Семей қалалық баспасөз орталығында Ертіс және Озерки ауылдық округтерінің әкімдері есеп берді.
Ертіс ауылдық округінің 9 елді мекенінде 2511 тұрғын бар. Жер көлемі 40 мың гектарды құрайды. Оның 25 мыңы ауыл шаруашылығына арналған жерлер. Ауыл халқы, негізінен, мал шаруашылығымен айналысады. Ауылдық округте 40 шаруа қожалығы, 2 орта білім беретін мектеп, Прииртышский және Мұқыр ауылдарында дәрігерлік амбулатория, Мұрат ауылында фельдшерлік пункт жұмыс істеп тұр.
– Ертіс ауылдық округі Ертіс және Мұқыр өзендерінің жағалауында орналасқан. 7 мемлекеттік қызметкер әлеуметтік сала, жастар саясаты, кадр жұмысы, экономика және бухгалтерлік жұмыстармен айналысады. Ұлт жоспары — «100 нақты қадам» бағдарламасы орындалуда. 2018 жылдың 1 қаңтарынан округке мемлекеттік бюджеттің 4-деңгейі – жергілікті өзін-өзі басқару бюджеті енгізілді. 2019 жылға бекітілген бюджеттік бағдарлама 34 млн. 155 мың теңгені құрайды, — дейді Ертіс ауылдық округінің әкімі Қасен Сейітқасымов.
Округ әкімінің айтуынша, округте сүт және ет өндіру жұмыстары жақсы жолға қойылыпты. Биылғы жылы «Нұр» шаруа қожалығының базасында сүт өндіретін тауарлық ферма ашылған. Қазір 146 бас сүтті сиыр сауылуда. Сондай-ақ сүт өңдейтін цехта 2-2,5 тоннаға дейін сүт өнімдері өндіріледі. Мал шаруашылығында да алға жылжу бар.
— 2016 жылы ауылымызда қымыз өндірумен айналысатын «Түрксіб – 1» атты кооператив құрылған. Өнімдері «Солтүстік» сауда логистикалық орталығына және Өскемен базарына тасымалдануда. Кооператив сондай-ақ сүтті бағыттағы сиыр өсірумен де айналысады. Сүт өнімдерін Нахаловка аумағында орналасқан «Айша» цехына да өткізеді,- дейді Қ.Сейітқасымов.
Нәтижелі жұмыспен қамту бағдарламасы аясында 15 адам қысқа мерзімді курстардан өтіп, 4 адам жұмыспен қамтылды, 2 адам жеке кәсіпкер ретінде тіркелген. 1 адам шаштараз ашу жобасы бойынша, сондай-ақ Мұрат ауылының тұрғыны «Бастау бизнес» бағдарламасы арқылы фотосурет қызметкері жобасы бойынша мемлекеттік грант ұтып алған.
Округ әкімінің айтуынша, Мұқыр ауылына апаратын 3 шақырым жол ағымдағы жөндеуден өтіп, ауыл жастарының демеушілігімен Мұқыр ауылына кіреберіс қақпа орнатылыпты. 2019 жылы су құбырын тарту және ішкі жолдарды жөндеуге жоба жасалынып, келесі жылы жұмыстар басталмақ. Сондай-ақ әкімшілік ғимаратына ағымдағы жөндеу жұмыстарын жүргізу де қолға алынады. Ертіс ауылдық округіне қарасты үш ауылды жарықтандыру мақсатында 10 млн. 221 мың теңгеге жобалық-сметалық құжат жасалынған. Сонымен қатар көктемге қарай Мұқыр ауылындағы орталық саябаққа 3 млн. 301 мың теңгеге балалар алаңын салу көзделіп отыр екен.
Озерки ауылдық округі әкімі лауазымына тағайындалғанына екі ай ғана уақыт болған Берік Түсіпов ауылдық округтің әлеуметтік жағдайы мен қордаланған бірқатар мәселелер жайлы айтып өтті.
— Кіші Ақтөбе ауылында шешілуге тиісті көптеген проблемалар болды. Алдымен тұрғындармен жиналыс өткізіп, мәселелерді шешуге тырыстым. Ауылға аялдама орнатылды. Қар суының жайылуының алдын алу мақсатында жұмыстар жүргізілді. Сондай-ақ арықтар арқылы өтетін қосымша жолдар бекітілді,- дейді Озерки ауылдық округі әкімі Берік Түсіпов.
Жадыра ТӨЛЕГЕНҚЫЗЫ, {jcomments off}«Семей таңы»
