Өткен аптада Абай кітапханасында Қоғамдық кеңес мүшелерінің қоғамдық тыңдауы өтті. Күн тәртібінде Семей қаласындағы консульта-тивтік-диагностикалық орталықтағы медициналық қызмет көрсету сапасын жақсарту мәселесі қаралды.
Орталық басшысы Жанат Молдағалиеваның айтуынша, аталмыш емханада науқастарды қабылдайтын орын тапшы. Сондықтан емхана басшысы Қоғамдық кеңестен қосымша ғимарат бөлуге көмектесуін сұрады.
— Консультативтік-диагности-калық орталықтағы жалпы тәжірибелік дәрігер (ЖТД) бөліміне 28 мыңнан астам адам бекітілген. 18 участоктің тұрғындарына қызмет көрсетіледі. Күніне 360-қа жуық адам медициналық көмек алады. Ауруханаға бекітілген тұрғындар санының артуына байланысты және учаскелік дәрігерлер жүктемесін азайту үшін қосымша екі ЖТД кабинеті, 1 балалар дәрігері кабинеті, 2 қосымша кабинет, студенттерді қабылдайтын терапевт дәрігерлерге 2 кабинет қажет. Медицина қызметкерлеріне арналған ординаторлық кабинет тар. Онда 18 дәрігер мен 40-тан астам медбике жұмыс істейді. 60 000 орынға арналған алғашқы психикалық орталықтың ашылуына байланысты 5 дәрігер кабинеті, 2 психоэмоционалдық көмек беретін, 1 санитарлық-гигиеналық кабинет, сондай-ақ психотропты және күшті әсер етуші препараттарды сатуға арналған дәріхана қажет. Келесі жылдан бастап 4 категория бойынша жедел жәрдем қызметі жұмыс істей бастайды. Ол үшін де 4 кабинет қажет,- деген Жанат Тұрсынғалиқызы жалпы аумағы 230 шаршы метрді құрайтын ғимарат қажет екенін жеткізді және Уранхаев, 20/22 мекенжайында орналасқан ғимараттың сол жақ қапталындағы балалар кітапханасын аурухана қажеттілігіне босатып беруді өтінді. Диагностикалық орталық басшысының сөзіне сүйенсек, емделуге мұқтаж жандардың саны кітапханаға келушілерден 100 есе көп.
Қалалық мәдениет және тілдерді дамыту бөлімінің басшысы Назерке Аққожинаның айтуынша, Балалар мен жасөспірімдер кітапханасында 32893 кітап қоры бар. 2010 жылы кітапхана ғимаратына жөндеу жұмыстары жүргізіліп, мүгедек балалардың кіріп-шығуы үшін пандус қойылған. 2016 жылы кітапхана ғимаратының жартысының амбулатория иелігіне берілуіне байланысты, мүгедек балалардың келуі қиындаған.
— Денсаулықтың адам өмірі үшін маңыздылығын жоққа шығармаймыз. Бірақ балалар мен жасөспірімдер кітапханасы да өте қажет. Консультативтік-диагностикалық орталық пациенттерге жайсыздық тудырып отырса, біздің кітапханада да орын тапшылығы байқалады. Кітапханада 32 893 кітап қоры бар. Оның 10 мыңы орын болмағандықтан кітап сөрелеріне қойылмаған. Консультативтік-диагности-калық орталықтың балалар кітапханасының ғимаратын босату туралы өтініші орынсыз деп ойлаймын. Бұл — балаларға қызмет көрсететін қаладағы жалғыз кітапхана,- деді Н.Аққожина.
Қоғамдық кеңес мүшелері тарапынан Семей қаласындағы консультативтік-диагностикалық орталықтағы орын тапшылығын шешуге байланысты әртүрлі пікірлер айтылды. Бірі амбулатория басшысының ұсынысын қолдаса, енді бірі әр участокке арналған типтік емхана салудың жобалық-сметалық құжаттарын әзірлеу туралы жергілікті әкімдікке ұсыныс тастау керек деген ойларын ортаға салды. Балалар мен жасөспірімдер кітапханасын Балалар мен жастардың шығармашылық сарайына көшіру туралы ұсыныс та айтылды. Сондай-ақ жаңа тұрғызылған тұрғын үйлердің бірінші қабатын кітапхана немесе аурухана иелігіне беру туралы келісімшарт жасау керек деушілер де болды.
Қоғамдық кеңес төрағасы Жанна Жибраева барлық ұсыныстарды сараптап, мәселенің шешімін қала әкіміне жеткізетінін айтты.
Жадыра Самат, {jcomments off}«Семей таңы»
