Биылғы жылдың желтоқсаны Семейдің қаламгерлерін құрметтеген, кәсіпкерлерін әспеттеген ай болды. Тәуелсіздік мерекесі қарсаңында Елбасының Жарлығымен бір топ жерлестерімізге мемлекеттік марапаттар тапсырылды.
Марапат алғандардың қатарында сексеннің сеңгіріне шықса да қаламы қолдан түспеген, аймақта жатып қазақ әдебиетіне өзінің ерекше еңбектерімен үлес қосып жүрген жазушы МЕДЕУ СӘРСЕКЕ бар. Қаныш Сәтбаев, Евней Бөкетов, Ермахан Бекмаханов жайлы деректі-ғұмырнамалық еңбектері арқылы кейіпкерлерінің өмірі мен қызметін зерттеуге ұзақ жылдарын арнаған қаламгердің «Семей қасіреті» атты тарихи туындысы ерекше бөліп айтуды қажет етеді. Мәдеу Сәрсекенің «Парасат» орденін алуы жазушының еңбегіне берілген шынайы баға деп есептейміз.
Мереке қарсаңында «Ақшың» корпорациясының президенті, Шығыс Қазақстан облыстық мәслихатының депутаты МАРАТ ҚҰРМАНБАЙ, «Гордорстрой» ЖШС директоры, Семей қалалық мәслихатының депутаты БАУЫРЖАН ҚАЙРАНБАЕВ, «Азия» фирмасы» ЖШС директоры СӘУЛЕ ДОСҚОЖАНОВА «Құрмет» орденімен марапатталды.
Қазақстан Республикасының 2018 жылғы әдебиет пен өнер саласындағы Мемлекеттік сыйлығын алғандардың қатарында жерлесіміз, ақын ТЫНЫШТЫҚБЕК ӘБДІКӘКІМОВ бар. Ақынға бұл марапат «Алқоңыр дүние» өлеңдері мен балладалар жинағы үшін беріліпті.
«Дарын» Мемлекеттік жастар сыйлығының иегерлері атанған жеңімпаздардың қатарында жерлесіміз МЕРЕЙ ҚАРТ бар. Талантты жас ақын да республика бойынша оза шауып, бәйге алған 10 жеңімпаздың бірі болды.
«Семей таңы» — «Вести Семей» газеттерінің ұжымдары мемлекеттік {jcomments off}марапат алған жерлестерді құттықтайды!
