Елбасы өзінің «Қазақстан – 2050: бір ел, бір болашақ, бір мүдде» атты Жолдауында кәсіпкерлік саласына айрықша қарқын беріп, ел игілігін еселеу жолындағы міндеттемені Мәңгілік Ел идеясының құрамдас бөлігі ретінде атап көрсеткені белгілі. Өңірдің әлеуметтік-экономикалық көрсеткіші жергілікті жердегі ашылып жатқан кәсіпорындардың, нақтырақ айтқанда олардың отандық нарықты қамтамасыз етуі мен бәсекелестік ортаға бейімділігімен де сыналары белгілі. Бұл орайда Семейдегі жаңадан ашылып жатқан іргелі кәсіпорындардың заманауи жабалар аясында инновациялық технологияларға арқа сүйеуі қаланың әлеуеттілігін де еселей түсуде. Оған бірден бір дәлел ретінде өткен сенбі күні ашылған «Коndiz» фабрикасын айтуға болады. Өткен сенбі күні орын алған шараға облыс әкімі Бердібек Сапарбаев арнайы келіп қатысты. Кондитерлік өнімдермен тек өңірді ғана емес, күллі облысты қамтамасыз етуге қауқарлы кәсіпорынның тынысымен танысқан аймақ басшысы жолға қойылған бұл іске жоғары баға берді.
Семей қаласы Кеңес дәуірі тұсында жеңіл өнеркәсіп саласына, оның ішінде тамақ өндіру ісі бойынша алдыңғы қатардан табыл- ғаны аға буынға жақсы мәлім. Сол заманда шетелге экспортталатын өнімдер қатарында да қаламызда жасалған азық-түлік тауарлары өтімді болатын. Қазіргі күні шаһарымыз өндіріс қуатын еселеу ар-қылы байырғы атағын біртіндеп қайтару үстінде. Бұлай деуімізге өңірдегі азық-түлік белдеуінің тұрғындарды көкөніс және етпен 100 пайыз қамту, сондай-ақ, бұл өнімдерді республикамыздың өзге өңірлеріне шығаруы негізгі себеп бола алады. Мәселен, жаңадан ашылған кондитерлік фабрика ұннан жасалынған, ұзақ мерзімге сақтауға арналған, тасымалдауға қолайлы өнімдер шығаруға маманданған. Айта кету керек, негізгі өнім түрлері крекерлер, галеттер, қантты печенье, созылмалы және қатпарлы, сондай-ақ салындысы бар печенье мен бисквитті өнімдер екен. Қысқасы әртүрлі таңдаудағы тәттілердің бірнеше түрін сапалы етіп шығаруды көздеп отыр.
{jcomments on}Бердібек Сапарбаев ілтипат білдіріп, Қазақстан Республикасы Парламенті Сенатының депутаты Талғатбек Абайділдинге аталмыш фабрикадағы өндірісті салтанатты түрде іске қосуды ұсынды. Аппаратурадағы рычаг қозғалысқа келтірілген соң, қамыр илеу бөлімінде процесс басталып, көп уақыт өтпей-ақ даяр болған өнімдерден ауыз тию мүмкіндігі туды. Ып-ыстық қытырлақ крекерлер сол сәтте дайын қораптарға салынып, шағын қызметтік көліктермен қоймаға жөнелтіліп жатты.
Осыдан соң облыс әкімі Бердібек Сапарбаевты фабриканың қазіргі үлгідегі құрылғыларымен таныстырған кәсіпорын басшысы Мәди Өмірзақ кондитерлік өндіріс саласында жетекші орынға шыққан германиялық «Werner Pfleider» фирмасының аппаратураларымен жабдықталғанын жеткізді.
— Жалпы, бұл жобаға құйылған инвестиция көлемі 2,6 млрд. теңгеден астам. Жоспар кедергісіз жүргізіліп, уақытында жүзеге асырылды. Қазіргі уақытта фабрикада крекер шығаратын екі автоматтандырылған желі жұмыс жасауда. Өндіріс орны толығымен орталық басқару пульті арқылы компьютермен басқарылады. Ал бұл жайт өз кезегінде жоғары сапалы өнім шығаруға толық мүмкіндік береді. Дәл қазіргі күні осы желілер арқылы крекерлер, қантты және созылмалы печенье шығарып отырмыз, — деді өз сөзінде Мәди Өмірзақұлы.
Шетелдік су жаңа автоматпен жабдықталған фабрика жұмысына Бердібек Мәшбекұлы қызығушылықпен қарап, бірқатар сұрақтар қойды. Кәсіпорын басшысының берген жауабына сүйенсек, өндірістің алғашқы кезегінің қуаты күніне 20 тоннаға дейінгі немесе жылына 12 мың тонна дайын өнім шығаруға есептелген. Жалпы, аталмыш кәсіпорын өндіріс толықтай іске қосуды төрт кезең бойынша жүзеге асыруды көздеуде. Ағымдағы жылы тағы екі кезең іске асырылмақ. Ал бұл өз кезегінде кәсіпорынның өндірістік қуатын арттырып, шығарылатын өнім ассортиментін кеңейтуге толығымен мүмкіндік бермек.
Тағы бір ерекшелік, бұл кәсіпорынның өзге кондитерлік фабрикалардан ерекшелігі көп көрінеді. Атап айтсақ, өндірісті басқару толығымен автоматтандырылған. Былайша айтқанда, процесті бастау мен аяқтау небары компьютердің екі клавишасына ғана тәуелді. Сондай-ақ, бұл автоматтардың қоданылу мерзімі анағұрлым ұзақ, сенімді әрі қоршаған ортаға зиян тигізбейді. Сондай-ақ, өндірісте 100 пайыз табиғи компоненттер пайдаланылады. Айтпақшы, кәсіпорында тек отандық шикізат пен материалдарды ғана пайдаланылады. Мұның өзі жергілікті нарықтың реттелуіне де көмегін тигізбек.
Осында әзірленіп, пісіріліп, де-густациядан өткеннен кейін осы жерде қорапталады екен. «Қазақстанда жасалған» деген маркамен саудаға шығарылатын кондитерлік өнімдер негізінен қазақстандық нарықты қамтиды. Алдағы уақыттарда Орта Азия елдеріне шығу жоспарланып отыр. Бұл тарапта кәсіпорын басшысына пікір білдірген Бердібек Мәшбекұлы фабрика өнімдерінің отандық нарықтағы бәсекелестікке төтеп беру мүмкіндіктерін ескерулері қажеттегін де ескертіп өтті.
Мәди Өмірзақұлы сонымен қатар кадр мәселесіне де тоқталып өтті. Бүгінгі таңда фабрикада 200-ге тарта адам жұмыс істейді екен. Басым көпшілігі өзіміздің қаракөздер. Оның үстіне бірлі-екілі алматылық технологтардан басқасы түгелдей дерлік өз қаламыздың тұрғындары. Атап айтқанда, жергілікті Шәкәрім университетінің түлектері көп екен. — Алдағы уақыттарда өндіріс көлемін арттыра отырып, жұмысшылар санын 330-ға жеткізуді көздеп отырмыз, — дейді бұл тарапта түсінік берген фабрика басшысы.
Осылайша, отандық тамақ өнеркәсібінде жаңа фабрика алғашқы қызметін бастады. Бірінші кезекте өңірдегі тұтынушылар сұранысын қанағатандырып, отандық нарықты қамтып, қала берді шетелдерге өнімдерін экспорттауды көздеп отырған кәсіпорын басшылығына облыс әкімі алдағы еңбектеріне табыс тіледі.
Қуаныш ЖОЛЫМБЕТ,
«Семей таңы»
