Өткен аптада қалалық әкімдікте қоқыс шығарушы ұйымдар арасындағы даулы мәселеге қатысты жиын өтті. Қоқыс шығарушы ұйымдардың қатты тұрмыстық қалдықтарды полигонға шығаруға келісімшарты болмай, бұл м{jcomments off}әселе үлкен дауға айналып, жағдайды шешуге қала әкімі Ермак Сәлімов араласты.
29 желтоқсан күні жергілікті қоқыс полигоны иесі мен тұрмыстық қалдықтарды шығарумен айналысатын сервистік ұйымдарының қатысуымен жиын өткен болатын. Жиында көтерілген негізгі мәселе – қаламыздағы қоқыс шығаратын ұйымдардың тек үшеуінде ғана қатты тұрмыстық қалдықтарды полигонға шығаруға келісімшарты бар, яғни, 2019 жылдың басынан бастап көптеген сервистік ұйымдар полигонға кіре алмайды.
Міне, осы мәселенің түйінің шешіп беру үшін «Мельник» ЖК иесі Алла Мельникова қала әкімінен көмек сұрады.
— Келісімшарттың жоқтығынан, қаңтардың екісінен бастап біз қоқыстарды шығара алмаймыз. Бұған дейін біз қалалық ТҮКШ бөліміне жүгіндік. Олар бізге келісімшарт жасалады деп уәде берді. Бірақ жағдай өзгермеді. Бұл мәселенің түйінін тарқатуға көмектесуіңізді сұраймыз,- деді «Мельник» ЖК иесі Алла Мельникова. Өз сөзінде кәсіпкер бірнеше қатаң мәлімдеме жасады. Оның айтуынша, «Рафаэль Хазипов» ЖК басқа қызмет көрсететін ұйымдардың құқықтарын және елдің монополияға қарсы заңдарын бұзып, тек еншілес компаниялармен ғана келісімшартқа отыратын көрінеді.
Ал шаһардағы жалғыз қоқыс полигонының иесі Рафаэль Хазипов болса өз сөзінде биылғы жылдың қаңтар айында күшіне енетін Экологиялық кодекстің жаңа нормаларын алдыға тартты.
Айта кетейік, Экологиялық кодекске қатты тұрмыстық қалдықтарды өңдеу және сұрыптау туралы жаңа талаптар 2016 жылы енгізілген болатын. Бірақ коммуналдық ұйымдардың өтінішімен, дайындыққа 2 жыл уақыт берілген. Соған қарамастан, көптеген қызмет көрсететін ұйымдар ешқандай шара қолданбаған.
— 2016 жылы біздің серіктесіміз «ЭкоВосток» фирмасы сұрыптау желісін сатып алды. Ол қазір жұмыс істеп тұр. Желіде қалдықтар сұрыпталып, қайта өңдейтін ұйымдарға жіберіледі. Біз Экологиялық кодекстің жаңа талаптарына сай жұмыс істеу үшін алдын ала дайындалдық. Басқа сервистік ұйымдар қандай дайындық жасады? Монополияға қарсы комитетке барып, менің атыма шағым түсірді. Біз сұрыптау желісін сатып алуға 35 млн. теңге қаржы жұмсадық. Ал олар дайын асқа тік қасық болғысы келеді. Неге тек біз ғана шығын шығаруымыз керек? — деді Р.Хазипов.
Жаңа талаптарға сәйкес, қатты тұрмыстық қалдықтарды алдын ала өндеусіз көмуге тыйым салынады, сонымен бірге жаңа жылдан бастап сынған әйнектерді, тамақ қалдықтарын, пластмасса өнімдерін, яғни қайта өңдеуге болатын барлық заттарды қоқыс төгетін орындарға көмуге болмайды. Рафаэль Хазипов Экологиялық кодекс талаптарының бұзылуы қоғамға, қоршаған ортаға елеулі зардаптарын тигізіп жатқанын айтты.
— Қатты тұрмыстық қалдықтарды шығарумен айналысатын сервистік ұйымдардың төлқұжаттарындағы қоқыстарды көмуге арналған санаты заңда көрсетілген талапқа сай келмейді, содан кейін мұндай ұйымдармен қалай келісім жасасуға болады? Сонымен қатар өтінімдер жаңа жыл басталардан бір ай бұрын ұсынылуға тиіс болатын, ал олар 24 желтоқсан күні және алдын ала өңдеуге келісімшарт жасамай жіберіп отыр. 2019 жылдан бастап қатты тұрмыстық қалдықтарды көметін орындар 40 пайызға қысқарады. Мысалы, 2018 жылы ол 51 мың тоннаны құраса, 2019 жылы — 30 мың тонна. Біз 2020 жылы тек 8 мың тонна қоқыс көмуге мүмкіндігіміз бар. Бұл дұрыс, себебі қатты тұрмыстық қалдықтардың көп бөлігі қайта өңделуі керек,- деді Рафаэль Хазипов.
Қала басшысы Ермак Сәлімов бұл мәселе турасында өз пікірін білдірді.
— Бұл жағдайды жаңа жылдың қарсаңында емес, ертерек қолға алу керек болған. Барлық мәселе қоқыс шығарушы ұйымдардың өз міндеттерін дұрыс атқармағандықтан туындап отыр. Бүгінгі күні қалада қоқыс жинау тарифі өте жоғары, бірақ біз бұл ұйымдардың кірістері мен шығындарын білмейміз. Сонымен бірге біз ешқандай алға жылжуды көріп отырған жоқпыз. Қоқыс контейнерлері жаңартылмағалы көп уақыт болды және қалдықтарды сұрыптап жинауға жағдай жасалмаған. Жылдар бойы жаңа қоқыс жинау техникалары сатылып алынбады,- деді қала әкімі қоқыс полигонының иесі Р.Хазиповқа. — Қатты тұрмыстық қалдықтар тарифін қыркүйек айында бір адамға 200 теңгеден 384 теңгеге, ал кәсіпорындардан бір шаршы метріне 285 теңгеден 400 теңгеге дейін көтеруді сұрадыңыз. Алайда кірістер мен шығыстардың ешқандай сметалық құжаты ұсынылмады. Сол себепті тариф бағасы бұрынғы қалпында қалады және тіпті 5% — ға төмендеуі де мүмкін,- деп атап өтті Ермак Сәлімов.
2019 жылдың 2 қаңтарынан бастап қала әкімі Ермак Бидахметұлы тұрмыстық қалдықтарды шығаруды жүзеге асыратын сервистік ұйымдардың жұмысын тексеріп, рейд өткізетін болады.
Қуандық НӘДІРБЕКҰЛЫ, «Семей таңы»
