22 қыркүйек күні БҰҰ, БҰҰ-ның Балалар Қорының даму бағдарламасы, көші-қон бойынша халықаралық ұйымдар, Еуразиялық қауіпсіздік ынтымақтастық ұйымының қолдауымен, ҚР Еңбек және халықты әлеуметтік қорғау министрлігінің ұйымдастыруымен Астана қаласында әлеуметтік қызметкерлердің бірінші қазақстандық форумы өтеді. Онда әлеуметтік жұмыстағы менеджмент, әлеуметтік қызметкерлерді даярлау және біліктілігін арттыру, арнаулы әлеуметтік қызмет көрсетуде коммерциялық емес ұйымдардың қатысуын кеңейту, еріктілікті және қайырымдылықты қолдау сияқты өзекті мәселелер назарға алынады. Форум қарсаңында Семейдің әлеуметтік қызметкерлері аптаның бірінші күнінде Абай атындағы кітапхана қабырғасында өткен дөңгелек үстелде бас қосты. Жиында қаладағы әлеуметтік жұмыстың даму ерекшеліктері мен мүмкіндіктері талқыланып, мүмкіндігі шектеулі жандарға, қарттарға, баспанасыз жандарға, тұрмыстық зорлық-зомбылық және адам саудасы құрбаны болғандарға кәсіптік көмек көрсету мәселелері сөз болды.
Әлеуметтік қорғау саласы қызметкерлерінің басты қызметі – адамдарға қамқор болу. Ал әлеуметтік қызметтің сапасы мен тиімділігін арттыру үшін әлеуметтік қызметкердің біліктілігін, содан кейін статусын көтеру қажет екенін алға тартқан «Жанұя орталығы» қорының президенті Жана Жыбраева еліміздің оқу орындарында осы салада арнайы маман даярлайтын оқу бөлімдерін ашу керек деген ұсынысын бірінші болып ортаға салды. — Бүгінгі таңда әлеуметтік қызметкер құқықтық жағынан қорғалмаған. Сондықтан ол бір жағынан мемлекетке, екінші жағынан өзі қызмет көрсететін адамға жұмыс істейді. Әлеуметтік сала қызметкерлердің басым көпшілігі өз құқықтарын толық біле бермейді. Демек, ол да белгілі бір көмекке мұқтаж. Осы және өзге де өзекті мәселелер көтерілетін форум – мемлекеттің игілікті бастамасы. Атап өту керек, 2011 жылы Қазақстанның әлеуметтік қызметкерлердің Ассоциациясы құрылған болатын. Сол уақыттан бері республиканың түгел әлеуметтік сала еңбеккерлерінің басын біріктіретін ауқымды іс-шара ұйымдастырылмады. Форум қарсаңында өткізіліп отырған осы жиында айтылған барлық талап-тілектер, ұсыныс-пікірлер республикалық дәрежеде талқыланатын болады, — деді Жанна Жыбраева.
Семей қаласы әкімінің орынбасары Надежда Шарова әлеуметтік қызметкерлердің статусын жоғарылату, әлеуметтік қызмет сапасын жақсартуға байланысты өтетін қазақстандық форум – әлеуметтік саясаттағы ең негізгі қадамдардың бірі екенін ерекше атап өтті.
— Шыны керек, бүгінгі күні әлеуметтік қызметкердің еңбекақысы өте төмен. Сапалы қызмет көрсететін білікті қызметкерді жұмысқа тарту үшін бұл олқылықтың орнын толтыру керек. Әлеуметтік қызметкер тағдыр тауқыметін тартқан, қиындықтарға тап болған жандарға ең бірінші болып қол ұшын беретін, жүрегі мейірім мен ізгілікке толы әмбебап маман. Дей тұрғанмен, олардың статусы қазіргі заманға сай талаптар көшінен қалып қойғаны алаңдатады. Осы дөңгелек үстел басында әлеуметтік қызметкерлер тарапынан айтылған ұсыныстар министрлікке жетіп, тиісті шешімдер қабылданатынына кәміл сенеміз,-деді Надежда Шарова.
Ел тәуелсіздігін алған жылдары арнаулы әлеуметтік қызмет көрсетудің белгілі бір стандарттары болмағанын тілге тиек еткен Семей қаласы жұмыспен қамту және әлеуметтік бағдарламалар бөлімінің басшысы Азамат Құрманғалиев, бүгінде қаладағы әлеуметтік қызметтің сапасы өткен жылдармен салыстырғанда біршама жақсарғанын айтады. Ал қазіргі күні халықаралық тәжірибелерге сүйену негізінде стационарлық үлгідегі, жартылай стационар, уақытша орналасу, күндізгі стационар, үйге қызмет ету сияқты алты бағыт бойынша арнаулы әлеуметтік қызмет көрсету стандарттары жасалған.
— Қалада жалғызбасты зейнеткерлер мен мүмкіндігі шектеулі балаларға үйге қызмет көрсету, күндізгі стационар бойынша 3 орталық жұмыс істейді. Арнаулы әлеуметтік қызмет көрсетудің екі орталығы бар. Мүгедектерді сурдо-тифло, гигиеналық құралдармен, арбалармен қамтамасыз етуге жергілікті және республикалық бюджеттен қомақты қаржы бөлініп отырады. Семейде әлеуметтік көмекке мұқтаж 3 мың адам бар. Олармен 300-ден астам әлеуметтік қызметкер жұмыс істейді. 25 жыл ішінде мол тәжірибе жинап үлгердік. Нәтижесінде әлеуметтік қызмет түрлерін көрсететін екі орталық ШҚО бойынша әдістемелік алаңға айналды. Бұл дегеніміз, Семейдегі әлеуметтік жұмыс жақсы жолға қойылғанын аңғартады, — дейді жұмыспен қамту және әлеуметтік бағдарламалар бөлімінің басшысы Азамат Құрманғалиев.
Жиында өз ойын, ұсынысын ортаға салғандардың қатарында ШҚО Денсаулық сақтау басқармасы басшысының Семей өңірі боынша орынбасары Гүлнар Шәріпова бар. Оның айтуынша, әлеуметтік қызметшінің жұмысы сан қырлы мамандықты қамтиды. Сондықтан әлеуметтік қызмет көрсетуді бір жүйеге келтіріп, реттеп отыратын бірыңғай нормативтік акт қабылдануы керек. Осы заң аясында әлеуметтік қызметкердің жалақысын қарастыратын арнайы баптар енгізілуі тиіс деген ұсынысын білдірді ол. Себебі әлеуметтік қызметкердің жұмысы өте күрделі. Денсаулығы, жүйкесі сыр берген, ауыр жағдайға душар болған адамдармен жұмыс істейтінін ескерсек, аталмыш сала мамандарының еңбек демалысына қосымша күндер белгілеп, еңбекақысын өсіру артық етпейді дегенді алға тартады Гүлнар Шәріпова.
Дөңгелек үстел барысында қаралған әлеуметтік қызметкерлердің мәселелері, ұсыныстар қыркүйектің 22-де Елорда төрінде өткізілетін республикалық форумда қаралатын болады.
Жібек СЕРҒАЗЫ, «Семей таңы»
