Елбасының 2017 жылғы 27 ақпандағы өңірлерде кездесетін идеологиялық тұрғыдан ескірген, қайталанатын атауларды өзгертіп, тарихи жер-су атауларына және ұлттық танымға жақын дәстүрлі атауларға ауыс-тыру жөніндегі арнайы тапсырмасын орындау мақсатында республикалық ономастикалық комиссияның отырысында Семей қаласындағы Ленин көшесін Мәңгілік ел деп өзгерту туралы шешім шығарылған болатын.
Жасыратыны жоқ, Семейдегі «Күн көсем» атындағы көшенің атауын өзгерту көптен бері айтылып жүрген халықтың көкейіндегі ой еді. Алаш қозғалысының 100 жылдығына даярлық барысында да осы мәселе қоғам белсенділері тарапынан қызу талқыға түсті. Семейде Әлихан Бөкейханов атындағы көше бар болғандықтан, Ленин көшесін Алаш көсемінің есімімен атау туралы ұсыныстар қолдау таппады.
Өткен жылдың қазан айында Семей қаласы әкімдігінде Ленин көшесі мен Полковничий аралының атауларын өзгертуге қатысты қоғамдық тыңдау өтіп, қалалық мәслихат депутаттары Ленин көшесінің атауын «Мәңгілік ел» деп ауыстыру туралы бастаманы бір ауыздан қолдады. 31 мамыр — Саяси қуғын-сүргін құрбандарын еске алу күнінде облыс әкімінің орынбасары Әсем Бекқызының шешімнің облыстық және республикалық ономастика комиссиялары тарапынан мақұлданғанын жеткізіп, семейліктерден сүйінші сұрағаны да есімізде. Бірақ осы күнге дейін Ленин көшесі атауы жазылған тақтайшалардың алынбай тұруы белсенді тұрғындардың назарынан тыс қалған жоқ.
Енді, міне, 1 желтоқсан — Тұңғыш Президент күнінде Ленин көшесінің атауы ресми түрде Мәңгілік ел болып өзгерді.
— Мәңгілік ел болу — біздің ата-бабаларымыздың асқақ арманы. Ол арман тұрмысы бақуатты, түтіні түзу ұшқан, ұрпағы ертеңіне сеніммен қарайтын бақытты ел болу еді. Күлтегін тасына 731 жылы осы сөз жазылған. 2001 жылы Иманғали Тасмағамбетовтің бастамасымен, Елбасының тапсырмасымен Күлтегін ескерткішінің көшірмесі Лев Гумилев атындағы Еуразия ұлттық университетіне әкелінді. Ескерткіштегі сөздер жоқтау емес, мемлекеттік трактат: «Күндіз отырмадым, түнде ұйықтамадым. Қара терімді шұбырттым. Қызыл қанымды жүгірттім. Түрік халқы үшін». Алайда 731 жылы көк тасқа таңбаланған хатты көк түріктер жиналып, бірден жаза салған жоқ. Мұндай дәрежеге жету үшін халықтың алдында 3000 жылдық тарихы, темірдей тілі, қалыптасқан фонетикасы, грамматикасы, морфологиясы болуы керек.
VIII ғасырдағы ата-бабаларымыздың арманы ақиқатқа айналды. Біз Мәңгілік елдің іргетасын қаладық. 42 ұлт пен ұлыстан тұратын түркі халықтарының ортақ идеясы — Мәңгілік ел!- деді семейліктерді құттықтаған Құсмілия Нұрқасым.
— Біз тәуелсіздігімізді алған кезде Санк-Петербургтің Султанов пен Кляшторный деген екі ғалымы «Қазақстанның 3000 жылдық тарихы» атты кітап шығарды. Бұл тарихи еңбек жарық көрген кезде мен Алматыдан алдырып, оқып шықтым. Бір жұмадан кейін «Казахстанская правда» газеті «Қазақстанның 300 жылдық тарихы» деген кітап шықты деп жазды. Қасақана жіберілген қате. Айтқым келгені — біз қазір тәуелсіздік алып, 3000 жылдық тарихымызды ақтап тұрмыз. Біздің елдің Қазақ елі деп аталғанына 3000 жыл болған. Осыны жастар мақтан етіңіздер. 100 мың данамен шыққан кітапты кітапханадан тауып оқыңыздар,- деді жазушы Медеу Сәрсеке.
Шара соңы мерекелік концертке ұласты.
Айта кетсек, Мәңгілік ел көшесі бойында Абай музейі, Әлихан Бөкейханов ескерткіші, ШҚО өлкетану музейі, Қазақ инновациялық гуманитарлық-заң университеті, Орталық саябақ, Жеңіс саябағы, Семей қалалық статистика басқармасы, Халық банкі сынды бірқатар маңызды нысандар мен мекемелер орналасқан.
Жадыра ТӨЛЕГЕНҚЫЗЫ, {jcomments off}«Семей таңы»
