Кеше, яғни аптаның бейсенбісінде, «Нұр Отан» партиясы Семей қалалық филиалы ғимаратында аталмыш партия филиалы мен Семей аймағы бойынша Сыбайлас жемқорлыққа қарсы іс-қимыл жөніндегі ауданаралық басқармасы арасында сыбайлас жемқорлыққа қарсы күрес жүргізуде өзара түсіністік пен ынтымақтастық орнату туралы меморандумға қол қойылды.
Аталмыш шараға орай ұйымдастырылған басқосуға Семей аймағы бойынша Сыбайлас жемқорлыққа қарсы іс-қимыл ауданаралық басқармасы басшысы Дархан Елтоқов, «Нұр Отан» партиясы Семей қалалық филиалы төрағасының бірінші орынбасары Зульфия Жамалтдинова, партия филиалы жанындағы жемқорлыққа қарсы қоғамдық кеңес төрағасы Ғаббас Ибраев, партиялық бақылау комиссиясының төрағасы Аман Тілеубаев, қалалық мәслихаттағы «Нұр Отан» партиясының депутаттық фракциясының төрағасы Марат Сандыбаев және қаламыздағы өзге де партия белсенділері мен жергілікті БАҚ өкілдері қатысты.
Аталмыш іс-шараның сыбайлас жемқорлық фактілерінің алдын алу жөніндегі мемлекеттік саясатты дамытудағы мән-маңыздылығы жоғары. Өз кіріспе сөзінде аталмыш тарапта ой өрбіткен З.Жамалтдинова ендігі аралықта екі жақты келісім аясында бірлесіп жұмыс жүргізетіндіктен, алдағы тұрған мақсат-міндеттер аясы кеңейе түсетіндігін жеткізе кетті.
— Бұл қол қойылатын келісімнің негізгі мақсаты — Қазақстан Республикасы Президентінің 2014 жылғы 26 желтоқсандағы №986 бұйрығымен бекітілген Қазақстан Республикасының 2015-2025 жылдарға арналған сыбайлас жемқорлыққа қарсы стратегиясын, «Нұр Отан» партиясы Сыбайлас жемқорлыққа қарсы іс-қимылдың 2015-2025 жылдарға арналған бағдарламасы мен Елбасының Жолдауын жүзеге асыру мақсатында қызмет ету, заңдылықты қамтамасыз етуде сыбайлас жемқорлыққа қарсы күрестiң негiзгi принциптерiнің сақталуын жүзеге асыру,- деп атап өткен Зульфия Фазылжанқызы мемлекет мүдделерін сақтай отырып, мемлекеттік қызмет түрлерін іске асыруда азаматтардың құқығының қорғалуын қамтамасыз етудің, қоғамдағы сыбайлас жемқорлыққа жағдай туғызатын құқық бұзушылық көріністері мен проблемалы аумақтарды айқындау шараларын қолданудың маңыздылығына да тоқталып өтті. Яғни, бұл Елбасының жемқорлықпен күрес жөніндегі саясатын іске асыру бағытындағы бірлескен маңызды профилактикалық іс-шаралар болып табылады. Ал бұл ретте семейлік партия мүшелері әрдайым белсенділік танытуға әзір.
Ал өз сөзінде осынау меморандумның аясында жүргізілетін жұмыстарға тоқталып өткен Дархан Жарылқасынұлы оның мерзімінің шектеусіз екендігін жеткізді.
— «Коррупция» сөзі латын тілінен аударғанда «шірінді» деген мағынаны білдіреді екен. Ал оны кесіп алып тастау ләзім. Яғни, бұл бағытта қарқынды жұмыс жүргізу қажет деген сөз, — деп атап өткен Семей аймағы бойынша Сыбайлас жемқорлыққа қарсы іс-қимыл ауданаралық басқармасы басшысы бұл жұмыстарда да партияға арқа сүйейтіндіктерін айтты.
Осыдан кейін филиал төрайымы мен басқарма басшысы бірлескен жұмыстар жөніндегі меморандумға қол қойып, тарихи сәт орын алды. Ал басқосуға қатысушы қонақтар арасынан пікір білдірген партия филиалы жанындағы жемқорлыққа қарсы қоғамдық кеңес төрағасы Ғаббас Ибраев аталмыш бағыт бойынша осы күнге дейін де жұмыс жүргізіліп келе жатқандықтан, алдағы уақыттарда осы бағыттағы іс-шаралар қатарын тіптен ширата түсуге мүмкіндік ашылатынын, болашақта бірлесе қызмет атқаруға әрдайым әзір екендіктерін айтып өтті.
Қуаныш ЖОЛЫМБЕТ, «Семей таңы»
