Қазақ ұлты барда, Алаш қайраткерлерінің есімі өлмейді. Сәрсенбі, 8 қараша күні Орталықтандырылған кітапхана жүйесінде Алматы қалалық әкімдігінің Ішкі саясат басқармасына қарасты Қайым Мұхамедханов атындағы қоғамдық қордың қолдауымен жарық көрген «Алаш ұлағаты» кітабының тұсаукесері өтті. Жинақты құрастырушы — Семей қаласының Шәкәрім атындағы мемлекеттік университетінің профессоры, тарихшы Амантай Исин.
Жинақ екі тілде, 3000 данамен жарық көріпті. Алаш қайраткерле-рінің ұрпағына қалдырған ұлағатты сөздері мен өсиеттері — кітаптың негізгі арқауы.
— Қайым Мұхамедханов атындағы білім және ғылым орталығы соңғы уақытта игілікті істердің бастамасы болып жүр. Өткен жылы, Әлихан Бөкейхановтың 150 жылдығы қарсаңында, биыл, Алашорда үкіметінің 100 жылдығы қарсаңында, көптеген алқалы жиындарды ұйымдастыруға мұрындық болды. Жақында осы орталықтың ұйымдастыруымен Алматы қала-сындағы Ұлттық кітапханада үлкен конференция өтіп, Алаш зиялыларының ұрпақтары бас қосты. Осындай игілікті істердің бастамасы бүгін Семейде жалғасын тауып отыр. Кітапта Алаш зиялылары айтқан ұлағатты сөздер бірнеше тақырыпқа бөлінген. Оқырман кітаптан өзіне керегін тез тауып алады деген ойдамыз. Жинақтың жастар үшін, ел үшін берері көп,- дейді А.Исин.
6 қазан күні Алматыдағы Ұлттық кітапханада ұйымдастырылған конференцияда жинақтың алғашқы тұсаукесері болып өткен. Алаш астанасы саналатын Семей қаласында да кітаптың тұсаукесерін өткізуді жөн көріпті ұйымдастырушылар.
-Осыдан он жыл бұрын құрылған Қайым Мұхамедханов атындағы қор ғалымның ғылыми еңбектерін сақтап, халыққа жеткізуді мақсат тұтады. Алашорда үкіметінің 100 жылдығы қарсаңында осы кітапты жарыққа шығардық. Бұл — Алаш қайраткерлері алдындағы біздің борышымыз. Қайым Мұхамедхановтың әкесі Мұхамедхан Сейітқұлов та белгілі Алаш қайраткері болған. Семейде Алаш қайраткерлері үшін арнайы үй ашқан. Кезінде Ахмет Байтұрсынов Қайым Мұхамедхановты көргенде: «Бұл бала біздің есімімізді жаңғыртады»,- деп айтқан екен. Қайым Мұхамедханұлы Абайдың ақындық мектебін ашқаны үшін 1951 жылы 25 жылға жер аударылса да, алған бетінен бас тартқан жоқ. Әкелі-балалы Қайым Мұхамедханов пен Мұхамедхан Сейітқұлов өз елінің нағыз патриоттары болды,- дейді Дина Мұхамедханова.
Шара Қайым Мұхамедхановтың жеке архивінен алынған алаш-ордашылардың өмірі мен қызметінен сыр шертетін көрмемен жалғасты.
Жадыра ТӨЛЕГЕНҚЫЗЫ, «Семей таңы».
