәрмектермен үзіліссіз қамтамасыз ету және дәрі бағаларының өсуіне жол бермеу бүгінгі күні аса маңызды.
— Бұл келісім аясында жұмыс істеп жатқанымызға он жылға жуықтады. Тізімде аса қажетті дәрілік препараттар болғандықтан келісімге келіп отырамыз. Бұл әсіресе осындай дағдарыс кезінде тұрғындарға өз септігін тигізбек. Тізімде, отандық өнімдермен қатар, шетелдік дәрі – дәрмектер де бар,- дейді «Асфарм» ЖШС дәріхана меңгерушісі Қарлығаш Мұсатаева.
Асан МЫРЗАХАН,
«Семей таңы»
