3 қазан күні Семей қаласы әкімдігінде Діни бірлестіктермен байланыс жөніндегі кеңестің отырысы өтті. Қала әкімінің орынбасары Надежда Шарованың жетекшілік етуімен өткен кеңес отырысында екі мәселе қаралды: Орыс православ шіркеуінің атқарып жатқан тәрбие жұмыстары және бұқаралық ақпарат құралдарындағы діни ахуалдың көрінісі.
Семей қаласының «Воскресенский собор» шіркеуінің басшысы Федор Проскурин Орыс православ шіркеуі тарапынан атқарылып жатқан жастарға тәрбие беру жұмыстарына тоқталды. Семейде төрт православ шіркеуі бар болса, соның ішінде «Воскресенский собор» шіркеуі жанында жексенбілік мектеп жұмыс істейді. 1993 жылы ашылған мектепте бүгінде алтыдан он бес жасқа дейінгі 90 бала діни білім алуда. Оқу аптасына бір рет, яғни жексенбі күні ғана жүргізіледі. Балаларға діни дәрісті педагогикалық білімі бар білікті мамандар береді.
Кеңес мүшелері талқысынан өтіп, отырыста қызу қаралған келесі мәселе діни тақырыптағы мақалалардың бұқаралық ақпарат құралдарында жариялануы болды. Бұған қатысты баяндама жасап, БАҚ-тың қоғамдағы маңызының жоғары екенін атап өткен «Ислам нұры» газетінің бас редакторы Дәулет Тлеубердиев: «Қазіргі уақыттағы БАҚ-тың негізгі қызметі адамдардың түсінігіне, әлеуметтік-психологиялық құндылықтарға, демократиялық және нарықтық қатынастарға негізделген, азаматтық қоғамның талаптарына сай келетін қоғамдық сананы қалыптастыру мен дамыту болып отыр. Бүгінгі таңда отандық журналистика саласында діни бағытты ұстанатын көптеген газеттер, басылымдар бар. Десек те халықтың діни сауатын көтеру бағытындағы жұмыстар өз деңгейінде атқарылып отырған жоқ. Себебі осы тақырыпқа қалам тартатын журналистер, дінтанушылар және дін қызметкерлері көп жағдайда діни мақалаларды жазуға машықтанбаған,- деген ол БАҚ беттерінде Қазақстанның зайырлы мемлекет екені көбірек айтылуы керектігін алға тартты. Дәулет Рамазанұлының сөзінше, діни қатынасты реттейтін заңнамалар көбірек насихатталуы керек. Өкінішке орай, бұл мәселеде әлі де кемшін тұстарымыз бар.
— Ислам құндылықтары – БАҚ біртіндеп көңіл бөле бастаған тақырыптардың бірі. Алайда насихатталатын ислам құндылықтарының аясы мен мазмұны біршама тар. Біз дәрет алу, намаз оқу сынды мәселелерді ғана қозғаймыз да, исламдағы әдеп, имандылық, ислам тәрбиесі сынды негізгі мәселелерді назардан тыс қалдырып жатамыз. Ұлттық тәрбиемен тонның ішкі бауындай астасып жатқан бұл мәселелерді БАҚ өкілдері тереңірек ұғынып, кеңінен дәріптеуі қажет,- деп пікір білдірді Дәулет Рамазанұлы.
Дінтанушы ғалымдардың пікірінше, басқа діннің жетегінде кетіп жатқандардың дені діни түсінігі төмен адамдар мен жастар. Осы ретте Дәулет Тлеубердиев БАҚ-та дәстүрлі емес дінді ұстанған бірлестіктер мен діни ағым өкілдерінің өз қатарына жаңа мүшелерді қабылдау тетіктері, жастардың өзге діни ұйымдарға кіруінің нақты себебі толық ашылып көрсетілмейтінін, осы бағытта тындырымды жұмыс атқару қажеттігін ерекше атап өтті.
— «Сенің Отаның, ұлтың жоқ, Отанды қорғауға хақың жоқ» деп жастар арасында ашық үгіт-насихат жүргізіп отырған діни ұйымдар бар. Оларға қарсы ешқандай амал-әрекеттер жасауға қауқарымыз жоқ. Себебі олар республикада заңды түрде тіркелген. Сондықтан ұлттық салт-дәстүріміздің дінмен сабақтастығы, ұлттық тәлім-тәрбиенің ерекшеліктері жиі насихатталуы керек. Жастардың 55 пайызы діни ақпаратты интернеттен, 12 пайызы БАҚ-тан және 22 пайызы мешіттен алады. Қазақ тілді діни сайттардағы мақалаларға ерекше көңіл аударуымыз қажет. Ресми деректерге сүйенсек, Қазақстанда орыс тілінде 32 мың, ағылшын тілінде 4500 сайт бар. Ал мемлекеттік тілдегі сайттардың саны 4 мыңға жетпеген. Оның тек 10 сайты ғана белсенді түрде жұмыс істейді. Журналистер қауымы ақпарат жариялауда ең алдымен ұрандатушылық емес, ақпараттың нақтылығына көңіл қойса игі. Сонымен бірге берілетін ақпараттың бұқараға жеңіл әрі түсінікті болуы шарт. БАҚ пен діни бірлестіктер және осы саладағы мүдделі барлық мемлекеттік органдар арасында тығыз байланыс орнатылса,- деген ұсынысын білдірді Дәулет Рамазанұлы.
Сөздің шыны керек, қазіргі күні бұл бағыттағы журналистік зерттеу жүргізу, зерттелген тақырыпқа талдау жасау мәселесі ақсап тұр. Бұл ретте бәріне ортақ заңның бар екенін ұмытпау керек шығар. Көп жағдайда журналистің мақала жазуына дәстүрлі емес діни ағымдардың елімізде заңды түрде бірлестік болып тіркелуі көп кедергі болып тұрғанын жасырып қайтеміз.
Жібек СЕРҒАЗЫ, «Семей таңы»
