Елбасының биылғы Жолдауының ерекшелігі мен құндылығы – «Мәңгілік Ел» жасампаздық идеясының ұсынылып, дамуымыздың дара жолының белгіленуінде деп білемін.
2050 жылға дейінгі даму Стратегиясының орындалу механизмдерін жан-жақты нақтылап берді. Ендігі жерде “Мәңгілік Ел” — ұлттық идеологиямыз. Еліміздің экономикалық- әлеуметтік саладағы жетістіктері дамыған 30 елдің қатарына енуге мүмкіндік береді. Межеге «өз өзімізді қамшылап, тек алға ұмтылу» арқылы ғана жетеміз деген қағидат айтылды. Бір қарағанда қарапайым сөз. Бірақ мұнда үлкен салмақты мағына жатыр. Демек, біздер бір мезет бір орында тұрып қалмауымыз керек. Барлық қажыр-қайрат, жігерімізді жұмылдырып, өзіміздің жеке жетістіктеріміз арқылы Отанымыздың игілігін арттыруға барынша үлес қосуымыз керек. Әрбір адам өз жұмысына жауапкершілікпен қарап, адал атқарса, студент жастар оқуда үлкен табыстарға жетсе, Жалпыға ортақ Еңбек қоғамын құрудың басты шарты, міне, осында.
Жолдауда “Мәңгілік Ел” идеясын жүзеге асырудың 7 құндылығын атап көрсетті. Мәңгілік Ел — зайырлы, рухы биік, тарихы мен мәдениеті ортақ, қазақстандықтардың бірлігі мен берекелі тірлігінен құралады. Мемлекет басшысының осынау пайымы бүкіл қоғамның жүрегінен терең орын алғанын, олардың пікірлерінен естіп-көріп отырмыз.
Осынау ұлы мұратты бабаларымыз «Жер ұйығы» деп ежелден аңсаған. Сол асыл арман небары 20 жылдың аралығында ақиқатқа айналды. Біз осы бақытты кезеңнің куәгерлері ғана емес, тікелей қатысушыларымыз.
Білім беру саласы әлемдік стандарттарға сәйкес, жүйелену керектігін баса айтты. Жалпы өнімнің кем дегенде 3 пайызы білім мен ғылымды дамытуға жұмсалады деп атап көрсетті. Бұл мүмкіндіктерді сіздер мен біз қазірдің өзінде сезініп отырмыз. Мемлекет тарапынан қаржыландырылатын 8 ғылыми Жобаны университет ғалымдары жүзеге асыруда. Инновациялық озық ғылыми жо- баларды қолдауға бұрынғыдан да кең мүмкіндіктер ашылатын болды.
{jcomments on}Білім берудің жаңа сапаға көшуі, дуальды, техникалық кәсіби білім беруді қолға алу міндеті қойылды. Осы орайда оқу орнымыздың стратегиялық жоспарын қайта қарап, кешенді білім беру корпорациясы деңгейіне жету мақсатын белгілеуіміз қажет деп санаймын. Өйткені, уақыттың жедел талабы осыны қажет етеді. Н.Әбішұлы өз сөзінде құбылған уақыттың жеделдігіне сәйкес, әрекет етуді ұсынғанын естідіңіздер. Сонымен қоса, өңірлердің экономикалық және инновациялық әлеуетін арттырудағы ғылым мен білімнің рөлі ерекше айтылды. Облыста сұранысқа ие, әсіресе, техникалық мамандықтар бойынша мамандар даярлаудың мониторингін жасап, жұмыс беруші серіктестермен атқарылатын істердің ауқымын белгілеуіміз керек.
Елбасы Жолдауындағы әрбір сөз біздің әрқайсымызға тікелей қатысты. “Мәңгілік Ел” патриоттық актісін жетілдіруге әскери кафедра ұжымы белсенді ат салысады деп сенемін. Мүмкіндігі шектеулі жандарға мейірімділік көрсету, оларды өз қатарымыздан қалдырмауды тапсырды. Ол жандардың қоғамның белсенді мүшесі болуына көп болып қол ұшын береміз. Өз тарапымнан: мүмкіндігі шектеулі жастарды ректор грантын бөліп оқытуды жалғастыратынымды жеткіземін. Осы уақытқа дейін ондай балаларды қолдап келдім, әлі де қолдай беремін. Олар масыл емес, тағдыр талқысын ержүрекпен көтеріп жүрген жігерлі жандар. Студенттерге айтарым университетте өздері құрған «Ақниет» қайырымдылық қоры арқылы, сондай-ақ, «Жас заңгерлер» қауымдастығы арқылы оларды пайдалы істерге тартуды ұсынамын. Бір жағынан жәрдем, қолдау, екіншіден, мүмкін, шағын кәсіпкерлік ашып, қоғамнан өз орнын табуға ықпал етуге болады. Президентіміз шағын кәсіпкерлікке толық қолдау көрсететінін қадап айтты. Сондықтан, оңтайлы да оң ұсыныстарыңызды ортаға салу керек. Ақыл жастан деген ұстанымды әлі ешкім өзгерткен жоқ. Тың идеялар керек, бірақ, асығыстық пен қисынсыздың орын алмауы тиіс. Барлық факультеттер мен құрылымдық бөлімшелерде Жолдауды талқылау мен зерделеу кеңінен жүргізіліп, басты мақсаттар мен қағидаттар әрбір студент-жастарымызға өз мәнінде түсіндіру жұмыстары жүргізілуде.
Нұрсұлтан Назарбаев іргесін қалаған “Мәңгілік Елдің” келешек ұйытқысы, бақытты тұрғындары, қадірлі жас достар, Сіздер! Сіздерді нем-құрайлы болмауға, жалынды жігерлі болуға шақырды. Жасалынып жатқан жағдайлардың барлығы жастарымыз үшін, жаңа қазақстандық патриотизм идеясын ұсынды. “Мәңгілік Елдің” басты тұрғындары, шынында да, жастарымыз Жолдаудың әрбір жолын мұқият қарап, өрлеу жолы ретінде оқып-үйренеді деп сенемін.
Жолдауды тек өз университетіміз ғана емес, қала мен ауыл жастарының Жолдауды насихаттау, іске асыруға ат салысулары — міндеттен де жоғары парызымыз.
Мақсаты мен келешегі ортақ “Мәңгілік Еліміздің” әр күнін мерекелі етуге берекелі істерімізбен үлес қосайық.
Шырын ҚҰРМАНБАЕВА, саяси ғылымдар докторы, профессор, ҚазИГЗУ-нің ректоры.
