Дальний ауданының тұрғындары судың астында қаламыз ба деп алаңдаулы. Бұған себеп те жоқ емес. Анықталғандай, жер асты суы деңгейінің күрт көтерілуіне байланысты жеке секторларды су басу қаупі туындап отыр. Қауіпті аймаққа Дальняя және Омская көшелерінің бірқатар аудандары кіретіні белгілі болды. Мұндай келеңсіздік қысқы маусымға дайын болмаған арықтардың кесірінен орын алды дейді құзырлы орган өкілдері.
Десе де көше тұрғындары арықтарды тазартып, судың мөлшерін де қадағалап отырғанын мәлім етті.
— Біздің көшеде мердігер мекеменің жалғыз ғана қызметкерінің жүргенін байқадық. Алайда оның жұмыс істеген-істемегені бізге беймәлім. Арықтарды өзіміз тазартамыз. Әркім өз міндетіне салғырт қарамаса, мұндай жағдай болмас еді. Өткен жылы осы жерде 15-20 адам арнайы техниканың көмегімен жұмыс істеп, күзде дайындық шаралары атқарылған болатын,- дейді Омская көшесіндегі 3-ші үйдің тұрғыны.
Бұл пікірді аталмыш ауданның тағы бір тұрғыны Юрий Костиченко да қуаттап отыр. Оның сөзіне қарағанда, дәл осындай жағдай жылда қайталанып отырады екен. Дей тұрғанмен де осыған тікелей жауапты органдарды аталмыш мәселе қатты алаңдатпайтын сынды деп налиды Омская көшесінің тұрғыны.
— Осы көшеде тұрып жатқаныма біраз уақыт болды. Арық арам шөпке толған кезде, мердігерлер бір рет өтіп шығып, сонымен істі аяқтады. «Қыстың қамын жаз ойла» демекші, мұның барлығын ескеріп, ертерек қимылдау қажет емес пе еді? Арықтың көзі үнемі қатып қалады. Бұрын судың арнасы осы маңдағы мектептің жанынан өтетін. Ал бүгінде оны біздің көше арқылы жіберіп, су басу фактісі жылда қайталанады. Мәселен, қазірдің өзінде су азық-түлік сақтайтын жер асты қоймаларына кіріп, үйіміздің іші дымқылданып кетті. Бұл тұтастай ауданның ортақ базынасына айналды,- деп кейіді Ю.Костиченко. — Көліктердің кедергісіз қозғалуын қамтамасыз ету мақсатында құбырларды да өзіміз орнаттық. Себебі онсыз жедел жәрдем және өрт сөндіру қызметі көліктерінің бұл жаққа қатынауы мүмкін емес. Бұған қоса судың бетін сәл болса да қайтару үшін жергілікті тұрғындар бөгет әзірлеп тырысуда,- дейді көше тұрғыны.
Ал жергілікті билік өкілдері болса жағдай бақылауда деп санайтындарын айтады. Қала әкімінің орынбасары Николай Ушаков қалалық ТЖБ-ның қызметкерлерімен бірлесіп осы мәселе бойынша арнайы рейд жүргізіп үлгеріпті.
— Қалаға шамадан тыс қар жауып, оның соңы қатты аязға ауысқанын білесіздер. Осының салдарынан арықтар қатып қалды. Қазір тазарту жұмыстары жүргізіліп жатыр. Ауданның белсенді тұрғындары да көмектесуде. Арнайы жұмыс комиссиясы құрылды. Жергілікті атқарушы органдар бақылау жүргізуде. Мердігер мекемелердің жұмысшы құрамының саны мен ыстық суды әкелу барысын қадағалауды күшейтеміз. Сонымен қатар тұрғындарға да түсіндіру шаралары жүргізіліп келеді. Өйткені қар мен тұрмыстық қалдықтарды да арыққа тастайтын жағдайлар анықталып отыр,- деген Николай Ушаков бұл да өз кезегінде жағдайдың қиындауына әсерін тигізбей қоймайтынын атап өтті.
Жақсылық СҮЛЕЙМЕН, «Семей таңы»
