Сәрсенбі, 14 қараша күні «Қазақ тілі әліпбиін латын графикасына 2025 жылға дейін кезең-кезеңімен көшіру жөніндегі іс-шаралар жоспарына» сәйкес, республика бойынша алғаш рет бір уақытта жалпыхалықтық диктант жазу шарасы өтті. Аталмыш шараға Семей қаласының жұртшылығы да белсене қатысты.
Семей мемлекеттік медицина университетінде өткен диктант жазуға 250-ден астам адам келсе, жалпы қала бойынша 20 мың мемлекет, медицина, әскери бөлімдердің, прокуратура саласының, мәдени мекемелердің, қоғамдық денсаулық сақтау басқармасының қызметкерлері, қалалық Достық үйінің ұжымы және ЖОО мен колледждердің оқытушылары мен студенттері, мектеп мұғалімдері мен жоғары сынып оқушылары қатысты.
«Қазақ тілі емлесінің негізгі ережелері» жобасын іс-тәжірибеде жан-жақты қамтумен қатар, жаңа ережеге бейімдеу-ді мақсат ететін диктант жазу шарасы латын графикасына негізделген әліпбиді жылдам меңгеруге үндейді.
Қалалық мәдениет және тілдерді дамыту бөлімінің басшысы Назерке Аққожинаның айтуынша, диктант нәтижесінде кімнің қаншалықты сауатты жазғандығын анықтау басты шарт емес.
— Қалалық мәдениет және тілдерді дамыту бөлімі мен тілдерді оқыту орталығының ұйымдастыруымен латын қарпіне халықтың дұрыс көзқарасын қалыптастыру, олардың үйрену деңгейін байқау, қызығушылықтарын ояту мақсатында түрлі шаралар өткізіліп жатыр. Солардың бірі — осы жалпыхалықтық диктант. Жазылған диктантқа баға қойылмайды. Шара соңында қатысушыларға диктанттың дұрыс нұсқасы беріліп, әрбір қатысушы өзі жазған мәтінді өзі тексереді. Бұл — латын қарпіне көшуге мониторинг жүргізу мақсатында ұйымдастырылып отырған шара,- деді қалалық мәдениет және тілдерді дамыту бөлімінің басшысы Назерке Аққожина.
Диктант жазу үшін «Рухани жаңғыру» тақырыбындағы 90 сөзден тұратын аудиомәтін тыңдалды.
— Елбасының Жарлығымен латын қарпіне негізделген жаңа қазақ әліпбиі бекітілген болатын. Бүгін сол шараның аясында барлығымыз жиналып отырмыз. Жастар үлкендерге қарап үйренеді, үлгі алады, сондықтан осында әдейі келдім. Мұндай шараға мен сияқты жетпістен асқан адамдардың қатысуы жастарға ой салады. Латын қарпіне көшуді қолдаймын және диктант жазу еш қиындық тудырмайды деген сенімдемін,- деді жалпыхалықтық диктантқа қатысушы «Әмина» Семей қаласы мұсылман әйелдері қоғамдық бірлестігінің төрайымы Гүлжихан Жұматаева.
Диктант жазу аяқталған соң қатысушыларға «Рухани жаңғыру» мақаласының дұрыс нұсқасы беріліп, нәтижесін тексеріп көру ұсынылды.
Құралай ҚАЙЫРЖАНҚЫЗЫ, «Семей таңы»
