Абай атындағы әмбебап кітапханада 31 мамыр – Саяси қуғын-сүргін құрбандарын еске алу күніне арналып «Азалы тарихқа айрықша тағзым» атты арнайы шара өткізілді. Оның негізгі мақсаты ұлт мүддесін қорғау жолында жандарын қиған кешегі Алаш ардақтыларын жас ұрпаққа насихаттау әрі олардың бойында Отанға деген сүйіспеншілікті арттыру болып табылды.
Аталмыш шараға қалалық ішкі саясат бөлімінің өкілдері, белгілі тарихшы-ғалымдар, қаланың зиялы қауымы және студент жастар қатысты. Бұл күннің мәні мен маңыздылығына кеңірек тоқталған «Алаштану» ғылыми-зерттеу орталығының директоры Тұрдығұл Шаңбай көпшілікке Семей қаласы Алашорда автономиясының орталығы болғаны жайында жан–жақты айтып өтті.
— Жуық арада Мәскеуде «Алаш қозғалысының пассионарлық қуаты» деген еңбек жарық көрмек. Бұл туындыда ұлт көсемі Әлихан Бөкейхановтың Семей қаласы туралы айтқан сөздері келтірілген. Мәселен, «Қазақ» газетіндегі «Оқушыларға жәрдем қауым» деген мақаласында Ә.Бөкейханов қазақ даласында өркендеп келе жатқан қалалардың қатарына Орынбор, Троицк және Семейді жатқызыпты. Негізі, Семей Алаш зиялыларының саяси орталығы болған,- деген Тұрдықұл Шаңбай Алаш арыстарына қатысты бірнеше еңбекті қалалық ішкі саясат бөлімінің бас маманы Ю.Осьмаков пен Абай атындағы әмбебап кітапханасының қызметкерлеріне салтанатты жағдайда табыстады.
Айтулы жиында кітапхана қызметкерлері 1924-1954 жылдар аралығында елімізде 100 мыңнан аса адам саяси қуғын-сүргіннің құрбаны болғандығын, 30 мың адам жазықсыз атылып кеткендігін мәлім етті. Ал 1931-1933 жылдардағы қолдан жасалған ашаршылықтың нәтижесінде 2 млн-ға жуық адам көз жұмып, 1 млн-нан аса қазақ шекара асуға мәжбүр болыпты. Сондай-ақ шара барысында, көрнекті қоғам және мемлекет қайраткері, ұлт-азаттық және Алаш қозғалысының жетекшісі Әлихан Бөкейхановтың 150 жылдық мерейтойына орай, «Ұлт көсемі — Әлихан» тақырыбындағы виртуалды көрменің тұсаукесер рәсімі болып өтті. Кітапхана ұжымы аталмыш көрме арқылы ғаламтор пайдаланушылары ұлт көсеміне қатысты қызықты әрі тың деректерді лезде таба алатынын айтып, көрменің оқырмандарға пайдасы тиетініне сенімді. Виртуалды көрме негізгі 8 бөлімнен тұрады екен. Мұнда Ә.Бөкейхановқа арналған өлеңдер, қайраткердің түрлі фотосуреттері, бейнежазбалар және мерзімді басылым беттерінде жарық көрген 20-дан астам мақаланың толық мәтіндері ұсынылған. «Азалы тарихқа айрықша тағзым» шарасында М.Төлебаев атындағы музыкалық колледждің оқытушысы С.Сақаловтың орындауында «Оян, түрік!», «Арыстарым, қайдасың?» және Құсмілия Нұрқасымның «Алашты жоқтау» әндері шырқалып, жас ақындар арнау өлеңдерін оқыды.
Жақсылық МҰРАТҚАЛИҰЛЫ, «Семей таңы»
