Ақпан айының 7-сі күні Үржар ауылындағы Абылайхан көшесінің бойындағы 16 пәтерлі екі қабатты №85 үйде түскі уақытта аяқ астынан өрт шыққан болатын. Аудандық №60 және қосымша Мақаншы №15 өрт сөндіру және апаттық құтқару қызметі өртке оранған жерге тез арада жетіп, тілсіз жауды ауыздықтауға тырысты.
Алайда, 1949 жылы қолданысқа берілген ескі тұрғын үй қамыс пен тез жанғыш ағаштан салынғандықтан, толықтай аман алып қалуға дес бермеді. Өрт сөндіру құрамының шапшаңдығы мен жіті қимылының арқасында тұрғындардың материалдық құндылықтары тез арада сыртқа шығарылып, зардап шеккен адамдар болмады.
Оқиға орнында, ШҚО өрт сөндіру бөлімінің орынбасары Дмитрий Титовтың айтуынша, өрттің шығу себептерін ШҚО Төтенше жағдайлар департаментінің өрт сөндіру зертханасы тексеру үстінде екен. Құтқару кезінде 4 бірлік өрт сөндіру, 3 су тасығыш техникасы жұмылдырылып, Үржар АІІБ коммуналдық мемлекеттік мекемесі, аудандық әкімшілік пен тиісті мекемелер ұйымшылдық танытып, көмекке келді. 400 шаршы метр аумақты алып жатқан тұрғын үйдің 300 шаршы метрі мүлдем жарамсыз деп танылып отыр.
Аудан әкімі Серік Зайнулдиннің тапсырмасына орай, қызыл жалынға оранған нысанның тұрғындары орталықтағы «Вайн» қонақ үйіне орналастырылып, оларға алғашқы көмек көрсетілді. Осы ретте ауданымызға Елбасы Жолдауын халыққа түсіндіру жұмыстарымен келген ҚР Парламенті Мәжілісінің депутаты Н.Сабильянов та оқиға орнына ат басын бұрып, аудан әкімі Серік Зайнулдинмен бірге зардап шеккен тұрғындармен кездесті. Халық қалаулысы апат болған орынға барып, одан кейін қонақ үйде уақытша тұрып жатқан тұрғындардың жағдайларымен танысып, рухани қолдау көрсетті.
Нұртай Салихұлы:
— Баспана мәселесі мен апат себептері Төтенше жағдайлар комитеті шығарған қорытындылардан кейін белгілі болады. Аурухана мен мектептер тарапынан да көмектер көрсетіледі. Денсаулықтарыңызға немқұрайлық танытпай, міндетті түрде дәрігерге тексеріліңіздер. Құжаттарыңыз бен зардап шеккен азаматтардың жеке куәліктерінің барлығы әкімшілік тарапынан қалыпқа келтіріледі. Дипломдарыңызды алу үшін жоғары оқу орындарына өтініш жазып, көшірмесін алдыру керек. Үкіметке де, облыстағы тиісті органдарға хат жазып, сіздердің жағдайларыңызды жеткіземін,- деді.
Аудан әкімі Серік Зайнулдин:
— Алдағы уақытта әрқайсы-ларыңызды жеке-жеке қабылдап, түскен қаржыға байланысты көмек көрсетеміз. Сіздерге Нұртай Салихұлы 500 мың теңге қаржылай көмек беріп отыр. Аудан көлемінде «Ақ ниет» қоры құрылып, бастама ретінде өзімнің де жалақымнан жүз мың теңге қаражат аудардым. Ауданымыздағы қалталы азаматтар, барлық мекемелер мен ұйымдар елдігімізді көрсетіп, шама-шарқынша жәрдемдерін беріп, қолдау көрсетуде. Бірде-бір адам қараусыз, ескерусіз қалмайды. Алдағы уақытта ел болып, халық болып барлығын шешеміз. Барлық ауыртпалық артта қалады,- деді аудан басшысы.
Бауыржан ЖАҚЫП,
«Семей таңы»
