Ел басына қатер төнген күн, ерлер елі үшін отқа түскен күн ешқашан ұрпақ жадынан өшпек емес. Керісінше, жылдар көші жылжыған сайын, жаңа қырынан танылып, жаңа буын үшін ұлағаты артып, жұртшылық көкейінде жаңғырып тұрмақ. 9 мамыр күні Жеңістің 71-ші мерекесі Семей қаласында да барынша сән-салтанатпен өз мәнінде аталып өтті.
Бұл күні қалалықтар Орталық алаңға мол жиналды. Көпшілік алдында қала әкімі Ермак Сәлімов сөз алып, аталмыш мерекеге орай құттықтау лебізін білдірді. Өз сөзінде осынау мерекенің тағылымдық мәніне баса тоқталған шаһар басшысы жеңімпаз соғыс және еңбек ардагерлерін мерейлі мейраммен құттықтап өтті.
— Елдік пен ерліктің, өрлік пен өшпес рухтың символына айналған Жеңіс күні мерекесі баршаларыңыз үшін құтты болсын!- деп ақ тілек тізгінін ағытқан Ермак Бидахметұлы ардагерлер қауымына зор денсаулық, шаңырақ шаттығын тіледі.
Осыдан соң сөз тізгінін соғыс ардагері, ШҚО және Семей қаласының Құрметті азаматы Ғабдулғазиз Гайнутдинұлы Ахмеров алды. Қарт жауынгер өз сөзінде бүгінгі бейбіт аспан астындағы тыныштық ұялаған еліміздің ертеңі жарқын болуына тілектестік білдіре келе, кешегі күндей күркіреп өткен сұм соғыста шейіт болған боздақтар есімін әсте ұмытуға болмайтынын айтып өтті. Бұл игілікті қасиет — келешек ұрпаққа да аманат.
Осыдан соң Жеңіс күніне арналған мерекелік салтанатты шеру басталды. Орталық алаңнан Жеңіс саябағына дейінгі аралықты жүріп өту үшін қалалықтарды соғыс және тыл ардагерлері отырған соғыс жылдарындағы әскери техникалар бастап шықты. Театрландырылған көріністі көлік үстінде сомдаған қалалық өнерпаздарға жиналған көпшілік, әсіресе жастар, зор қошемет білдіріп, ұрандап тұрды. Олардың соңынан «Өлімді жеңген полк» шеруі ілесті. Майдан даласынан оралмаған боздақтар мен өмірден озған соғыс ардагерлеріне көрсетілген орасан құрмет еді бұл. Осынау шараға биыл жүздеген қала тұрғындары қатысты. Бірі атасының, енді бірі ағасы мен бауырының, кейбірі соғыста із-түзсіз кеткен туыстарының фотосуреттерін мақтанышпен алып шығыпты. Батырлардың есімдері, Отанын қорғаған қайсар рухты батыр ретінде, тарих бетінде мәңгіге қатталып қала бермек.
Қалалықтар Интернационал көшесінің бойымен шерулетіп жүріп өтті. Көшенің қос қапталында осы мезетте қаламыздың мектептері мен колледждерінің студенттері шерушілерді қошеметпен қарсы алып, ұрандап тұрған болатын.
Шеру соңында соғыс және тыл ардагерлері Жеңіс саябағындағы Мәңгілік алау жанында майдан даласында шейіт болған боздақтар мен бүгінде арамызда жоқ соғыс ардагерлеріне тағзым етіп, гүл шоқтарын қойды. Өшпес ерліктің символына айналған алау жанында сол бір сұрапыл жылдар куәгерлерін еске алу мақсатында бір минут үнсіздік жарияланды.
Осыдан кейін, жылдағы қалыптасқан дәстүр бойынша, саябақ іргесіндегі әскерилер палаткасында соғыс және тыл ардагерлеріне арналып шағын дастарқан жайылды. Мұнда қариялар қауымы мен мерекелеуші көпшілік солдат ботқасынан дәм татты.
Жиналған ардагерлер алдында қала әкімі Ермак Сәлімов құттықтау сөз алып, ізгі тілегін білдірді. Барша ардагерлер қауымына денсаулық, амандық тіледі.
Осыдан кейін ардагерлер қауымы құрметіне соғыс жылдары әуендерінен тұратын мерекелік әндер ұсынылды. Ақ тілектер легі ағытылып, қариялар қауымы да кезегімен сөз алып жатты. Қалалық көнекөздер бейбіт өмір мен ортақ Отанымыздағы тыныштық, береке-бірліктің арта беруіне баталы тілектерін білдірді.
Қуаныш ЖОЛЫМБЕТ, «Семей таңы»
