Қазақстан азаматтарын уақытша мекенжайы бойынша тіркеуге алу туралы заң қазір қызу талқыланып, сынға ұшырауда. Осы ретте Семей қаласының ІІБ-да жаңа Заңды жан–жақты түсіндіруге арналған баспасөз мәслихаты ұйымдастырылды.
Аптаның алғашқы жұмыс күні аталған мәселе бойынша Семей қаласы ІІБ көші-қон полиция бөлімінің инспекторы Ержан Жапанов баспасөз мәслихатын өткізді. Ол елімізде азаматтарды уақытша мекенжайы бойынша тіркеу туралы көші-қон заңдарына енгізілген түзетулер биылғы жылдан бастап күшіне енгенін, ендігі уақытта тіркеудің міндетті талапқа айналғанын атап өтті.
Оның айтуынша, енді тұрғылықты жерінен тысқары жерге бір айдан асатын мерзімге барған әр қазақстандық Халыққа қызмет көрсету орталығына барып, мемлекеттік баж салығы ретінде 227 теңге төлеп, уақытша мекенжайы бойынша тіркеуге тұруға тиіс. Бұл талап қонақ үйде тұрып өзге қалада жұмыс істейтін адамдарға да, өзге қаладағы ауруханада жатып ұзақ емделетін адамдарға да қатысты болып отыр. Алғашқыларын қонақ үй орналасқан мекенжай бойынша, ал екіншілерін емделетін орны бойынша тіркейді. Бұл талапты орындамағандарға жеті АЕК (айлық есептік көрсеткіш) көлемінде, яғни 16 мың теңге айыппұл салынады.
— Бүгінгі күні Семей қаласындағы екі Халыққа қызмет көрсету орталығында уақытша тіркеу бойынша тиісті жұмыстар атқарылып жатыр. Жаңа Заңда уақытша тіркеуге ерекше көңіл бөлінген. Оған сәйкес, өзге облыстар мен қалалардан келген азаматтар көші-қон полициясына жүгініп, уақытша тіркеуге тұрулары шарт. Бұл терроризмге қарсы күрес шараларын күшейтіп, азаматтардың ел ішінде жүрі-тұруын бақылауға мүмкіндік береді. Заң қабылданған алғашқы екі күннің ішінде Семей қаласы бойынша уақытша және тұрақты тіркеуге 314 адам келді,- дейді инспектор.
Уақытша тіркеуге тұру тәртібі бұрыннан бары белгілі. Бұл жолғы өзгертулер тек мерзімін үш айдан бір айға азайтуға және айыппұлды ұлғайтуға ғана қатысты екен. Шыны керек, бүгінде түзетулердің түсініксіз тұстары қоғамда қызу талқыланып жатыр. Айталық, жаңа Заң бойынша, адамның дәл қай күні келгені қалай анықталатыны түсініксіздеу. Негізі, көші-қон заңдарына енгізілген түзетулер салдарынан тәртіп сақшылары қиналайын деп тұр. Салмақ та соларға түседі. Осыдан-ақ терроризмге қарсы заңды әзірлеу барысында тіркеу туралы тармақтың дұрыс талқыланбағаны көрініп тұр. Әйтпесе қоғамда осынша дау тудырып, халықтың қарсылығына ұшырамас еді.
Айта кетейік, жаңа нормалар — 2016 жылғы желтоқсанның 22-сі күні Президент Нұрсұлтан Назарбаев қол қойған «Қазақстан Республикасының кейбір заң актілеріне экстремизм мен терроризмге қарсы іс-қимыл мәселелері бойынша өзгерістер мен толықтырулар енгізу туралы» Заңның бір бөлігі.
Асан МЫРЗАХАН,
«Семей таңы»
