Сенбі, 10 қараша күні Семей қаласына ШҚО әкімі Даниал Ахметов іссапармен келді. Аймақ басшысы сапар барысында Семей әуежайының қайта құру жұмыстарын, өнеркәсіптік нысандарды тексеріп, «Менің аулам» бағдарламасы аясында жүзеге асып жатқан жұмыстарымен танысып, спорт алаңдарын, Қарағайлы ықшам ауданындағы «Абай Арена» кешенінің құрылыс барысын көріп, бірқатар тапсырмалар берді.
Облыс әкімі Даниал Ахметовтің ісс{jcomments off}{jcomments on}апары 2016 жылдың желтоқсан айында «Нұрлы жол» мемлекеттік бағдарламасы аясында қолға алынған әуежайдың қайта құру жұмыстарын тексеруден басталды. Жобаны іске асыру үшін 10,197 млрд. теңге бөлінген. Бүгінде ұшып-қону жолағы толықтай жөндеуден өтіп, әуежай облысаралық және ауданаралық бағыттардағы ұшақтарды қабылдауда. Қыркүйек айынан бастап Өскемен – Семей – Үржар; Семей — Алматы, Семей — Астана бағыттары бойынша Ан-24 типіндегі ұшақтар ұша бастады.
Жөндеу жұмыстары тамамдалған соң әуежай «В» санатындағы халықаралық ИКАО (Халықаралық азаматтық авиация ұйымы) стандарттарына сай болып, жолаушылар Boeing, Airbus, ИЛ-76 ұшақтарымен қатынайды. Яғни, тәулігіне 25-30 рейске дейін, сағатына 200-300-ге жуық жолаушыға қызмет көрсетуге жол ашылмақ.
— Көріп тұрғандарыңыздай, аэровок-залдың іші мен ұшу алаңдары жаңарып, қайта жөндеу жұмыстары жүргізілді. Қазір әуежайдың сыртқы аумағын қоршау жұмыстары ғана қалды. Оған арнайы жоба қабылданды. Өткен мәслихат сесиясында 300 млн. теңге қаржы бөлінді. Алдағы уақытта тендер өтеді,- деді «Терезе» мердігер компаниясының басшысы Лұқбек Тұмашинов.
Осыдан соң Даниал Кенжетайұлы компания басшысы Лұқбек Тұмашиновке бірқатар тапсырмалар берді.
— Жақсы дизайнер мамандармен жұмыс істеңіздер. Сұрғылт түстерді ашық түстерге ауыстыру керек. Өйткені жолаушылар әуежайдан жеңіл атмосфераны сезінуі керек, — деді Д.Ахметов.
Бұдан кейін облыс әкімі «Менің аулам» бағдарламасы аясында Қостанай көшесі, 79 және Мамай батыр, 92 мекенжайларындағы көп қабатты үйлердің аулаларында салынған спорттық жаттығу алаңдарын көрді. Аталмыш үйлердің тұрғындары Даниал Кенжетайұлына ризашылықтарын білдірді.
— Елбасы Н.Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауында медициналық қызмет сапасы халықтың әлеуметтік көңіл-күйінің аса маңызды компоненті екенін атап өтіп, осыған орай бірқатар тапсырмалар жүктеген болатын. Бұл бағытта бізде қандай жұмыстар атқарылды? ШҚО келер жылы медицина саласы бойынша халықаралық стандарттарға сай болатын еліміздегі жалғыз облыс болмақ. Сіздер қалалық Жедел жәрдем ауруханасына барсаңыздар, жаңа құрал-жабдықтармен қамтылғанын көресіздер. Желтоқсан айының соңында мол мүмкіншіліктерге ие гибридті ота бөлмесі ашылады. Мұндай ота жасауға арналған операция бөлмесі Ресей мен ТМД елдерінде жоқ. Демек, облыс халқы шет мемлекеттерге баруға мұқтаж болмайды. Керісінше, олар бізге келетін болады. Аягөз қаласында инсульт орталығы мен үшінші деңгейлі перзент-хана аштық. Зырян қаласы мен ауданы бүгінде Алтай болып өзгертілді. Онда да осындай орталықтар ашылды. Дәрігердің біліктілік деңгейі осыған сай болуы қажет. Мамандардың шет мемлекеттерде білім алуына жағдай жасап отырмыз. Биыл Англиядан 78 дәрігер оқып келсе, келесі жылы 150 маман біліктілігін арттырады. Қаламыздағы дәрігерлер үшін 32 рет шеберлік сыныптары ұйымдастырылды,- деді денсаулық сақтау саласындағы жағымды жаңалықтармен бөліскен Даниал Кенжетайұлы.
Аймақ басшысы Елбасы Н.Назарбаевтың жастардың жаңа технологияларды меңгеруіне көп көңіл бөліп отырғанын атап өтті. 2020 жылға дейін елімізде 1000 IT-сынып ашу жоспарда бар.
— Біздің өңіріміздегі әрбір толық комплектілі мектептерде IT-сыныптар ашылған. Біз роботты сыныптарды бағдарламалау сыныптарымен біріктірдік. IT-технология бағдарламасының франшизасы үшін 2,7 млрд. теңге төлеуіміз керек болған. Қаламыздағы Электротехника колледжінің студенттері бұл бағдарламаны өздері жасады және ол Білім және ғылым министр-лігінде мақұлданды. Нәтижесінде ақша үнемделді, біз оны 52 млн. теңгеге сатып алдық, — деді аймақ басшысы.
Келесі жылдың мамыр айына дейін облыстағы барлық 655 мектепте IТ-сыныптар болады деп күтілуде. Бүгінде өңірде 270 IT-технологиялық сыныптар ашылыпты. «Әрбір тұрғын экономиканың дамып келе жатқанын сезінуі керек. Мен оны сіздерге нақты жұмыспен дәлелдейтін боламын», — деді аймақ басшысы.
Осы жылдың мамыр айынан бастап қаланың негізгі бөліктері жаз мезгілінде де ыстық сумен қамтылды. Сонымен қатар келер жылы қаламыздағы Бейбітшілік аралында тұрғындардың салауатты өмір салтын ұстануына жағдай жасайтын спорттық-экологиялық саябақ орнатылмақ.
Бұдан кейін Даниал Кенжетайұлы қаламыздағы Затон, Силикат аудандарын жылумен қамтитын РК-3 қазандығының қайта құру жұмыстарымен танысты. РК-3 қазандығы жақын орналасқан аудандар мен Қарағайлы ықшам ауданын жылумен қамтиды. Алдағы мақсат — жаңадан салынып жатқан құрылыс нысандарын қамту үшін жылудың таратылу көлемін ұлғайту.
— Қайта құру жұмыстары Қарағайлы ықшам ауданын 40 гигакалориямен қамтуға мүмкіндік береді. Яғни РК-3 қазандығы көп қабатты 45 тұрғын үйі мен әлеуметтік нысандарды, «Абай Арена» спорт кешенін, ондағы балабақшаны жылумен қамтиды, — деді қала әкімінің орынбасары Николай Ушаков.
Аймақ басшысы Даниал Ахметов Қарағайлы ықшам ауданын жылумен қамтамасыз етудің барлық жолдарын қарастыру туралы тапсырма берді.
Облыс әкімі Даниал Ахметов бұл сапарында Полимерлік өнімдер зауытына да барды. Полиэтилен су құбырлары мен кәріз жүйесіне арналған полипропилен құбырларын, біріктіргіш бөлшектерді жасаумен айналысатын кәсіпорынның жұмыс барысында отандық емес, шетелдік өнімдерді пайдаланатынына көз жеткізген аймақ басшысы Даниал Ахметов зауыт басшылығын сынға алды.
— Зауыт өнімдерінің қолжетімді бағада болып, бәкекеге қабілеттілігі артуы үшін арматураларды Ресейден әкелуді тоқтату керек. Өскемен арматура зауыты өнімдерінің сапасы шетелдік өнімдерден әлдеқайда жоғары және 25 жылға сапа кепілдігі бар. Ресейдің қандай компаниясы 25 жылға кепілдік бере алады? Энергетика басқармасы мен құрылыс басқармасына жағдайды бақылауға алып, Ресейден сатып алуды тоқтатуды тапсырамын,- деді аймақ басшысы Даниал Ахметов.
Бұл аймақтағы су құбырларын жасаумен айналысатын компанияларға да қатысты. Биылғы жылы облыстағы су құбырларының құрылысына 17 млрд. теңге жұмсалыпты. Келесі жылы қаржыландыру 28 млрд. теңгеге дейін ұлғаймақ.
— Келесі жылдан бастап «Мемлекеттік сатып алулар туралы» Заңға өзгерістер енгізіледі. Баға мен сапа қатар есепке алынатын болады. Сол кезде ешкім бағаны жасанды түрде 30 пайызға төмендете алмайды. Кәсіпорындар бағаны түсіргенде қандай материалдарды қолданатыны белгілі. Нәтижесінде бір жылдан кейін тауар қолданысқа жарамай қалып жатады. Егер бір жылдан кейін бағаны төмендеткіңіз келсе, сол соманы ақшалай түрде дереу бюджетке жіберіңіздер. Бағаны түсіргеннен кейін жобалық-сметалық құжатқа өзгерістер енгізу керектігін айтасыздар. Ескерте кетейін, ешқандай қайта қарау болмайды,- деді аймақ басшысы Д.Ахметов.
Облыс әкімі «Мемлекеттік сатып алулар туралы» Заңға өзгерістер енгізілгеннен кейін ұсынылған бағаға бағдарлану мен орындалған жұмыстың сапасына назар аудармау деген болмайтынын баса айтты. Аймақ басшысының айтуынша, Заңда тағы бір кемшілік бар – бұл тәжірибені есепке алмау.
— Өкішінке орай, Қаржы министрлігінің жаңа бұйрығына сәйкес, кәсіпорындардың тәжірибесі ескерілмей қалды. Мен бұл туралы Үкіметке өтініш білдірдім және «Мемлекеттік сатып алулар туралы» Заңның сақталуына қол жеткіземін деп ойлаймын. Енді біз сіздердің жұмыс тәжірибелеріңізді, әрбір тұрғызылған су құбырларын есепке аламыз,- деді аймақ басшысы.
Аймақ басшысы Семейге жұмыс сапарын Қарағайлы ықшам ауданында қорытындылап, осы ауданнан бой көтерген «Абай Арена» мәдени-спорт кешенінің құрылыс барысына оң бағасын берді.
Айта кетейік, 5 мың орынға арналған «Абай Арена» мәдени-спорт кешенінің құрылысы 2019 жылдың желтоқсан айында аяқталады деп көзделуде.
Құралай ҚАЙЫРЖАНҚЫЗЫ.
