Достық үйінде Радиотехника және байланыс колледжі ұжымының ұйымдастыруымен «Кәсіптік бағдар беру: мектеп-колледж-кәсіпорын деп аталатын үшжақты ынтымақтастықтың өзекті аспектісі» атты дөңгелек үстел өтті. Дөңгелек үстелге ішкі саясат бөлімінің басшысы Ғалия Смаилова, аталмыш колледждің және бірқатар мектептердің мұғалімдері мен түлектері, жұмыс берушілер қатысты.
Басқосудың негізгі мақсаты – түлектерге кәсіптік бағдар бере отырып, жұмыс берушілер тарапынан колледж түлектеріне қандай талаптар қойылатынын ескеріп, студенттерді сол талаптарға бейімдеу және болашақта осы оқу ошағының студенті болсам деген ниеттегі биылғы жылғы түлектермен, мектептермен ынтымақтаса отырып жұмыс істеудің жаңа үлгісін қалыптастыру болатын.
-Бүгін біз студенттеріміз бен әлеуметтік серіктестерімізді дөңгелек үстелге шақыра отырып, ой бөлісу мақсатын көздеп отырмыз. Бүгінгі біздің бітіруші түлектер ертең түрлі кәсіпорындарда еңбек ететін мамандар. Қолдарына диплом алған түлектер қайда жұмысқа орналасады, қандай әлеуметтік пакетпен қамтылады, қандай жалақы алады деген мәселелер бізді ойландырады, — дейді колледж директоры Оралхан Сартаев.
Тәжірибесі жоқ жас маманның жұмыс табуы қиын. Екінші жағынан оқу ордаларының жұмысы студенттерінің «кетігін тауып қаланғандарына» байланысты бағаланатыны тағы бар. Үстіміздегі жылы аталмыш білім ордасынан 256 түлек түлеп ұшпақ. Олардың әрқайсысын оқу орынында алған мамандықтары бойынша жұмысқа орналастыру колледждің басты мәселесі. Бұл ретте колледжден техникалық мамандық бойынша білім алып шығатын студенттер «Қазпошта» АҚ, «Қазақтелеком» АҚ, «ВИА МЕД» ЖШС және басқа да кәсіпорындарға жұмысқа орналасады екен. Осы кәсіпорындардың өкілдері, яғни, жұмыс берушілер кездесу барысында қазіргі таңда еңбекке араласатын жас мамандарға қандай талаптар қойылатынын айтты. «ВИА МЕД» ЖШС өкілінің айтуынша, медициналық техникаларды құрастыру, техникалық қызмет көрсету және бағдарламалық жөндеу жүргізу үшін ең алдымен жұмысқа орналасушы маман компьютерлік техника, заманауи элементтік базадан хабардар болуы керек. Сонымен қатар, биофизика, химия, термодинамика заңдылықтарын меңгеруі қажет. Дұрыс жөндеуден өтпеген құрылғы орасан зор қиыншылықтар тудыратындығы белгілі. Осылайша, жұмыс берушілер жағы өз талап-тілектерін айтса, түлектер де жұмысқа орналасу тәртібі жайлы сауалдарына жауап алды.
{jcomments on}Дөңгелек үстел барысында қарастырылған тағы бір мәселе – мамандық таңдау. Мамандық таңдау жа-уапты іс екені белгілі, бірақ ұстаздар қауымының айтуынша, кейбір жағдайда ата-аналар балаларының қалауын ескермей, өздері бағыттаған оқу орындарына түсіруге мәжбүр етіп жатады. Жүрек қалауымен келмеген маман ертеңгі күні жұмысты алып жүре алмайтыны да белгілі. Бұл орайда №10 жалпы білім беретін мектептің ұстазы Юлия Крылова мектепте кәсіптік бағдар беру жұмысына тоқталып, әдісімен бөлісті. Ол сауалнама арқылы оқушылардың бейімін анықтау керек деген ойын жеткізді. Сонымен қатар, №21 мектептің мұғалімі Ләззат Мұқанова мектеп-колледж-кәсіпорын тізбегі үнемі байланыста, бірлесе жұмыс істесе, Елбасымыз айтқан бәсекеге қа-білетті мамандар дайындалатын-дығына сенім білдірді.
Колледждің кәсіптік бағдар беру бөлімінің меңгерушісі Фарида Шалова түлектердің жыл сайынғы жұ-мысқа орналасу көрсеткіштерімен таныстыра келе, былтырғы жылы түлектердің 63 пайызы жұмысқа орналасқан. Биыл бұл көрсеткіш оң нәтижеге өзгереді деп күтіліп отыр-ғанын айта кетті.
Әйгерім СӘРСЕНҒАЛИ,
«Семей таңы»
