Сәрсенбі, 21 қараша күні Абай музейінде ақын, ғұлама, ойшыл Шәкәрім Құдайбердіұлының 1961 жылы сүйегі салынған чемоданның таныстырылымы болды. Сол жылы Ахат Құдайбердиев Құрқұдықтан әкесі Шәкәрімнің сүйегін топырақтан аршып алып, Бақанастан Жидебайға әкеліп жерлеген болатын.
1952 жылы жасалынған чемоданның ұзындығы 72 см, ені 46 см, биіктігі 24 см. Ішінде «Ленинград, 1952» деген жазулар бар. Бұл чемоданды Абай ауданы Қарауыл елді мекенінің тұрғыны Кенжетілеу Доланбеков 1953 жылы сапарда жүрген кезінде сатып алған екен. Кейін, 1961 жылы, Ахат Шәкәрімұлы Жидебайға жол жүрерде өзімен бірге ала кеткен. Жәдігерді Абай музейіне 2017 жылы шілде айында Айдар Доланбеков тапсырған. Музей қызметкерлерінің айтуынша, бұл чемоданға Шәкәрім Құдайбердіұлының сүйегі салынғаны туралы Ахат Шәкәрімұлы, Мінәш Әрхамқызы мен Досымхан Тоққараұлының естеліктерінен оқып танысуға болады.
— Ахат Шәкәрімұлының естелігінде Шәкәрімнің тоқпан жілігі, аяқ, қол сүйектері — барлығының өлшем бірліктері көрсетілген. Сол өлшемдерге сүйенсек, ақынның мүрдесі чемоданға сыяды. Айдар Долымбековтің естеліктерінде айтылғандай, Ахат жол жүрердің алдында әкесінің сүйегін Жидебайға жеткізу үшін мүрдені салатын зат сұраған екен. Сонда осы Кенжетілеу ақсақалдың үйінде тұрған чемодан еске түскен. «Ахат ақсақал жол жүрер алдында әкем үйге келді де, анама ана тұрған чемоданды босат деп айтты»,- деп айтады Айдар Долымбеков. Бірақ сол кезде бұл зат келешек ұрпақ үшін құнды жәдігер болатынына мән берілмеген. Шәкәрімнің сүйегі жеткізілген чемодан қазақтың қарапайым отбасында елеусіз зат ретінде қалып қойған. Бірақ жоғалып кетпей, осы күнге дейін сақталған,- дейді Абай музейінің аға ғылыми қызметкері Қуат Қиықбай.
Енді бұл жәдігер Абай музейінің Шәкәрімтану залына қойылатын болады.
Құралай ҚАЙЫРЖАНҚЫЗЫ, {jcomments off}«Семей таңы»
