Жаз мезгілінде күннің аптап ыстығы еріксіз сізді Ертістің жағасына жетелейтіні анық. Жасыратыны жоқ, жанына сая іздеген жан суға түсу қауіпсіздігін естен шығарып, нәтижесінде қайғыла оқиғаларға тап болып жататын кездер жиі кездеседі. Жалпы, ағыны қатты Ертіске шомылу қауіпті саналады. Бұл туралы қалалық ТЖБ мамандарының қатысуымен өткен баспасөз мәслихатында айтылды. Баспасөз мәслихатына, төтеншеліктерден бөлек, Тұтынушылардың құқықтарын қорғау басқармасының, қалалық білім бөлімі мен ішкі саясат бөлімінің өкілдері де қатысты.
Ресми мәліметке сәйкес, өткен жылғы шомылу маусымында Семейде 12 адам суға кетіп көз жұмған. Жалпы, бір жылдың көлемінде суға кеткендердің саны 18 адамды құраған. Оның ішінде бір бала бар.
— Жаз маусымы келісімен, адамдар қауіпті, рұқсат етілмеген аумақтарға барып шомылады. Оқыс жағдайлардың басым көпшілігі адамдардың өз кінәсінен орын алады. Мәселен,өз өміріне деген жауапкершіліктің жоқтығынан тұрғындар судағы қауіпсіздік ережелерін сақтамайды. Бұған қоса табиғат аясындағы демалыс спирттік ішімдіктермен жалғасатыны жасырын емес. Ал оның арты көбінде қайғылы жағдайлармен аяқталатыны белгілі. Сонымен қатар ата-аналар балаларын бақылауда ұстай алмайды. Балықшылар да өз өмірлеріне селқос қарап, алкогольді сусындарды пайдаланды,- дейді Семей қаласы ТЖБ азаматтық қорғаныс бөлімінің басшысы Марат Дәулетин.
Республика су қоймаларындағы қауіпсіздікті қамтамасыз ету мақсатында ҚР ІІМ-мен арнайы «Су қоймаларындағы қауіпсіздік ережелері» әзірленіпті. Бұл бағытта қала әкімдігі де шомылу кезінде болатын судағы төтенше жағдайларды ескерту жөнінде кешенді жоспарды бекіткен екен. Соған сәйкес рейдтік шаралар әрі жағалау маңын бақылау жұмыстары қолға алынады деп көзделуде. Бұған жол — патрульдік полициясы мен жергілікті полиция қызметі тартылатынын айтып өтті баспасөз мәслихаты барысында қала әкімінің азаматтық қорғаныс және жедел әрекет ету дайындығы бойынша көмекшісі Берік Түсіпов.
— Суға шомылу маусымында балалардың қауіпсіздігіне айрықша көңіл бөлінбек. Біз осы мақсатта білім бөлімімен тығыз байланыста боламыз. Қалада мектеп жанынан ашылған 64 лагерь, сондай-ақ 6 жазғы лагерьлер жұмыс істейді. Жазғы демалысқа 16 мыңнан аса бала шығады деп күтіліп отыр. Үш лагерьде арнайы бассейндер орнатылған. Қалған үшеуі су қоймаларынан қашықтықта жатыр. Сондықтан да алаңдауға негіз жоқ. Ал қала аумағында арнайы шомылу жағалауын ұйымдастыру мәселесіне келер болсақ, бұл сұрақ мұқият зерттеуді талап етеді. Түйемойнақ аралындағы бірнеше орынды қарастырып шықтық. Енді оның санитарлық талаптарға қаншалықты сай екенін білу үшін ол жерге Тұтынушылардың құқықтарын қорғау басқармасының қызметкерлерін шақыруды көздеп отырмыз. Егер де басқарма мамандары жүргізген сараптаманың нәтижесі оң болса, мәселе шешілетін болады,- дейді Б.Түсіпов.
Баспасөз мәслихатында ТЖБ мамандары қала тұрғындарын суға түсу маусымында сақтық шараларын барынша ескеріп, қауіпсіздік ережелерін мейлінше қатаң ұстануға шақырды.
Шынар РЫСАКОВА, Жақсылық МҰРАТҚАЛИҰЛЫ, «Семей таңы».
