Семей қалалық мәслихатының кезектен тыс он үшінші сессиясы өтті. Сессия жұмысына қала әкімінің орынбасары Қайрат Ерембесов, прокуратура мен қоғамдық ұйым өкілдері, қалалық әкімдіктің дербес салалық бөлім басшылары мен БАҚ өкілдері қатысты.
Сессияның күн тәртібінде екі мәселе қаралды. Семей қаласының 2017-2019 жылдарға арналған бюджеті туралы шешіміне өзгерістер енгізу және Семей қаласының ауылдық елді мекендерге жұмыс істеу және тұру үшін келген денсаулық сақтау, білім беру, әлеуметтік қамсыздандыру, мәдениет, спорт және агроөнеркәсіптік кешен саласындағы мамандарға 2017 жылға арналған әлеуметтік қолдау шараларын ұсыну туралы экономика және бюджеттік жоспарлау бөлімінің басшысы міндетін атқарушы Сәуле Қасенова баяндады.
Сәуле Қасенованың айтуынша, ағымдағы жылы қала бюджеті 319 млн. 639 мың теңге көлеміне артқан, оның ішінде 420 млн. 58 мың теңгесі облыстық трансферттер есебінен болса, бұған қоса қосымша 1 млрд. 264 млн. теңге трансферттер бөлініп отыр. Сонымен бірге РК-3 жылу орталығын қайта жаңғырту үшін 397 млн. теңге, Жас алаш және Степной кенттеріндегі тұрғын үйлерді электрмен жабдықтауға 55 млн. теңге, Қарағайлы шағын ауданындағы жылу желілерінің құрылысына 48 млн. теңге, жылу нысандарын ағымдағы жөндеу жұмыстарына 162 млн. теңге, қаланың жолдарын орташа жөндеуге 399 млн. 999 мың теңге қарастыру жоспарлануда. Ал нәтижелі жұмыспен қамту және жаппай кәсіпкерлікті дамыту бағдарламасын жүзеге асыруға 102 млн. теңге бөлінбек. Сонымен қатар трансферттер есебінен 844 млн. теңге қысқартылып отыр. Атап айтар болсақ, қаланы абаттандыруға, балабақшаларға инженерлік желілерді жөндеуге, 200 орынға арналған балалар ауруханасына және оңалту орталығына бөлінген қаражаттан жалпы көлемі 437 млн. 200 мың теңге шегерілмек.
Бөлім басшысының міндетін атқарушы Сәуле Қасенова сессияның күн тәртібіндегі екінші мәселеге де тоқталып, ауылдық елді мекендерге жұмыс істеу және тұру үшін келген денсаулық сақтау, білім беру, әлеуметтік қамсыздандыру, мәдениет саласындағы мамандар үшін әлеуметтік қолдау шаралары маңызды екенін атап өтті.
Сәуле Ерғазықызының мәліметінше, 2009 – 2016 жылдар аралығында білім саласының 86 маманына, денсаулық сақтау саласының 12 маманына және мәдениет саласының 1 маманына 90 млн. теңге көлемінде әлеуметтік қолдау көрсетілген.
Ал ағымдағы жылдың бюджетінде 10 маманның көтермеақысына 1 млн. 588 мың теңге, сондай-ақ төрт маманға несие алулары үшін 13 млн. 614 мың теңге қарастырылып отыр.
Сессияда көтерілген сұрақты қалалық мәслихат депутаттары бір ауыздан қолдады және шешім шығарды.
Асан МЫРЗАХАН,
«Семей таңы»
