Жуырда қалалық әкімдіктің мәжіліс залында шаһардағы бірқатар кәсіпкерлердің басын қосқан жиын болып өтті. Қозғалған негізгі тақырып — жаз мезгіліндегі санитарлық-тазалық мәселелері және тұрғындарға сапалы қызмет көрсету. Басқосуға, негізінен, қаламыздағы қоғамдық тамақтану орындарының басшылары мен сауда орындары иелері жиналған болатын.
Қалалық кәсіпкерлік бөлімінің басшысы Марат Нүгеров сауда орындарындағы қоғамдық тәртіпті сақтауда мұқият болу керектігін ескерте келе, жаз маусымы басталысымен бірқатар іс-шараларды жүзеге асыру қажеттігі жайлы айтып өтті. Әсіресе санитарлық-тазалық жүргізу мен эпидемиологиялық шаралар жайында кең көлемде түсінік берді.
Жалпы, жылдың осынау маусымы — түрлі жұқпалы аурулардың кеңінен етек алатын мезгілі. Мұндай келеңсіздіктерге жол бермеу мақсатында кешенді шаралар жүргізу қажеттігі туындайды. Аталмыш тақырып бойынша жиналғандар алдында Тұтынушылар құқығын қорғау басқармасы басшысы Бағлан Шегедеков арнайы баяндама жасап өтті. Өз сөзінде қоғамдық тамақтану орындары мен азық-түлік саудасымен айналысатын кәсіпкерлік нысандарының жазғы мезгілге даярлығы жөнінде ақпараттандырған Бағлан Салихұлы кәсіпкерлерге алда тұрған міндеттемелер мен тың тапсырмалар жайында да айтты.
— Қалалықтар үшін нағыз қарбалас кезең енді басталды. Миграциялық масса қаламыз бойынша санитарлық-тазалық жұмыстарында қырағы болуды қажет етеді. Бұл орайда бірқатар іс-шаралар жүргізуге шешім қабылдаған болатынбыз. Басты міндет — тамақтан ұшыну, улану, жұқпалы аурулардың таралуы сынды келеңсіздіктерге жол бермеу. Оның ішінде жазғы мезгілде жиі орын алатын ішектің инфекциялық аурулары мен салмонеллез сынды сырқаттардың жолын кесу үшін тазалық талаптарын қатаң қадағалау, тамақ өнімдерін өңдеу мен сақтаудағы тиісті ережелерді орындау қажеттігі туындайды,- деп атап өткен Бағлан Салихұлы бірқатар мәселелерге тоқталып өтті. Атап айтсақ, кейбір дәмханалар мен қоғамдық тамақтану орындарына, полуфабрикаттар даярлайтын цехтарға жүргізілген тексеру жұмыстары барысында көптеген келеңсіздіктер айқындалған. Оның ішінде аспаздардың жеке бас гигиенасының сақталмауы, санитарлық кітапшаларының болмауы сынды олқылықтар орын алған. Сонымен қатар азықтық өнімдерді сақтау талаптарының бұзылуы да көрініс беріпті. Мұнымен қоса кейбір мектеп асханаларын жалға алушы кәсіпкерлер ыдыс-аяқ жуу талаптарын сақтамаған. Дер кезінде анықталған бұл жайттар тексеру жүргізуші мамандар тарапынан қолданылған шаралар нәтижесінде қалпына келтірілген.
Бағлан Шегедеков әсіресе ет өнімдерін сақтауда ерекше мұқият болу қажеттігін ескертіп, аталмыш талап нормаларын бұзған жеке кәсіпкерлерді атап өтті. Олардың барлығына да қомақты көлемде айыппұл салынған. Басқарма басшысы айтып өткендей, тазалық сақтамағандар арасында қоғамдық қызмет көрсету мекемелері де бар екен. Мәселен, бір кәсіпкер бассейн жұмысына қатысты ескерту алған.
Ал келесі кезектегі сөз тізгінін қалалық кәсіпкерлік бөлімінің басшысы Марат Нүгеров алды. Ол өз сөзінде ірі сауда орталықтары мен шағын дүкендердегі тазалық талабы мен қызмет көрсету сапасына тоқталып өтті. Атап айтсақ, көптеген сауда орындарында жұмыс уақыты мен тауарлар бағасы көрсетілмеген. Сонымен қатар ірі супермаркеттер сатушыларынан басқаларында қызметтік фартуктер мен формалар жоқ. Көпшілігі тіпті нан мен нан өнімдерін арнайы қолғапсыз ұстайды. Сондай-ақ жарамдылық мерзімі өткен тауарлардың да тұтынушыға ұсынылып жататыны бар. Мұның барлығы ережеге қайшы. Сонымен қатар дүкендерді аралау барысында өзге де келеңсіздіктер анықталған. Мәселен, ысталған балық қанттың жанында тұрады немесе жуғыш заттар мен ұнтақтар ораусыз кондитерлік өнімдермен бірге сақталады. Осы тәрізді келеңсіздіктерге жол бермеу кәсіпкерлердің басты назарында болуы тиіс. Мұнымен қатар, ҚР Үкіметінің 145-қаулысы бойынша, әрбір тауардың фактуралық есебі мен сертификаты болуы тиіс. Мұны дүкен қожайындары жақсы біледі, алайда орындай бермейді. Аталмыш мәселелерге кеңінен тоқталып өткен бөлім басшысы іскерлік мақсатта жұмыс жүргізуші кәсіпкерлерге өз қызметтеріне сергек қарап, үнемі талап үдесінен табылуы керектігін жеткізді.
Қ.ӘЛІМБЕК, Семей қаласы
