«Нұр Отан» партиясы Семей қалалық филиалында кезекті қоғамдық қабылдау өтті. Семей қаласы ішкі істер басқармасының басшысы Жұмабек Исаділов пен «Нұр Отан» партиясы Семей қалалық филиалының қоғамдық қабылдау бөлімінің меңгерушісі Дархан Жұмаділов және өңірдегі құқық қорғау органының жауапты басшылары құқық қорғау органдары қызметкерлерінің немқұрайлығын және сот шешіміне қатысты келіспеушілігін жеткізген алты азаматтың арыз-шағымын тыңдады.
Семей қаласының тұрғыны Зәуре Ахметова 2005 жылы мемлекеттен 10 сотық жер телімін алып, бір жыл ішінде жеке тұрғын үй тұрғызғанын, ал 2006 жылы заң жүзінде құжаттарының барлығын түгендеп алғанын айтады. Зәуре Темірбекқызының айтуынша, 1998 жылы жер алған көршісі жалған құжаттармен оның жерінің жартысын өз атына рәсімдеп алған. Сотқа жүгінгенімен, құқық қорғау органы құжаттарының дұрыстығын тексерместен, істі көршісінің пайдасына шешіп берген. Осылайша, шағымданушы азаматша 33,7 шаршы метр жерінен айырылып қалған.
— Көршім онысымен қоймай, менің барлық жерімді заңдастырып алды. Менің ойымша, оған көмектескендер бар. Жарты жыл өтпестен менің жерімнің жартысын қосып алып, оның актісін жасатып алған. Тіпті әділет басқармасына тіркеп алыпты. Осы жылдар ішінде нақты деректерді көрсететін құжаттарға қол жеткізе алмадым. Дегенмен қазір қажетті құжаттарды жинадым. Прокуратураға жүгіндім. Осы жағдайға байланысты алаяқтық ісі бойынша іс қозғалды. Бұл өткен жылы болған еді. Бірақ іс сол күйі қаралмай қалды,- деген қала тұрғыны құқық қорғау органынан көмек сұрады. Өз кезегінде Семей қаласы ішкі істер басқармасының басшысы Жұмабек Исаділов аталған істің қайта қозғалғанын, қазір ол бойынша тергеу амалдары жүргізіліп жатқанын айта келе, осыдан былай азаматшаның барлық тергеу амалдары барысынан хабардар болып отыратынын айтып сендірді. Сондай-ақ шаһардың бас полицейі аталған мәселені өзінің жеке қадағалауына алғанын жеткізді.
Ал Николай Косинский өзінің азаматтық некедегі жұбайы, бүгінде он жылға істі болған Н.Левандовскаяның мәселесімен келгенін жеткізді. Бұл тұрғыда Николай Геннадьевич азаматшаға қатысты жүргізілген тергеу амалдарына көңілі толмайтынын, істің бір жақты жүргізіліп, зайыбының нақақтан сотталып кеткенін айтып шағымданды. Ал басқарма басшысы өз кезегінде қазір осы іс бойынша тергеу амалдары қайтадан қолға алынғанын айтып, қандай да бір көңіл толмаушылық болса, заң аясында жүгінуге болатынын атап өтті. Қоғамдық қабылдауды қорытындылаған Семей қаласы ішкі істер басқармасының басшысы Жұмабек Исаділов ішкі істер саласының басшылығына арыз-шағымдар негізінде жүйелі әрі сапалы жұмыс жүргізуді жүктеп, өтініштерді заң аясында шұғыл қарап, шешуді тапсырды. Ол сондай-ақ қабылдауға келген азаматтардың мәселелерін өз бақылауына алып, заң аясында шара қолданатыны жөнінде хабардар етті. Қабылдауға келген басқа да азаматтар өз сұрақтарына толыққанды жауаптар алды.
Асан МЫРЗАХАН,«Семей таңы»
