Редакциямызға қос бірдей арыз арқалап, қалаға қарасты Достық ауылдық округінен зейнеткер келді. Өзін Жұмағали Исағұлов деп таныстырған қария осы ауылдың ардагерлер кеңесінің төрағасы екен. Ақсақалды алаңдататын негізгі жайттың бірі – мынау. Бүгінгі таңда Достық ауылдық округіндегі 258 адам зейнет жасындағылар. Солардың 158-і өз зейнетақыларын банк карточкалары арқылы алатын болса, қалған 98-не қалыптасқан дәстүр бойынша «Қазпочта» мекемесінің ауылдағы бөлім-шесінен қолдарына тиеді екен. Негізгі мәселе де осы «Қазпочта» бөлімшесінің зейнеткерлерге ыңғайсыз жерде орналасуына қатысты. Бұрын ауылдық әкімдік ғимаратының бір бөлмесін жалдап отырған «Қазпочта» енді «жылы орындарын» суытса керек. Бұған арызданушының көңілі мүлдем толмайды.
— Біз соңғы 20 жылдан артық уақыт зейнетақымызды ауылдық әкімдікте орналасқан пошта бөлімшесінен алып келдік. Бәрі дұрыс болатын. Ауыл қарияларына да ыңғайлы еді. Енді міне, бізге еш ескертпес-тен, ақылдаспастан 2015 жылдың мамыр айында сол бөлімшені ауылымыздағы бір дүкеннің екінші қабатына көшірді. Жас болсақ, бір сәрі, қартайған шағымызда ешбір жағдайы жасалмаған екінші қабатқа шығып–түсудің өзі біз үшін қиямет–қайым. Жаздың аптап ыстығы мен қыстың қақаған аязында еріксіз сол жерге баруға мәжбүрміз. Осы мәселеге байланысты ауыл әкіміне, қала әкімдігіне арызданған едім. Қалаға жазған арызыма кәсіпкерлік бөлімінен мәселені оңтайлы етіп шешуді қарастырып жатырмыз деген жауап алсам, ауыл әкімінен ешбір дыбыс та жоқ. Сөздің шыны керек, ауылдық округ әкімінің бұл әрекетіне таңғалып отырмын. Жауап бермегені көзіне ілмегені ме, түсінбедім. Бір ауылдамыз ғой, жолығып та айт-тым. Бітпейтін сырғытпа, шығарып салма жауап естимін. Екінші арызым, бәйбішеміз екеумізге 1998 жылы сол кездегі Семей қалалық жер қатынастары және жерге орналастыру жөніндегі комитет 32 гектар жерге ие екенімізді растайтын куәлік берген. Яғни біздің отбасымызға тиесілі осындай көлемде жер бар деген сөз. Міне, осы жерді даулап, сұрасам да мардымды жауап ала алар емеспін, — дейді арыз-данушы ақсақал.
Айтылған арыз бойынша тиісті орындарға хабарластық. Қарсы тараптың айтар өз уәждері бар. Мәселен, ауылдағы «Қазпочта» бөлімшесінің көшірілгеніне байла-нысты ауыл әкімі мен Семейдегі пошта мекемесі басшыларының жауаптары бір жерден шықты.
— Рас, ауыл зейнеткерлері ұзақ уақыт бойы ауылдық округ әкімдігі ғимаратында орналасқан пошта бөлімшесінен өз зейнетақыларын алып келді. Бұл жерде пош-та бөлімшесін екінші орынға көшіруімізде бәзбіреулердің сойылын соғу болмаса бас пайдасы көзделген жоқ. Түсінікті болу үшін ашып айтайын, әкімдік ғимараты 1986 жылы салынған. Ғимаратта әкімдік қызметкерлері, пошта, Қазақтелеком мекемелерінен бөлек, клуб орналасқан. Дегенмен, ғимарат салынғалы бірде-бір мәрте күрделі жөндеу жұмыстары жүргізілген жоқ. Салдарынан оның ішіндегі жылу жүйесі, шатыры толықтай ескірді. Ол жылдағыдай жамап–жасқауды көтермейді, жөндеу керек. Ғимарат қыс мезгілінде өте суық. Сол себептен «Қазпочта» мекемесі өз бөлімшелерін өздеріне ыңғайлы жылы, жарық жерге көшірді. Оларды біздің әкімдікте күштеп ұстап отыруға құқымыз жүрмейді. Әрине, айтып көрдік, ақылдастық. Бірақ олар өздеріне тиімді нұсқаны таңдады. Ал әкімдік ғимаратының шатырын ауыстыру үшін 2,5 млн., жылу жүйесі үшін 5,5 млн. теңге қажет. Біз тиісті сметалық құжаттамасын әзірлеп, «Өңірлерді дамыту» бағдарламасына өткіздік. Енді жауабын күтіп отырмыз. Әлбетте, қариялардың екінші қабатқа көтерілуі қиындық тудырады. Осы мәселе бойынша, пошта орналасқан дүкен иесімен сөйлесіп, мәселені шешуге көмектесуін сұрадық. Жеке кәсіпкер өз дүкені жанынан қосымша нысан салып, поштаны сонда көшіруді жоспарлаған болатын. Алайда, әзірге оған мүмкіндігі болмай тұрғанға ұқсайды. Дегенмен, бізде пошта арқылы зейнетақысын алатын 98 қарияға қолдан келген көмекті жасап отырмыз. Зейнетақы 3 күннің ішінде қолдарына тиеді. Өздері келе алмайтындары болса, үйлеріне дейін апарып береміз. 1-ші кезекте жасы 80-нен асқан қарияларымызды ескереміз, — дейді Достық ауылдық округінің әкімі Нұркен Жарлыкенов.
Ақсақалдың арызда көрсеткен екінші мәселесі бойынша Семей қалалық жер қатынастары бөлімі жерге орналастыру және жер қатынастарының ауылдық округтер бойынша секторының меңгерушісі Дамир Рахимжановқа хабарласып, істің анық –қанығына көз жеткіздік.
— Үкіметтің 90-шы жылдардың соңына қарай азаматтарға пай есебінде жер бөліп бергені рас. Бірақ бұл сол адамға түбегейлі берілді дегенді білдірмейді. Барлық жер мемлекетке ғана тиесілі. Алайда 2003 жылы маусым айының 20 –сы күні жаңадан шыққан ҚР Жер Кодексіне сәйкес, еншісінде пайлары бар әрбір азамат сол жерді 2005 жылдың 1 –ші қаңтарына дейін не өз атына болмаса белгілі бір шаруашылықтың атына рәсімдеуі тиіс болатын. Егер олай жасалмаған жағдайда 1998 жылы берілген жер үлесіне құқы жөніндегі куәліктің күші толықтай жойылады. Егер ақсақал осы белгіленген ережені орындамаған болса, онда атында ешқандай жер жоқ деген сөз. Барлығы заң аясында бекітілген, -дейді сектор меңгерушісі.
Міне, айтылған арызға берілген ресми жауаптар осындай. Бірақ қария мұнымен ғана тоқтамай, жазған екі арызына да жазбаша жауап күтетінін айтып еді кездесуде. Сонда бұл қалай, бір ауылда отырып, үлкенімен кішісі ортақ тіл табыса алмағаны ма деген заңды сұрақ туындайды. Не десек те, аты «Достық» аталса да затына сай болмай тұрған ауылдық округтегі ауызбіршілік ерте ме кеш пе орнағаны дұрыс сияқты. Сіздер қалай ойлайсыздар?
Ермек ИСАБАЕВ, «Семей таңы»
