Семей қаласында дәстүрлі түрде ұйымдасты-рылатын «Күн әлемі» фестивалі өз мәресіне жетті. Тәуелсіздіктің 25 жылдығына арналған игі шараның ұйытқысы – «Исток» қоғамдық бірлестігі. Семей қалалық ішкі саясат бөлімінің қолдауымен ұйымдастырылған мүмкіндігі шектеулі балаларға арналған ауқымды шара биыл оныншы рет өткізілді. Игілікті іс-шараға қала әкімі Ермак Сәлімов қатысып, дәстүрлі фестивальға қатысушылардың қуаныштарына ортақтасты.
— Құрметті балалар, бүгінгі фестиваль ел Тәуелсіздігінің 25 жылдығына орай ұйымдастырылып отыр. Мұндай шаралар жиі өткізілуі тиіс. Бүгінгі күні елімізде жастарға ерекше назар аударылып келеді. Сіздердің келешектеріңіз үшін балабақшалар мен мектептер салынуда. Бұл жұмыстар Семей шаһарында да кеңінен қолға алынған. Баршаларыңызды бүгінгі мерекелеріңізбен құттықтаймын. Болашақта үлкен жетістіктерге жетеді деп сенеміз,- деді қала әкімі Ермак Бидахметұлы.
Өнер мерекесіне арнайы мектептерде оқып жатқан бүлдіршіндер мен мектеп жасындағы балалар қатысты.
Ал ауқымды шараға 300-ге жуық жас дарындар келіпті. Шараның басты мақсаты – мүмкіндігі шектеулі балаларға өз өнерлерін танытуға мүмкіндік жасау.
— Биылғы жылғы дәстүрлі фестивалімізді ерекше деп санаймыз. Өйткені шара Тәуелсіздігіміздің 25 жылдығымен сәйкес келіп, ағымдағы жылы оныншы рет өткізіліп отыр. Ауқымды шараның балалар арасында үлкен қызығушылық туғызып отырғанына қуанамыз,- дейді «Исток» қоғамдық бірлестігінің директоры Людмила Михайлова.
Вокал, хореография және актерлік шеберлік сабақтары жеткіншектердің тек өнерлерін ғана шыңдап қоймай, сонымен қатар физикалық тұрғыдан жетіліп, қоғамға тез бейімделуіне де ықпал етеді. Фестиваль соңында тамаша өнерлерін паш еткен балғындарға сый-сияпат көрсетіліп, үздік танылғандары арнайы марапаттауларға ие болды.
Асан МЫРЗАХАН,«Семей таңы»
