№ 18 сайлау округі бойынша Шығыс Қазақстан облыстық мәслихатының депутаты Риза Молдашеваға сәуір айының ортасында Энергетик кенті, №1 үй, №35 пәтердің тұрғыны Әлімұрат Ізғұтты ақсақал келіп, кент тұрғындарының ортақ өтініштерін жеткізген еді. Әлімұрат Ізғұттының айтуынша, өткен жылдың күзінде Энергетик кентінде көп қабатты тұрғын үйдің құрылысы басталған болатын. Құрылыс жұмыстарына байланысты сол жердегі автобус аялдамасы, балалар ойнайтын алаң, сауда – саттық алаңы, №1 үйдің қоқыс төгетін қоршаулы тұрған контейнерлері алынып тасталған еді. Құрылысқа жауапты мердігер компания салынатын нысанның іргетасына арнап жерді қазу жұмыстарын жүргізіпті. Алайда тұрғындарға беймәлім себептермен құрылыс жұмыстары тоқтап, қазылған шұңқырды жауып, тегістегендей болады. Бірақ құрылыс компаниясы өз жұмыстарын соңына дейін жеткізбеген еді. Жоғарыда айтылған балалардың ойын және сауда – саттық алаңы қалпына келтірілмеген күйі қалған болатын. Оның үстіне аялдама орны да ауысып, тұрғындарға қолайсыздық туғызғаны тағы бар. Ақсақалдың айтқан мәселесіне қаныққан депутат Риза Асанқызы Энергетик кентіндегі сайлаушыларының ортақ өтінішін жерге қалдырмай, Семей қалалық жолаушылар көлігі және автомобиль жолдары бөлімі басшысының міндетін атқарушы Нұрлан Серғазиновтың атына депутаттық сауал жолдаған. 24 сәуір күні депутат сауалына аталған бөлім басшысының міндетін атқарушы Н.Серғазиновтың қолы қойылған ресми жауап келді. Депутаттық сауал бөлімде қаралып, аталған мәселені шешу үшін «Фирма Азия» ЖШС-не бөлім тарапынан ресми хат жолданғаны, араға күн салып «Фирма Азия» ЖШС сәуір айының 21-нен бастап жоғарыда аталған нысандарды, аялдамаларды қалпына келтіру жұмыстары басталғаны туралы айтылған хабар келді.
Халық қалаулысының араласуымен қазір кент тұрғындарының ортақ мәселесі шешілді. «Фирма Азия» ЖШС қазылып, қайта жабылған жерді тегістеп, аялдаманы орнына қойды. Қазір кентке қатынайтын барлық қалаішілік автобустар бұрынғы аялдамаға келіп тоқтауда.
Е. ЖАНАТҰЛЫ, Семей қаласы.
